އެމްޕީއެލްގެ "ސްޓޭކް ހޯލްޑާ ފޯރަމް" ބާއްވައިފި

މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ހިދުމަތްތަކާ ގުޅުން ހުރި ފަރާތްތަކާ އެކު "ސްޓޭކްހޯލްޑާ ފޯރަމް" ގެ ނަމުގައި މަޝްވަރާ ބައްދަލުވުމެއް ބާއްވައިިފި އެވެ.

އެމްޕީއެލް ހެޑް އޮފީހުގައި ރޭ ބޭއްވި ބައްދަލުވުމުގައި އެ ކުންފުނީގެ "މަސްލަހަތުވެރިން"ގެ ގޮތުގައި ހިމެނޭ ކްލިއަރިން އޭޖެންޓުންނާއި މާލޭ ވިޔަފާރި ބަނދަރު ސަރަހައްދުގައި މަސައްކަތްކުރާ ލޮރީ ޑްރައިވަރުން ބައިވެރިވި އެވެ.

އެ ބައްދަލުވުމުގައި ވަނީ އެ މީހުންނަށް ދިމާވާ ދަތިތަކާގުޅޭ ގޮތުން މަޝްވަރާކޮށް، އެމްޕީއެލް އިން ފޯރުކޮށްދޭ ހިދުމަތްތައް ރަނގަޅުކުރަން ހިޔާލު ހޯދައިފަ އެވެ.

ބައްދަލުވުމުގައި ވާހަކަދައްކަވަމުން އެމްޕީއެލްގެ ސީއީއޯ ޝާހިދު އަލީ ވިދާޅުވީ ބައްދަލުވުމެއްގެ މަގްސަދަކީ ހިދުމަތް ހޯދާ މީހުންނާ ގުޅުން ބަދަހިކޮށް، ކުންފުނީގެ އޮޕަރޭޝަނަށް ގެންނަ ބަދަލުތަކާ ކަންކަން ރަނގަޅުކުރުމަށް ހިޔާލު ހޯދުން ކަމަށެވެ.

"މި ބައްދަލުވުމުގެ މައިގަނޑު ބޭނުމަކީ ތިބޭފުޅުންގެ ހިޔާލުތައް އަޑުއަހައި، މި ކުންފުނީގެ މަސައްކަތްތައް ބައްޓަންކުރުމުގައި އެހިޔާލުތައް ބޭނުންކުރުން،" ޝާހިދު ވިދާޅުވި އެވެ.

އެމްޕީއެލް އިން ބުނީ މި އަހަރުތެރޭގައި އެ ކުންފުނީގެ ހިދުމަތާ ގުޅުންހުރި ފަރާތްތަކާ އެކު ސިލްސިލާ ބައްދަލުވުންތަކެއް ބާއްވަން ހަމަޖެހިފައިވާ ކަމަށާއި، ރޭ ބޭއްވި ބައްދަލުވުމަކީ އޭގެތެރެއިން ދެވަނަ ބައްދަލުވުން ކަމަށެވެ.