ރާއްޖޭގެ ސްޕޭސް މިޝަނަށް ކިޔާނެ ނަމެއް ހޯދަނީ

ރާއްޖޭގެ ފުރަތަމަ ސްޕޭސް މިޝަނަށް ކިޔާނެ ނަމެއް ދިނުމުގެ ފުރުސަތު އެޗްޑީސީން އާންމުންނަށް ހުޅުވާލައިފި އެވެ.

އިންސްޓިޓިއުޓް ފޯ ގްލޯބަލް ސަކްސެސް (އައިޖީއެސް) އިން ކުރިއަށް ގެންދާ އެ ޕްރޮގްރާމުގެ މެއިން ޕާޓްނަރު، އެޗްޑީސީން ކުރި ޓްވީޓެއްގައި ބުނީ ސްޕޭސް މިޝަނަށް ދޭނެ "ކޫލް އަދި ކެޗީ" ނަމެއް ހޯދަމުން އަންނަ ކަމަށެވެ.

އެ މިޝަނަށް ދޭނެ ރަނގަޅު ނަމެއް އޮތް ނަމަ، މި މަހުގެ 16 ވަނަ ދުވަހާ ހަމައަށް ފޯމު ފުރައި، އެ ހަރަކާތުގައި ބައިވެރިވުމުގެ ފުރުސަތު އޮންނާނެ ކަމަށް އެ ކުންފުނިން ބުންޏެވެ.

ރާއްޖޭގެ ފުރަތަމަ ސްޕޭސް މިޝަންގެ ޓީމުގައި ހިމެނެނީ 30 އަހަރުން ދަށުގެ ހަތް ޒުވާނެކެވެ. އެއީ ދެ އަންހެނަކާއި ފަސް ފިރިހެނުންނެވެ.

އެ ޓީމުގެ މެމްބަރުންނަކީ އެރޯސްޕޭސް އިންޖީނިއަރުންނާއި އިލެކްޓްރޯނިކްސް އަދި މެކޭނިކަލް އިންޖީނިއަރުންގެ އިތުރުން ކޮމްޕިއުޓާ ސައިންސް ދާއިރާގެ ގްރެޖުއޭޓުންނެވެ.

އެ ޕްރޮގްރާމު ކުރިއަށް ގެންދާ އައިޖީއެސް އިން ބުނެފައިވާ ގޮތުގައި އެ ޓީމު ވަނީ ނެނޯ ސެޓަލައިޓް އިންޖިނިއަރިން ޕްރޮފެޝަނަލް ކޯސް ފުރިހަމަ ކޮށްފަ އެވެ. އެ ކޯހަކީ ސެޓަލައިޓް ހަދައި ލޯންޗުކޮށް، ސައިންޓިފިކް ރިސާޗް ހަދަން ހަދަން ދަސްކޮށްދޭ ކޯހެކެވެ.

އެ ސްޕޭސް މިޝަންގެ އަމާޒަކީ ރާއްޖޭގެ ފުރަތަމަ "ޕްރޮޓައިޕް ސެޓެލައިޓް" ހަދައި ޓެސްޓްކުރުމެވެ. އެއީ ދުނިޔެ ހޫނުވުމާއި މޫސުމަށް އަންނަ ބަދަލުތައް ދެނެގަތުމަށް ބޭނުންވާ މައުލޫމާތު އެއްކުރަން އަޖުމަ ބެލުމަށް ހަދާ ސެޓެލައިޓެކެވެ.

ސްފޭސް މިޝަންގެ ޑައިރެކްޓަރަކަށް އައްޔަންކޮށްފައި ވަނީ އިންޑިއާގެ ތަޖުރިބާކާރެއް ކަމަށްވާ ޑރ. ސްރިމަތީ ކޭސަން އެވެ. އޭނާއަކީ 2017 ގައި ނާސާ އިން ލޯންޗުކުރި ދުނިޔޭގެ އެންމެ ކުޑަ ސެޓްލައިޓްގެ މިޝަންގެ ވެސް ޑައިރެކްޓަރެވެ.