ފިރިހެނަކު މޫނުބުރުގާ އަޅައިގެން ފިހާރައަކަށް ވަދެ އަގުބޮޑު ގަޑިއެއް ވަގަށް ނެގި މައްސަލައެއްގައި ބަންދަށް

އަންހެނެއް ގޮތަށް ހެދުން އަޅައިގެން ފިހާރައަކަށް ވަދެ އަގު ބޮޑު ގަޑިއެއް ވަގަށް ނެގި މީހަކު ހައްޔަރުކޮށް، 15 ދުވަހަށް އިއްޔެ ބަންދުކޮށްފި އެވެ.

އުމުރުން 47 އަހަރުގެ މީހާ ހައްޔަރުކުރީ ފިހާރައަކުން 67،500ރ. ގެ "އޮމެގާ" ބްރޭންޑުގެ ގަޑިއެއް ވަގަށް ނެގި ކަމުގެ ތުހުމުތުގަ އެވެ.

ފުލުހުން ބުނެފައިވާ ގޮތުގައި އޭނާ ގަޑި ވަގަށް ނެގީ ސިފަ ނޭނގޭ ގޮތަށް މޫނު ބުރުގާ އަޅައިގެން ފިހާރަތެރެއަށް ވަދެ އެވެ. އެ މަންޒަރު ފިހާރައިގެ ސީސީޓީވީ ފުޓޭޖަށް ވަނީ އަރައިފަ އެވެ.

އެކަމަކު، ވަގަށް ނެގި ގަޑި އަދި ހޯދިފައެއް ނުވެ އެވެ. ބެލެވޭ ގޮތުގައި ގަޑި ވަނީ އެހެން މީހަކަށް ވިއްކާލާފައި ކަމަށް ފުލުހުން ބުންޏެވެ.

ގަޑި ނެގި މީހާއަކީ މިދިޔަ އަހަރެއްހާ ދުވަސް ތެރޭގައި ޖިނާއީ ގިނަ ހައްޔަރު ރެކޯޑް އޮތް މީހެކެވެ. އޭގެ ތެރޭގައި މަސްތުވާތަކެތި ވިއްކުމާއި ގަތުން އަދި ބޭނުން ކުރުމާއި ކައުންޓަފީޓް ފައިސާ ގެންގުޅުމާއި ސައިކަލް ވަގަށް ނެގުމާއި ހަތިޔާރު ބޭނުންކޮށްގެން ފޭރުމާއި ފިހާރަތަކުން ވައްކަން ކުރުން ހިމެނެ އެވެ.

އެހެންވެ ކްރިމިނަލް ކޯޓުން ވަނީ އޭނާ ބަންދުން ދޫކޮށްލައިފި ނަމަ މުޖުތަމައުގެ ސަލާމަތަށް ނުރައްކާވެ ކަަމަށް ކަނޑައަޅައި، 15 ދުވަހަށް ބަންދު ކުރަން އަމުރުކޮށްފަ އެވެ.