މަހެއް ނުވަނީސް ސީއެންއެން ޕްލަސް ހުއްޓާލަނީ

އެމެރިކާގެ މަޝްހޫރު ނިއުސް ނެޓްވޯކް ސީއެންއެން އިން މިދިޔަ މަހު ލޯންޗުކުރި ސްޓްރީމިން ސާވިސް ކަމަށްވާ ސީއެންއެން ޕްލަސް ހުއްޓާލަން ނިންމައިފި އެވެ.

ސީއެންއެން ޕްލަސްގެ ހިދުމަތް ފެށީ މިދިޔަ މަހު 29 ގަ އެވެ. މަހެއް ނުވަނީސް ސީއެންއެން ޕްލަސް ހުއްޓާލަން ނިންމާފައިވާއިރު، މި މަހު 30 އިން ފެށިގެން އެ ހިދުމަތް ނުލިބޭނެ އެވެ.

އެ ހިދުމަތް ހުއްޓާލަން ނިންމާފައިވާކަން އެންގީ ސީއެންއެންގެ ސީއީއޯ ކްރިސް ލިޗް، އެތަނުގެ މުވައްޒަފުންނަށް ފޮނުވި ސިޓީއެއްގަ އެވެ. މީީޑިއާ ރިޕޯޓްތައް ބުނާ ގޮތުގައި އެ ހިދުމަތް ހުއްޓާލަން ޖެހުނީ، ސީއެންއެން ހިމެނޭ ގޮތަށް މި އަހަރު ތައާރަފުކުރަން އުޅޭ ވޯނާ ބްރޯސް ޑިސްކަވަރީގެ ހިދުމަތުގެ ސަބަބުންނެވެ.

ސީއެންއެން ޕްލަސް ހުއްޓާލާތީ އެތަނުގައި މަސައްކަތްކުރާ މުވައްޒަފުންނަށް، ޖާގަ ހުރިވަރަކުން ސީއެންއެންގެ އެހެން ޑިޕާޓްމަންޓްތަކުން ވަޒީފާ ދޭން ނިންމާފައިވެ އެވެ. އަދި އެ ފުރުސަތު ނުލިބިއްޖެ ނަމަ، ހަ މަހުގެ މުސާރަ ދިނުމަށް ފަހު މުވައްޒަފުން ވަޒީފާއިން ވަކިކުރާ ގޮތަށް ވެސް ވަނީ ނިންމައިފަ އެވެ.

މީގެ ކުރިން ވެސް ވަރަށް ގިނަ ސްޓްރީމިން ޕްލެޓްފޯމުތައް ވަނީ ފެށިތާ ކައިރީގައި ހުއްޓާލަން ޖެހިފަ އެވެ. އެކަމަކު މިހާތަނަށް އެންމެ އަވަހަށް ހުއްޓާލަން ޖެހުނީ ސީއެންއެން ޕްލަސް އެވެ. އެ ހިދުމަތް ފަށަން ސީއެންއެން އިން 100 މިލިއަން ޑޮލަރު ހޭދަކުރި އެވެ.