ޗޮކްލެޓެއް ވަގަށް ނެގި މީހަކު 15 ދުވަހަށް ބަންދުކޮށްފި

މާލޭގެ ފިހާރައަކުން ޗޮކްލެޓެއް ވަގަށް ނަގަން އުޅުނު މައްސަލައެއްގައި ހައްޔަރުކުރި މީހަކު ތަހުގީގަށް 15 ދުވަހަށް ބަންދު ކުރަން ކްރިމިނަލް ކޯޓުން އަންގައިފި އެވެ.

އުމުރުން 59 އަހަރުގެ އެ މީހާގެ ބަންދުކުރަން ކޯޓުން ކުރި އަމުރުގައި ބުނީ އޭނާ ކުށްކުރި ކަމަށް ތުހުމަތުވާ ވަރަށް ކޮންމެެވެސް ވަރަކަށް ހެކި ހުށަހަޅާފައިވާ ކަމަށެވެ. ގދ. ގައްދު އަށް އުފަން އެ ފިރިހެންމީހާ ބަންދުން ދޫކޮށްލައިފި ނަމަ މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެތީ އާއި ޝަރީއަތް ކުރުމާ ބެހޭ ޖިނާއީ އިޖުރާއަތުގެ ގަވާއިދުގައި ހުރި ކަންކަން ފުރިހަމަވާތީ ބަންދުކުރަން ނިންމީ ކަމަށް ބުންޏެވެ.

އެ އަމުރުގައިވާ ގޮތުން، ފެންޓަސީ ސްޓޯރުން ޗޮކްލެޓެއް ވަގަށް ނެގި މީހަކު ހިފަހައްޓާފައިވާ ކަމަށް ފުލުހުންނަށް ލިބުނު މައުލޫމަތަކާ ގުޅިގެން ފުލުހުން ސީނަށް ދިއުމުން ފިހާރައިގެ އެޗްއާރުން ވަނީ ފުލުހުންނާ ބައްދަލުކޮށް، އެ ފިހާރައިގެ ސީސީޓީވީ ކެމެރާ އިން ފެނުނު މައުލޫމާތު ހިއްސާކޮށްފަ އެވެ. ސީސީޓީވީ ކެމެރާ އިން ފެންނަނީ ޗޮކްލެޓެއް ވަގަށް ނަގައި، ޖީބަށް ލައިގެން އެ މީހާ ފިހާރައިން ނުކުމެގެން ދާން އުޅޭ ތަނެވެ.

އެ މީހާ ހިފަހައްޓައި ޗޮކްލެޓް ވަގަށް ނަގައިގެން ދާން އުޅެނީތޯ ސުވާލު ކުރުމުން އެކަމަށް އޭނާ އެއްބަސްވެފައިވާ ކަމަށް ފުލުހުންގެ ހާދިސާ ރިޕޯޓުގައިވާ ކަމަށް އަމުރުގައި ވެ އެވެ.

ކްރިމިނަލް ކޯޓުން ބުނިގޮތުގައި އޭނާގެ ބަންދުގެ ލޮގަށް ބަލާއިރު ކުށުގެ ތުހުމަތުގައި 29 ފަހަރަކު ހައްޔަރު ކޮށްފައިވެ އެވެ. އޭގެ ތެރެއިން 18 ފަހަރު ބަންދަށް ބަދަލުކުރި އެވެ. އެ މީހާ ކޮށްފައިވާ ކުށްތަކުގެ ތެރޭގައި ވައްކަމުގެ މައްސަލަތައް ހިމެނޭ ކަމަށް ވެސް ކޯޓު އަމުރުފައިވެ އެވެ.