ޖަރުމަނުގައި ޕަބްލިކް ޓްރާންސްޕޯޓަށް މަހަކު އެންމެ 9.50 ޑޮލަރު!

ޖަރުމަނުގައި ޕަބްލިކް ޓްރާންސްޕޯޓް ބޭނުންކުރާ މީހުން ކޮންމެ މަހަކު އެންމެ 9.50 ޑޮލަރު ދައްކަން ޖެހޭ ގޮތަށް ހަދައިފި އެވެ.

އެ ގައުމުގެ ސަރުކާރުން ބުނީ ކިތައްމެ ގިނަ ތާކަށް ދަތުރުކުރިޔަސް، ޕަބްލިކް ޓްރާންސްޕޯޓް ބޭނުންކުރާ ނަމަ ކޮންމެ މަހަކު ވެސް ދައްކަން ޖެހޭނީ ހަމަ އެވަރުގެ ފީއެއް ކަމަށެވެ. އެއީ އެ ގައުމުގައި ޕަބްލިކް ޓްރާންސްޕޯޓް ބޭނުންކުރަން މީހުން ބޮޑަށް ޝައުގުވެރިކުރުވުމުގެ ގޮތުން ފެށި ޕްރޮޖެކްޓެކެވެ.

އަންނަ މަހު އެ އަގުގައި ހިދުމަތް ފަށާއިރު، އެކަމަށް ހާއްސަ ކާޑެއް ވެސް ތައާރަފުކޮށްފައިވެ އެވެ.

ޖަރުމަނުގެ މީޑިއާ ރިޕޯޓްތައް ބުނި ގޮތުގައި، ރޭލު، ބަސް އަދި ޓްރެމްސްގައި އެ ގައުމުގެ އެތެރޭގައި ކުރާ ހުރިހާ ދަތުރުތަކަށް ވެސް އެ ކާޑު ބޭނުންކުރެވޭނެ އެވެ. އެކަމަކު ރޭލު، ބަސް އަދި ޓްރެމްސްގައި އެ ގައުމުން ބޭރަށް ކުރާ ދަތުރުތަކަށް އެ ކާޑު ބޭނުމެއް ނުކުރެވޭނެ އެވެ.

އެ ގައުމުގެ ސަރުކާރުން ފަށައިގެން އުޅޭ ހަކަތަ ބޭނުންކުރާ މިންވަރު މަދުކުރާ ޕްރޮގްރާމްގެ ދަށުން ހިންގާ އެ ޕްރޮޖެކްޓް ކުރިއަށް ގެންދާނީ އަންނަ މަހުން ފެށިގެން އޮގަސްޓް މަހުގެ ނިޔަލަށެވެ. އެ ޕްރޮޖެކްޓަށް ޖަރުމަނުގެ ސަރުކާރުން ވަނީ 2.6 ބިލިއަން ޑޮލަރުގެ ބަޖެޓެއް ހަމަޖައްސައިފަ އެވެ.

ޖަރުނަމުގެ ރައްޔިތުންގެ އިތުރުން، އެ ގައުމަށް ދާ ޓޫރިސްޓުންނަށް ވެސް އެ ކާޑު ބޭނުންކުރެވޭނެ އެވެ.

އެ ކާޑު ގަނެވޭނީ ޖަރުމަނުގެ ގައުމީ ރެއިލްވޭގެ ވެބްސައިޓުންނެވެ. އެ ވިއްކަން ފަށާނީ އަންނަ ހޯމަ ދުވަހު އެވެ.