ތަކުރާރުކޮށް ކުށްކުރާ ޒުވާނަކު 92 ވަނަ ފަހަރަށް ހައްޔަރުކޮށް ބަންދަށް މަސް ދުވަސް ދީފި

ތަކުރާރުކޮށް ކުށްކުރާ ޒުވާނަކު ވައްކަމުގެ މައްސަލައެއްގައި އިއްޔެ 92 ވަނަ ފަހަރަށް ހައްޔަރުކޮށް ކޯޓަށް ހާޒިރުކުރުމުން ތަހުގީގަށް 30 ދުވަހު ބަންދުގައި ބަހައްޓަން އަމުރުކޮށްފި އެވެ.

ކޯޓު އަމުރުގައިވާ ގޮތުން، އުމުރުން 33 އަހަރުގެ މި މީހާ ވައްކަމުގެ މައްސަލައެއްގައި ހައްޔަރުކޮށް ފުލުހުން ވަނީ ވައްކަން ކުރަނިކޮށް ފެންނަ ސީސީޓީވީ ފުޓޭޖް ވެސް ހެކީގެ ގޮތުގައި ހުށަހަޅައިފަ އެވެ. އެހެންވެ ވައްކަން ކުރިކަމުގެ އެކަށީގެންވާ ހެކި ހުށަހަޅާފައިވާ ކަމަށް ބަލައި ބަންދަށް 30 ދުވަސް ދިނީ އޭނާގެ ސަބަބުން މުޖުތަމައުގެ ސަލާމަތަށް ނުރައްކާ އޮތް ކަމަށް ފެންނާތީ ކަމަށް ގާޒީ އިބްރާހިމް އިހްސާން ނެރުއްވި އަމުރުގައިވެ އެވެ.

މި މައްސަލާގައި ހިމެނޭ މީހާ ކުރި ވައްކަމުގެ ތަފްސީލެއް ހާމަކޮށްފައެއް ނުވެ އެވެ.

އުމުރުން 33 އަހަރުގައި 92 ފަހަރު ހައްޔަރުކޮށްފައިވާ ނަމަ އޭނާގެ އުމުރުން 18 އަހަރުވީ ފަހުން އެވްރެޖްކޮށް ކޮންމެ 60 ދުވަހަކުން ކޮންމެވެސް މައްސަލައެއްގައި ހައްޔަރުކޮށްފައިވާނެ އެވެ. އެކަމަކު އޭނާ ދޫވެފައި ހުންނަނީ ކުށެއް ސާބިތު ނުވާތީ ކަމެއް ނުވަަތަ ހުކުމެއްގައި ހުއްޓާ ބަންދުން ދޫވެގެންކަމެއް ނޭނގެ އެވެ.

މި މަހު ކުރީކޮޅު، އުމުރުން 29 އަހަރުގެ މީހަކު 78 ވަނަ ފަހަރަށް އަދި އުމުރުން 41 އަހަރުގެ މީހަކު 59 ފަހަރަށް ހައްޔަރުކޮށް ކޯޓުން ބަންދުގެ މުއްދަތު ދީފައިވެ އެވެ. މިގޮތަށް ތަކުރާރުކޮށް ހައްޔަރުކުރާ މީހުންގެ ތެރޭގައި ގިނައީ މަސްތުވާތަކެތި ބޭނުންކުރާ މީހުންނެވެ. އެ މީހުން ގިނައިން ހައްޔަރުކުރަނީ މަސްތުވާތަކެތި ގެންގުޅުމާއި ބޭނުންކުރުން އަދި މަސްތުވާތަކެތި ހޯދަން ފައިސާގެ ބޭނުމުގައި ތަކުރާރުކޮށް ކުރާ ވައްކަމާއި ފޭރުމުގެ ކުށްތަކުގަ އެވެ.