ބަޖެޓް ސަޕޯޓަށް ބޭރުގެ އެހީ ލިބުން ދަތި: އަމީރު

ރަޝިއާ-ޔޫކްރެއިން ހަނގުރާމައާ ގުޅިގެން މުޅި ދުނިޔޭގެ އިގްތިސާދަށް އަންނަ ލޮޅުންތަކާ ހެދި، ބަޖެޓު ސަޕޯޓަށް ބޭރުގެ މާލީ އިދާރާތަކުން އެހީ ލިބުން ވަރަށް އުނދަގޫ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.

އިއްޔެ ބޭއްވި ނޫސްވެރިންގެ ބައްދަލުވުމުގައި އަމީރު ވިދާޅުވީ، ރާއްޖެއަކީ ތަރައްގީ ވަމުން އަންނަ ގައުމަކަށް ވާތީ ކުޑަ އިންޓަރެސްޓެއްގައި ލިބޭ ލޯނުތައް ހޯދަން ދަތި ކަމަށެވެ.

"ދޭދޭ ގައުމުތަކުންނާއި މާލީ އިދާރާތަކުން ލޯނު ލިބޭނީ ތަރައްގީގެ މަޝްރޫއުތަކާ ގުޅުވައިގެން. ބަޖެޓު ސަޕޯޓުގެ ގޮތުގައި ގައުމުތަކުން އެހީ ހޯދަން އުނދަގޫވާނެ. ހާއްސަކޮށް ހަނގުރާމައިގެ ދުވަސްވަރެއްގައި،" އޭނާ ވިދާޅުވި އެވެ.

އަމީރު ވިދާޅުވީ، ތަރައްގީވެފައިވާ ގައުމުތަކުގެ ބޭންކުތަކުން އިންޓްރެސްޓް ރޭޓުތައް މަތިކުރަމުންދާތީ ދުނިޔޭގެ ބާޒާރަށް ގޮސް، ރަނގަޅު ރޭޓެއްގައި ދަރަނި ހޯދުމަކީ ވަރަށް ދަތި ކަމެއް ކަމަށެވެ. އަމީރު ވިދާޅުވީ، ކޮންމެ އަހަރަކު ސުކޫކު ނުވަތަ ބޮންޑު ވިއްކާ ނަމަ، އެ ދަރަނި އަދާ ކުރުމުގައި އިތުރު ރިސްކުތައް ކުރިމަތިވާނެ ކަމަށެވެ.

ފައިނޭންސް ހޯދުމުގައި ދަތިތައް ހުރި ނަމަވެސް، ސަރުކާރުގެ ހަރަދުތައް ކުޑަ ކުރުމުގައި އަބަދުވެސް އުނދަގޫތައް ކުރިމަތިވާ ކަމަށް އަމީރު ވިދާޅުވި އެވެ. އޭނާ ވިދާޅުވީ، ސަރުކާރުގެ ހަރަދުތައް ކުޑަކޮށްފި ނަމަ، ރައްޔިތުންނަށް ވެސް އޭގެ އަސަރުތައް ކުރާނެ ކަމަށެވެ.

އެހެން ނަމަވެސް ދައުލަތުގެ ހަރަދުތައް ކުރުމަށް އަވަސް ފިޔަވަޅުތަކެއް އެޅުމަށް މަސައްކަތް ކުރާ ކަމަށް އޭނާ ވިދާޅުވި އެވެ. އަމީރު ވިދާޅުވީ، ހަރަދުތައް ކުޑަ ކުރަން ބޭސް ފަދަ ތަކެތި ރާއްޖެ އަށް ގެންނަ އުސޫލުތަކަށް ބަދަލުތަކެއް ގެންނާނެ ކަމަށެވެ. މި އަހަރަށް ކަނޑައެޅި ބަޖެޓުގައި ވެސް ބޭހުގެ އަގު ކޮންޓްރޯލް ކުރަން ފިޔަވަޅުތަކެއް އެޅުމަށް ކަނޑައަޅާފައިވެ އެވެ. އެހެން ނަމަވެސް އަދި މިހާތަނަށް އެފަދަ ބަދަލުތަކެއް ގެނެސްފަ އެއް ނުވެ އެވެ.

މިހާލަތުން އަރައިގަނެ، ހަރަދުތައް ހަމަޖެއްސުމަށް ޖީއެސްޓީ އާއި ޓީޖީއެސްޓީ ބޮޑު ކުރަން ސަރުކާރުން ވަނީ ނިންމައިފަ އެވެ. ޓީޖީއެސްޓީ 12 ޕަސެންޓުން 16 ޕަސެންޓަށް ބޮޑު ކުރާ އިރު ޖީއެސްޓީ ހަ ޕަސެންޓުން އަށް ޕަސެންޓަށް ބޮޑު ކުރަން ވަނީ ނިންމައިފަ އެވެ. މި ބަދަލުތައް އަންނަ އަހަރުގެ ޖެނުއަރީން ފެށިގެން ގެންނަން ސަރުކާރުން އަންނަނީ މަޝްވަރާ ކުރަމުންނެވެ.