ކަރުގައި އޮތް ފަށް ޖަހައިގަތް މީހާގެ ބަންދަށް ހަތް ދުވަސް

މާލޭ އަލިކިލޭގެފާނު މަގުން ސައިކަލް ދުއްވާފައި ދިޔަ އަންހެނެއްގެ ކަރުގައި އޮތް ފަށެއް ޖަހައިގަތް މައްސަލާގައި ހައްޔަރުކުރި މީހާގެ ބަންދަށް ކޯޓުން ހަތް ދުވަސް މިއަދު ދީފި އެވެ.

އިއްޔެ ހިނގި އެ ހާދިސާއާ ގުޅިގެން ހައްޔަރުކުރީ ވިލިމާލޭ، ފިޔަބަރި، ހަސަން އިސާމް، 30 އެވެ.

ފުލުހުން ދެންމެ ބުނީ އޭނާގެ ބަންދާ މެދުގައި ގޮތެއް ނިންމުމަށް ކްރިމިނަލް ކޯޓަށް ގެންދިއުމުން ހަތް ދުވަހަށް އޭނާ ބަންދުކުރުމަށް އަމުރުކޮށްފައިވާ ކަމަށެވެ.

ސޯޝަލް މީޑިއާގައި ދައުރުވަމުން އަންނަ ވީޑިއޯއަކުން ފެންނަ ގޮތުގައި، އަންހެނަކު ސައިކަލް ދުއްވާފައި ދަނިކޮށް އޭނާގެ ކަރުގައި އޮތް ފަށް ޖަހައިގަންނަނީ، އޭނާގެ ފަހަތުން އައި ސައިކަލެއްގައި އިން ފިރިހެނެކެވެ. ފަށް ޖަހައިގަތުމުން އަންހެން މީހާ އެ ވަގުތު ހުރީ ގޮތް ހުސްވެ، ޝޮކެއްގަ އެވެ. ފިރިހެން މީހާގެ ކިބައިން ސަލާމަތްވުމަށް ސައިކަލް ވެސް ވައްޓާލާފައި އޭނާ ދުއްވައިގަނެވެ.

ފިރިހެން މީހާ ހުރީ އޭނާގެ މޫނު ފޮރުވަން ހެލްމެޓް ވެސް އަޅައިގެންނެވެ.

ފަށް ޖަހައިގަނެފައި، ފިރިހެން މީހާ ސައިކަލް މަޑުކޮށް، ދެވަނަ ފަހަރަށް އަންހެން މީހާއާ ދިމާލަށް ދުއްވައިގަނެ އެވެ. އޭނާ ދެން އުޅުނީ އަންހެން މީހާގެ އަތުގައި އޮތް އަތްދަބަސް ޖަހައިގަތުމަށް ކަމަށް ބެލެވެ އެވެ.

ހަމަލާ ދޭން މަސައްކަތް ކުރަމުން އަންހެން މީހާގެ ފަހަތުން ދުވެފައި ގޮސް އޭނާ ޕޭވްމަންޓު މައްޗަށް އެރި ނަމަވެސް އެ ސަރަހައްދަށް މީހުން ގިނަ ވާން ފެށުމުން ވަނީ ސައިކަލަށް އަރައިގެން އަވަހަށް އެތަނުން ފިލައިފަ އެވެ.