ދަރިމައިވުމުގެ މައްސަލަތަކުގެ ފަރުވާއަށް އާސަންދަ ހަމަޖައްސަން ގޮވާލައި ގަރާރެއް ހުށަހަޅައިފި

ދަރިމައިވުމުގެ މައްސަލަތަކަށް އާސަންދަ ސްކީމުން ހަރަދުކޮށްގެން ފަރުވާ ދެވޭނެ ގޮތްތައް ހަމަޖެއްސުމަށް ގޮވާލައި ރައްޔިތުންގެ މަޖިލީހަށް މިއަދު ގަރާރެއް ހުށަހަޅައިފި އެވެ.

ގަލޮޅު ދެކުނު ދާއިރާގެ މެމްބަރު މީކާއިލް ނަސީމް ހުށަހެޅުއްވި ގަރާރުގައި ވިދާޅުވީ ސިއްހީ ހިދުމަތުގެ ގާނޫނުގެ ދަށުން ހުރިހާ ދިވެހިންނަށް ހަމަހަމަކަމާއެކު ރަނގަޅު ފެންވަރުގެ އަސާސީ ސިއްހީ ހިދުމަތް ލިބިގަތުމުގެ ހައްގު ކަށަވަރުކޮށްދޭ ކަމަށެވެ.

ނަމަވެސް، ރާއްޖޭގެ ސިއްހީ ނިޒާމް ބައްޓަންވެފައިވާ ގޮތާއި އާސަންދަ އޮންނަ ގޮތުން، އެ ނިޒާމްގެ އެހީގައި ދަރިމައިވުމުގެ މައްސަލައަށް ބޭސްފަރުވާ ކުރުމުގެ ފުރުސަތުތައް ވަރަށް ހަނި ކަމަށް މީކާއިލް ވިދާޅުވި އެވެ. އޭގެ އިތުރުން، އެ ފަރުވާ ހޯދާ މީހުންނަށް ބޭނުންވާ ބައެއް ބޭސް ރާއްޖެއިން ހޯދުމުގައި ދަތިތައް ހުންނައިރު، ދަރިމައިނުވުމުގެ މައްސަލައާ ގުޅިގެން ދެވޭ ބައެއް އަސާސީ ބޭސް ވެސް އާސަންދައިގެ ދަށުން ނުލިބޭ ކަމަށް އޭނާ ވިދާޅުވި އެވެ.

"ދަރިމައިނުވުމުގެ މައްސަލައަށް ހާއްސަކުރެވިފައިވާ ސްޕެޝަލިސްޓުންގެ ހިދުމަތް ހޯދުން ރާއްޖޭގައި އިންތިހާއަށް ދަތިވެފައި މި މައިގަނޑު މައްސަލައާ ގުޅޭ އެއްވެސް ރަނގަޅު ފެންވަރުގެ ދިރާސާއެއް ނުވަތަ ތަފާސް ހިސާބެއް ނެތް،" ގަރާރުގައި ވެ އެވެ.

އެހެންވެ، މީކާއިލް ހުށަހެޅުއްވި ގަރާރުގައި ވަނީ ދަރިމަރިވުމުގެ މައްސަލަތަކާ ގުޅޭ ގައުމީ ފެންވަރުގެ ދިރާސާއެއް ހަދައި، ދަރިމައިވުމުގެ މައްސަލައަށް ބޭނުންކުރާ ބައެއް އަސާސީ ބޭސްތައް ރާއްޖެއިން ފަސޭހައިން ލިބޭނެ މަގު ތަނަވަސްކޮށްދިނުމަށެވެ.

ކުރިއަށް އޮތް ތަނުގައި ދަރިމައިވުމުގެ މައްސަލައަށް ބޭސްކުރާ މީހުންނަށް އާސަންދައިގެ ދަށުން ދެވޭނެ ހިދުމަތްތަކަކީ ކޮބައިތޯ ބަލައި ހިދުމަތްތައް ފޯރުކޮށްދެވޭނެ ހަރުދަނާ އުސޫލެއް އަދި މިންގަނޑެއް ކަނޑައަޅައި އެ މުހިއްމު މައްސަލައަށް ރާއްޖޭގެ އިގުތިސޯދީ ފެންވަރުގައި އެކަށީގެންވާ ޖުމްލަ ހައްލެއް ހޯދައިދިނުމަށް އޭނާ ގޮވައިލެއްވި އެވެ.

ދަރިމައިވުމުގައި މައްސަލަ ދިމާވާ ނަމަ އެކަމަށް ދެން އޮތް ފަރުވާއަކީ އައިޔޫއައި އަދި އައިވީއެފް މެދުވެރިކޮށް ދަރިން ހޯދުމެވެ. އޭގެ ތެރެއިން ރާއްޖޭގައި މި ވަގުތު ލިބެނީ އައިޔޫއައި ފަރުވާ އެކަންޏެވެ. އެހެންވެ، އައިވީއެފް ހަދަންޖެހޭ މީހުން ބޮޑު ހަރަދެއް ކޮށްގެން ޖެހެނީ ރާއްޖެއިން ބޭރުން ފަރުވާ ހޯދާށެވެ.

އެ މައްސަލައާ ގުޅޭ ރަސްމީ އެއްވެސް ތަފާސްހިސާބެއް ނެތް ނަމަވެސް، އެކި ފަރާތްތަކުން ލިބޭ މައުލޫމާތުން އިނގެނީ ދަރިން ނުލިބުމުގެ މައްސަލަ ރާއްޖޭގައި ގިނަ ކަމެވެ.

ފަރުވާއަށް އާސަންދަ ނުދޭ މައްސަލައާ ގުޅިގެން އެ ކުންފުނީގެ ޖެނެރަލް މެނޭޖަރު އާމިނަތު ޒީނިޔާ މިދިޔަ ސެޕްޓެމްބަރު މަހު "މިހާރު" އަށް ވިދާޅުވި ގޮތުގައި ދަރިމައިވުމުގެ މައްސަލަތަކަށް އާސަންދަ ނުލިބޭތީ އާއްމުންގެ ޝަކުވާ ކޮންމެ ވެސް ވަރަަކަށް ލިބެ އެވެ. އެ ކަންކަމާ ގުޅިގެން އާސަންދައިގެ އެކި ލެވެލްގައި އެތައް މަޝްވަރާއެއް ކުރިއަސް އެއްވެސް ކަމެއް އަދި ބަދަލު ނުވާ ކަމަށް އޭނާ ވިދާޅުވި އެވެ.

"މަޝްވަރާކުރަން އޭގެއިން ކޮންމެ ވެސް ބައެއް ނަމަވެސް، ހެދޭ ޓެސްޓުތައް ނަމަވެސް ކޮންމެ ވެސް ބައެއް އާސަންދަ ތެރެއިން ކަވަ ކުރެވިދާނެތޯ ބަލަން. އެކަމަކު، މި ބުނާހެން އެ ގަވައިދު އިސްލާހުކޮށްގެން އެކަމެއް ކުރެވޭނީ. އެނގޭ ވަރަށް ގިނަ މީހުންގެ ހުންނަ މައްސަލައެއް ރާއްޖޭގައި،" ޒީނިޔާ ވިދާޅުވި އެވެ. "ފުދޭ ވަރަކަށް ގިނަ މީހުން އެބަ އުޅޭ އޭގެތެރޭގައި. އެޓްލީސްޓް އޭގެ ތެރެއިން ކޮންމެ ވެސް ބައެއް ކަވާކޮށްދޭން ރަނގަޅުކަން އަޅުގަނޑުމެން ފާހަގަކުރަން."