ވިދިވިދިގެން ތިން ތަށި ހޯދައި ރާއްޖޭގެ ވޮލީގެ ރަސްކަން ސިޓީ އަށް

ގައުމީ ވޮލީބޯޅަ މުބާރާތުގެ ފައިނަލުގައި ސިފައިންގެ މައްޗަށް ކުރި ހޯދައި، ސީޒަން ވިދިވިދިގެން ތިން މުބާރާތް ވެސް ކާމިޔާބުކޮށް، ރާއްޖޭގެ ވޮލީބޯޅައިގެ ރަސްކަން ސްޕޯޓްސް ކްލަބް ސިޓީން ހޯދައިފި އެވެ.

ސޯޝަލް ސެންޓަރުގެ އިންޑޯ ހޯލްގައި މިރޭ ކުޅުނު ފައިނަލް މެޗު ސިޓީން ކާމިޔާބު ކުރީ 3-1 ސެޓުންނެވެ.

މެޗުގެ ދެވަނަ ސެޓަކީ، ނިމިދިޔަ ތިން މުބާރާތުގެ މެޗުތަކުގެ ތެރެއިން އެއް ސެޓެއްގައި އެންމެ ބޮޑަށް ވާދަވެރިކަން ފެނުނު ސެޓެވެ. އެ ސެޓް ނިންމަން ދެތިން ފަހަރެއްގެ މަތިން ދެ ޓީމަށް ވެސް ފުރުސަތު ލިބިގެން ދިޔަ އެވެ. މެޗުގައި ސިފައިންނަށް ހޯދުނު ހަމައެކަނި ސެޓަށް ވީ އެ ސެޓެވެ. އެއް ތިރީިސް ޕޮއިންޓަށް ދެމިގެން ދިޔަ ސެޓް، ސިފައިން ކާމިޔާބު ކުރީ 31-29 ންނެވެ.

ފުރަތަމަ ސެޓްގައި ވެސް ވާދަވެރިކަން ފެނިގެން ދިޔަ އެވެ. އެ ސެޓުގައި ސިޓީން ކުރި ހޯދީ 25-22 ންނެވެ. އެކަމަކު ދެވަނަ ސެޓް ވާދަވެރިކަމާއެކު ސިފައިންނަށް ކާމިޔާބު ކުރެވުނަސް މެޗުގެ ތެރެއަށް އަންނަން އެޓީމަށް ފަސޭހަ ކަމަކަށް ނުވި އެވެ.

ފަހު ދެ ސެޓް ސިޓީން ފަސޭހަ ކަމާއެކު ކާމިޔާބު ކުރި އެވެ. އެ ދެ ސެޓް އެ ޓީމުން ގެންދިޔައީ 25-17 އަދި 25-16 އިންނެވެ.

މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ، ސިޓީގެ ކެޕްޓަން އަލީ ހުޒާމް (ހުޒާންޓޭ) އެވެ. ނިމިދިޔަ ތިން މުބާރާތުގައި ވެސް ހުޒާމް ވަނީ ތަފާތު މޮޅު ކުޅުމެއް ދައްކައިފަ އެވެ. މުބާރާތުގެ އެންމެ މޮޅު ބިދޭސީ ކުޅުންތެރިޔަކީ ސިޓީގެ ހަރްދީޕް ސިންހް އެވެ.

މިއަހަރުގެ ވޮލީބޯޅަ ސީޒަނަކީ ތަރީހީ ބަދަލަކާ އެކު ކުރިއަށް ގެންދިޔަ ސީޒަނެކެވެ. ވީއޭއެމުން ޓީމުތަކަށް ބިދޭސީ ކުޅުންތެރިން ހަމަޖައްސައި ދީގެން ކުރިއަށް ގެންދިޔަ ސީޒަންގައި 18 ކުޅުންތެރިންގެ ޕޫލެއްގެ ތެރެއިން ކޮން ޓީމަކަށް ބިދޭސީ ތިން ކުޅުންތެރިން ހޯދި އެވެ.