އީދު ބަންދުގެ ބައެއް ދުވަސްތަކުގައި އައިޖީއެމްއެޗްގެ އޯޕީޑީ ބަންދު

ކުރިއަށް އޮތް ފިތުރު އީދުގެ ބަންދު ދުވަސްތަކާ ދިމާކޮށް، އައިޖީއެމްއެޗްގެ އޯޕީޑީގެ ހިދުމަތް މެދުކަނޑާލަން މިއަދު ނިންމައިފި އެވެ.

އެ ތަނުން ކުރި އިއުލާނެއްގައި ބުނީ، ފިތުރު އީދާއި މޭ 1 ގައި ފާހަގަކުރާ ބައިނަލްއަގްވާމީ މަސައްކަތްތެރިންގެ ދުވަހާ ގުޅިގެން އެ ހޮސްޕިޓަލުގެ ސްޕެޝަލިސްޓް އޯޕީޑީ އަދި އެހެނިހެން ކްލިނިކަލް ހިދުމަތްތައް ވެސް ބައެއް ދުވަސްތަކުގައި ބަންދުވާނެ ކަމަށެވެ. ނަމަވެސް އައިޕީޑީ އާއި އިމަޖެންސީ ހިދުމަތް އެ ދުވަސްތަކުގައި ވެސް ލިބޭނެ އެވެ.

އޯޕީޑީ ބަންދު ވާނީ އަންނަ އާދިއްތަ ދުވަހާއި ހޯމަ ދުވަސް އަދި ބުރާސްފަތި ދުވަހު އެވެ. އެކަމަކު، އަންގާރަ ދުވަހާއި ބުދަ ދުވަހުގެ ހެނދުނު 9 އިން ހަވީރު 4 އަށް އެ ހިދުމަތްތައް ލިބޭނެ އެވެ.

ކަލަންޑަރުގައިވާ ގޮތުން ފިތުރު އީދު ވަނީ އަންނަ ހޯމަ ދުވަހަށެވެ. މި އަހަރުގެ އީދަށް، މާދަމާ އިން ފެށިގެން ހަފުތާއެއްގެ ޗުއްޓީއެއް ލިބެ އެވެ.