ފަށް ފޭރުނު މީހާގެ ބަންދަށް 15 ދުވަސް، އިއުތިރާފުވި ނަމަވެސް ބުނީ ފަށް ނެތް ކަމަށް

މާލޭ އަލިކިލޭގެފާނު މަގުން ސައިކަލް ދުއްވާފައި ދިޔަ އަންހެނެއްގެ ކަރުގައި އޮތް ފަށެއް ޖަހައިގަތް މައްސަލާގައި ހައްޔަރުކުރި މީހާގެ ބަންދަށް 15 ދުވަސް ޖަހައިފި އެވެ.

މި މަހުގެ 19 ވަނަ ދުވަހު ހިނގި މި ހާދިސާއާ ގުޅިގެން ހައްޔަރުކުރީ ވިލިމާލޭ، ފިޔަބަރި، ހަސަން އިސާމް، 30، އެވެ.

އެ ދުވަހު އޭނާ ހައްޔަރުކޮށް ބަންދަށް ކޯޓުން ވަނީ ހަތް ދުވަސް ޖަހައިފަ އެވެ. އެކަމަކު އޭރު އޭނާ ކޯޓަށް ހާޒިރުކޮށް ބަންދުގެ މުއްދަތު ޖެހީ ތޫނު ހަތިޔާރު ގެންގުޅުމުގެ މައްސަލައެއްގަ އެވެ.

ކޯޓު އަމުރުގައި ވާ ގޮތުން އެއީ ފޭރުމުގެ މައްސަލައާ ގުޅިގެން ފުލުހުން އޭނާ ހައްޔަރުކޮށް ބަލާ ފާސްކުރިއިރު، އޭނާގެ އަތުން ދެ އިންޗި ވަޅިއެއް ފެނުމާ ގުޅިގެން ކުރި ތުހުމަތެކެވެ.

މި މަހުގެ 20 ގައި އޭނާ ކޯޓަށް ހާޒިރުކުރީ ފޭރުމުގެ ތުހުމަތުގައި ނަމަވެސް، ފޭރުމުގެ ހާދިސާ ހިނގި ތަނެއް، ހިނގި ގޮތެއް އަދި ތުހުމަތު ކުރެވޭ ސަބަބު އެނގޭނެ އެއްވެސް ހެއްކެއް ހުށަަހަޅާފައި ނުވާ ކަމަށް ކްރިމިނަލް ކޯޓުގެ ބަންދު އަމުރުގައިވެ އެވެ.

އޭނާގެ ހަތް ދުވަހުގެ ބަންދުގެ މުއްދަތު ހަމަވާތީ އިއްޔެ ކޯޓަށް ހާޒިރުކުރުމުން ފުލުހުން ވަނީ ފޭރުމުގެ މައްސަލާގެ ހެކީގެ ގޮތުގައި ފުލުހުންގެ ބަޔާނާއި ސީސީޓީވީ ވީޑިއޯގެ ސްނެޕްޝޮޓެއް ހުށަހަޅައިފަ އެވެ.

އޭނާ ވަނީ އަންހެން މީހާގެ ކަރުގައި އޮތް ރަން ފަށް ފޭރުނު ކަމަށް އިއްޔެ ކޯޓުގައި އެއްބަސްވެފަ އެވެ. އެހެން ނަމަވެސް، އޭނާގެ އަތުގައި އެ ފަށް ނެތް ކަމަށާއި މައްސަލާގައި ގެއްލުން ލިބުނު މީހާއަށް ބަދަލު ދޭނެ ކަމަށް ވެސް އޭނާ ބުނެފައިވެ އެވެ.

ހަސަން އިސާމަކީ ގިނަ އަދަދެއްގެ ކުށުގެ ރެކޯޑު އޮތް މީހެކެވެ.

ސޯޝަލް މީޑިއާގައި ދައުރުވި ވީޑިއޯއަކުން ފެންނަ ގޮތުގައި، އަންހެނަކު ސައިކަލް ދުއްވާފައި ދަނިކޮށް އޭނާގެ ފަހަތުން އައިސް ކަރުގައި އޮތް ފަށް އިސާމު ޖަހައިގަނެވެ. ފަށް ޖަހައިގަތުމުން އަންހެން މީހާ އެ ވަގުތު ހުރީ ގޮތް ހުސްވެ، ޝޮކެއްގަ އެވެ. އިސާމްގެ ކިބައިން ސަލާމަތްވާން ސައިކަލް ވެސް ވައްޓާލާފައި އޭނާ ދުއްވައިގަނެވެ.

ފަށް ޖަހައިގަނެފައި، އިސާމް ސައިކަލް މަޑުކޮށް، ދެވަނަ ފަހަރަށް އަންހެން މީހާއާ ދިމާލަށް ދުއްވައިގަނެ އެވެ. އޭނާ ދެން އުޅުނީ އަންހެން މީހާގެ އަތުގައި އޮތް އަތްދަބަސް ޖަހައިގަތުމަށް ކަމަށް ބެލެވެ އެވެ.

ހަމަލާ ދޭން މަސައްކަތް ކުރަމުން އަންހެން މީހާގެ ފަހަތުން ދުވެފައި ގޮސް އޭނާ ޕޭވްމަންޓު މައްޗަށް އެރި ނަމަވެސް އެ ސަރަހައްދަށް މީހުން ގިނަ ވާން ފެށުމުން އިސާމް ވަނީ ސައިކަލަށް އަރައިގެން އަވަހަށް އެތަނުން ފިލައިފަ އެވެ.

މަގުމަތިން ފަށް ފޭރިގަތް އިރު، އިސާމް ހުރީ މޫނު ފޮރުވަން ހެލްމެޓް ވެސް އަޅައިގެންނެވެ.