ބަޖެޓަށް ބޭނުންވާ ފައިނޭންސްގެ 38 ޕަސެންޓް ހޯދައިފިން: އަމީރު

ސަރުކާރުން ރައްޔިތުންގެ މަޖިލިހަށް ހުށަހަޅާފައިވާ އަންނަ އަހަރުގެ ބަޖެޓަށް ބޭނުންވާ ފައިނޭންސިންގެ 38.5 ޕަސެންޓް މިހާރު ވެސް ހޯދާފައިވާ ކަމަށް ފިނޭންސް މިނިސްޓަރު އިބްރާހިމް އަމީރު މިއަދު ވިދާޅުވެއްޖެ އެވެ.

އަންނަ އަހަރަށް ލަފާކޮށް ހުށަހެޅި 42.6 ބިލިއަން ރުފިޔާގެ ބަޖެޓާ ގުޅޭ ގޮތުން، ރައްޔިތުންގެ މަޖިލިހުގެ ބަޖެޓް ކޮމިޓީގައި އޭނާ ވިދާޅުވީ، ބަޖެޓުގެ ޑެފިސިޓް ހަމަޖެއްސުމަށް 11.4 ބިލިއަން ރުފިޔާ ބޭނުންވާ އިރު އޭގެ ތެރެއިން 8.4 ބިލިއަން ރުފިޔާ އަކީ ހަރަދުތައް ހަމަޖެއްސުމަށް ބޭނުންވާ ފައިސާ ކަމަށެވެ. ލޯނު އަނބުރާ ދައްކަން ބޭނުންވަނީ 2.1 ބިލިއަން ރުފިޔާ އެވެ. ސޮވެރިން ޑިވެލޮޕްމެންޓް ފަންޑަށް 870 މިލިއަން ރުފިޔާ ބޭނުންވާ ކަމަށް އަމީރު ވިދާޅުވި އެވެ.

ޑެފިސިޓް ހަމަޖައްސަން ބޭނުންވާ 6.4 ބިލިއަން ރުފިޔާ ހޯދަން ހަމަޖެހިފައިވަނީ ބޭރުގެ މާކެޓުންނެވެ. އަދި ފަސް ބިލިއަން ހޯދަނީ ޑޮމެސްޓިކް މާކެޓުންނެވެ.

"2023 ބޭނުންވާ ޖުމްލަ ފައިނޭންސިންގެެ ތެރެއިން 38.5 ޕަސެންޓް މިހާރު ވެސް ވަނީ ހަމަޖެހިފައި. އަންނަ އަހަރު ފައިނޭންސިންގެ ގޮތުގައި ހޯދާ ފައިސާގެ 56.3 ޕަސެންޓަކީ ބޭރުން ހޯދާ ފައިސާ. މީގެ ތެރޭގައި ޕްރޮޖެކްޓްތަކުން ޑިސްޕާސް ކުރާ 4.1 ބިލިއަން ރުފިޔާ ހިމެނޭ،" މިނިސްޓަރު ވިދާޅުވި އެވެ.

އޭނާ ވިދާޅުވިގޮތުގައި، ބޭރުގެ ބާޒާރަށް 770 މިލިއަން ރުފިޔާގެ ބްލޫ ނުވަތަ ގްރީން ބޮންޑެއް ވިއްކުމަށާއި 100 މިލިއަން ޑޮލަރުގެ ލޯނެއް ހޯދަން ސަރުކާރުން ވަނީ ނިންމައިފަ އެވެ.

ޑެފިސިޓް ހަމަޖެއްސުމަށް ބޮޑު އަދަދެއް އަންނަ އަހަރު ހޯދާ އިރު، މަރުކަޒީ ބޭންކް އެމްއެމްއޭއިން ދީފައިވާ ލަފާގައިވާ ގޮތުން ބަޖެޓުގެ ހަރަދު ހަމަޖެއްސުމަށް ބޭނުންވާ ފައިނޭންސް ހޯދުމުގައި ބޮޑެތި ދަތިތަކެއް އަންނަ އަހަރު ކުރިމަތިވާނެ ކަމަށް ލަފާކޮށްފައިވެ އެވެ.