ހިޔާ ފްލެޓްގައި ގޭސް ގުދަން ކުރާކަށް ނޫޅެން: މޯލްޑިވް ގޭސް

ހިޔާ މަޝްރޫއުގެ ދަށުން އިމާރާތްކޮށްފައިވާ އެއްވެސް ޓަވަރެއްގައި ގޭސް ގުދަން ކުރުމަށް ނޫޅޭ ކަމަށާއި އަދި އެކަން ކުރަން ނުވެސް ވިސްނާ ކަމަށް މޯލްޑިވް ގޭހުން ބުނެފި އެވެ.

މޯލްޑިވް ގޭހުން އެގޮތަށް ބުނެފައި ވަނީ ހިޔާގެ ކޮމާޝަލް ޔުނިޓްތަކެއްގައި އެއީ މޯލްޑިވް ގޭހަށް ގޭސް ސްޓޯރޭޖްކުރުމަށް ދޫކޮށްފައިވާ ތަނެއް ކަމަށް ބުނެ އެޗްޑީސީން ލިޔުމެއް ހަރުކުރި މައްސަލައާ ގުޅިގެން އެތަނުގައި އުޅޭ މީހުން ކަންބޮޑުވުން ފާޅުކުރަމުންދާތީ އެވެ.

ފްލެޓުގައި އުޅޭ މީހުން ދަނީ މީހުން ދިރިއުޅޭ ތަނެއްގައި ގޭސް ރައްކާކުރުމަކީ އެންމެ ރައްކާތެރި ގޮތް ނޫން ކަމަށާއި އެކަން ނުކުރުމަށް ގޮވާލަމުންނެވެ.

މޯލްޑިވް ގޭހުގެ ބިޒްނަސް އެންޑް ޕްރޮޖެކްޓްސް ހެޑް މުހައްމަދު ފައުޒީ، "މިހާރު" އަށް ވިދާޅުވީ މި ވަގުތު ހިޔާގެ ހުރިހާ އެޕާޓްމަންޓެއްގައި ވެސް ބޭނުންކުރަމުންދަނީ ގޭސް ފުޅި ކަމަށާއި އޭގެ ބަދަލުގައި އެޗްޑީސީން ބޭނުންވަނީ ހޮޅި އަޅައިގެން ގޭސް ފޯރުކޮށްދޭން ކަމަށެވެ.

"ގޭސް ޕައިޕްލައިން އެޅީމަ ދެން ވަކި ވަކި އެޕާޓްމަންޓްތަކުގައި ގޭސް ފުޅިއެއް ބޭނުމެއް ނުކުރާނެ. އޭރުން އެ ޕައިޕްލައިނުން އަޅުގަނޑުމެން ހުރިހާ ތަނަކަށް ވެސް ގޭސް ފޯރުކޮށްދޭނީ،" ފައުޒީ ވިދާޅުވި އެވެ.

އޭނާ ވިދާޅުވީ ގޭސް ޕައިޕްލައިން އެޅިޔަސް ގޭސް ފުޅިތައް ބަހައްޓާނެ ސަރަހައްދެއް ވެސް އެކުންފުނިން ބޭނުންވާ ކަމަށެވެ. އެ މަސައްކަތަށް ޕްލޭންކޮށްފައި އޮތީ ހިޔާ ޓަވަރުތަކާ 20 އަކަށް މީޓަރު ދުރުން ތަނެއް ހަަދައި ގޭސް ބެހެއްޓުމަށް ކަމަށް އޭނާ ވިދާޅުވި އެވެ.

"ހިޔާ ފްލެޓްތަކުގެ ކުރިމައްޗަށް އޮންނަ މަގުން ގާތްގަނޑަކަށް 50 ފޫޓުގެ ޖާގައެއްގައި އެކަން ކުރުމަށް ޕްލޭންކޮށްފައި އޮތީ. އެޗްޑީސީން އެކަން ހަމަޖައްސައިދިނީމަ އެ މަސައްކަތްކުރެވޭނެ،" ފައުޒީ ވިދާޅުވި އެވެ.

"ފްލެޓްގައި ގުދަން ކުރަން އުޅެނީއޭ ބައެއް މީހުން އެބުނަނީ އެމީހުންގެ ކަންބޮޑުވުން އޮތީމަ. އެއީ ހަމަ ރަނގަޅު ކަންބޮޑުވުމެއް. އެތަނެއްގައި އުޅޭ ބަޔަކުތާ އެކަމާ ވިސްނާނީ ވެސް. އެކަމަކު އެތަނުގައި ގޭހެއް ނުބައްޓާނަން. އަދި މިހާރު ވެސް ބަހައްޓާފައި ނުހުންނާނެ."

25 ބުރިއަަށް އިމާރާތްކޮށްފައިވާ ހިޔާގެ ގްރައުންޑް ފްލޯގައި ގޭސް ރައްކާކުރަން އުޅޭ ކަމަށް ދެކެވޭ ވާހަކައާ ގުޅިގެން ފަޔާ ސޭފްޓީ ދާއިރާގައި މަސައްކަތްކުރާ ބައެއް މީހުން ވެސް ވަނީ ކަންބޮޑުވުން ފާޅުކޮށްފަ އެވެ. އެހާ އުސް އިމާރާތްތަކެއްގައި އެކަހަލަ ކަމެއް ކުރުމަކީ ނުރައްކާތެރި ކަމެއް ކަމަށް އެމީހުން ބުނެ އެވެ.

މިދިޔަ ނޮވެމްބަރު މަހުގައި ގޭސް ހޮޅި އެޅުމަށް މޯލްޑިވް ގޭހާ ހަވާލުކުރީ މިއަހަރުގެ ދެވަނަ ކުއާޓަރުގައި ނިންމަން ޖެހޭ ގޮތަށެވެ. މި ހިދުމަތް ދިނުމަށް މޯލްޑިވް ގޭސްއާ ހަވާލުކުރީ 20 އަހަރުގެ މުއްދަތަށެވެ.

މިއީ ފްލެޓުތަކަށް ގޭސްފުޅި އަރުވައި ބޭލުމަކީ ރައްކާތެރިކަމަކަށް ނުވާތީ، އަޅާ ހޮޅިތަކެއް ކަމަށާއި މި މަސައްކަތް މޯލްޑިވް ގޭސް އިން ކުރާނީ އެމްއެންޑީއެފްގެ ގަވާއިދުތަކާ އެއްގޮތަށް ކަމަށް އެޗްޑީސީން ބުނެ އެވެ.