ނެޓްފްލިކްސްގެ ފީތައް އަނެއްކާވެސް ބޮޑުކުރަނީ

ނެޓްފްލިކްސްގެ ސަބްސްކްރިޕްޝަން ފީތައް ބައެއް ގައުމުތަކުގައި އަނެއްކާވެސް ބޮޑުކުރަން ނިންމައިފި އެވެ.

ނެޓްފްލިކްސްގެ ފީތައް ބޮޑުކުރަން ނިންމީ މިދިޔަ އަހަރުގެ ފަހު ކުއާޓާގައި އެ ސްޓްރީމިން ޕްލެޓްފޯމަށް 19 މިލިއަނަށް ވުރެ ގިނަ އާ ސަބްސްކްރައިބާސް ލިބިފައި ވަނިކޮށެވެ. އެއީ ނެޓްފްލިކްސް އިން އުއްމީދުކުރި ވަރަށް ވުރެ ވެސް ބޮޑު އަދަދެކެވެ.

ނެޓްފްލިކްސް އިން ބުނީ ފީތައް ބޮޑުކުރަން ނިންމާފައި ވަނީ އެމެރިކާ އާއި ކެނެޑާ އާއި އާޖެންޓީނާ އަދި ޕޯޗުގަލްގައި ކަމަށެވެ.

ފީތައް ބޮޑުކުރަނީ ނެޓްފްލިކްސް އިން ގެނެސްދޭ ކޮންޓެންޓް އިތުރަށް ރަނގަޅުކުރުމަށް ކުރާ ހަރަދު އިތުރުކުރުމުގެ ގޮތުން ކަމަށް ވެސް އެ ކުންފުނިން ބުންޏެވެ.

ނެޓްފްލިކްސްގެ އިޝްތިހާރު ނުހިމެނޭ ސްޓޭންޑާޑް ސަބްސްކްރިޕްޝަން ޕެކޭޖު ވެސް ހިމެނޭ ގޮތަށް ގިނަ ޕެކޭޖުތަކުގެ އަގު ބޮޑުކުރަން ވަނީ ނިންމައިފަ އެވެ. މި ބަދަލާ އެކު، ކުރިން މަހަކު 15.49 ޑޮލަރަށް ކުރިން ލިބުނު އިޝްތިހާރު ނުހިމެނޭ ސްޓޭންޑާޑް ސަބްސްކްރިޕްޝަން ޕެކޭޖުގެ އަގު 17.99 ޑޮލަރަށް އަރާނެ އެވެ. އަދި އިޝްތިހާރު ހިމެނޭ ޕެޖޭކުގެ އަގު 7.99 ޑޮލަރަށް ބޮޑުވާނެ އެވެ.

މިދިޔަ އަހަރުގެ ފަހު ކުއާޓާގައި ނެޓްފްލިކްސްގެ ސަބްސްކްރައިބާސްގެ އެހާ ބޮޑަށް އިތުރުވީ އެ ޕްލެޓްފޯމުން ގެނެސްދިން ދެކުނު ކޮރެއާގެ މަގުބޫލު ޑްރާމާ "ސްކުއިޑް ގޭމް" ގެ ދެވަނަ ސީޒަނާއި އިންފްލުއެންސާ އަދި ފައިޓަރެއް ކަމަށްވާ ޖޭކް ޕޯލް އާއި ކުރީގެ ވޯލްޑް ހެވީވެއިޓް ޗެމްޕިއަން މައިކް ޓައިސަންއާ ދެމެދުގައި ބޭއްވި ބޮކްސިން މެޗަށް ލިބުނު ތަރުހީބު ބޮޑުވުމުން ކަމަށް ބެލެވެ އެވެ.

ނެޓްފްލިކްސްގެ ސަބްސްކްރިޕްޝަން ފީތައް އެންމެހުން ބޮޑުކުރީ 2023 ވަނަ އަހަރު އޮކްޓޯބަރުގަ އެވެ.