ކޮއްކޮގެ ފިހާރައިން 180ރ. ވަގަށް ނެގުމުން 14،000ރ. އިން ޖޫރިމަނާ

ކޮއްކޮގެ ފިހާރައިން 180ރ. ވަގަށް ނެގި މީހަކު 14،000ރ. އިން ޖޫރިމަނާކުރަން ކްރިމިނަލް ކޯޓުން ހުކުމްކޮށްފި އެވެ.

ރ. ހުޅުދުއްފާރުގައި ސެޕްޓެމްބަރު، 2020 ގައި މީހަކު ފިހާރައެއްގެ ވަތްގަނޑުން 180ރ. ނެގީ ދުވާލު ވަގުތުގަ އެވެ. ކޯޓުގައި އޭނާ ބުނެފައިވަނީ އެ ފިހާރަ އަކީ ކޮއްކޮގެ ފިހާރައެއް ކަމަށެވެ.

ފިހާރައިން ފައިސާ ނެގީ އެދުވަސްވަރު ކޮއްކޮއާ ޖެހުނު މައްސަލައެއްގައި ކަމަށް އޭނާ ބުނެފައިވެ އެވެ. ލުއި އަދަބެއް ދޭން އޭނާ އެދިފައިވާތީ ކޯޓުން މިދިޔަ ހަފުތާގައި ކުރި ހުކުމުގައި ނިންމީ އޭނާގެ އަދަބު ޖޫރިމަނާއަކަށް ބަދަލު ކުރުމަށެވެ.

ގާނޫނުލް އުގޫބާތުގެ ދަށުން އެ ކުށުގެ އަސާސީ އަދަބަކީ ދެ މަހާއި 12 ދުވަހަށް ޖަލަށްލުމެވެ. އެ އަދަބު ޖޫރިމަނާއަށް ބަދަލު ކުރުމުން ޖެހެނީ 14،400ރ. އެވެ. އެ ފައިސާ ތިން މަސް ތެރޭގައި މީރާއަށް ދައްކަން އެ ހުކުމުގައި އަންގާފައިވެ އެވެ.