އިޒްރޭލުން ގާޒާ އަށް މިސައިލް ހަމަލާތަކެއް

މިދިޔަ ހުކުރު ދުވަހުން ފެށިގެން އަގްސާ މިސްކިތުގެ ތެރޭގައި އިޒްރޭލު ސިފައިންނާއި ފުލުހުން ހިންގަމުން އަންނަ އުދުވާނީ އަމަލުތައް ހުއްޓައިލުމަށް ދުނިޔޭގެ ގައުމުތަކުން ގޮވާލަމުން ދަނިކޮށް، އެކަމަށް އިޖާބަ ދިނުމެއް ނެތި، ފަލަސްތީނުގެ ގާޒާ އަށް އިޒްރޭލުން ރޭ ދަންވަރު މިސައިލް ހަމަލާތަކެއް ދީފި އެވެ.

އަލް ޖަޒީރާ ޓީވީން ބުނި ގޮތުގައި އިޒްރޭލުގެ ހަނގުރާމަމަތީ މަތިންދާބޯޓުތަކުން ދިން މިސައިލް ހަމަލާތައް އަމާޒުކުރީ ގާޒާގެ ދެކުނުން އޮންނަ ޚާން ޔޫނުސް އަވަށުގައި ހުރި، ފަލަސްތީނުގެ ހަނގުރާމަވެރި ޖަމާއަތްތަކަށް ނިސްބަތްވާ ބައެއް ތަންތަނަށެވެ. މި ހަމަލާތަކުގައި އެ ތަންތަނަށް ބޮޑެތި ގެއްލުންތަކެއް ލިބުނަސް، އެއްވެސް މީހަކަށް ގެއްލުމެއް ލިބުނުކަން އެނގެން ނެތް ކަމަށް ވެސް އަލް ޖަޒީރާ އިން ބުންޏެވެ.

ފަލަސްތީނުގެ ހަނގުރާމަވެރި ޖަމާއަތްތަކުން ބުނި ގޮތުގައި އިޒްރޭލުގެ ހަމަލާތަކަށް ރޭގައި ވެސް ރައްދު ހަމަލާ ދީފައިވާނެ އެވެ. އަލް ޖަޒީރާ އިން ބުނި ގޮތުގައި އިޒްރޭލުގެ ހަނގުރާމަމަތީ މަތިންދާބޯޓުތައް ގާޒާގެ މަތީގައި އުދުހެމުން ދިޔަ އިރު، ފަލަސްތީނުގެ ހަނގުރާމަވެރިން އެ ބޯޓުތަކާ ދިމާލަށް ބަޑިޖަހަމުން ދިޔަ އެވެ. ނަމަވެސް އެއިން ބޯޓަކަށް ގެއްލުމެއް ނުލިބެ އެވެ.

ހަމާސް ޖަމާއަތުގެ އަސްކަރީ ގޮފި، އިއްޒުއްދީނުލް ގައްސާމް ބްރިގޭޑުން ބުނި ގޮތުގައި އެ ޖަމާއަތުގެ ހަނގުރާމަވެރިން ރައްދު ހަމަލާ ދިނީ މަތިންދާބޯޓަށް ހަމަލާދޭ ޒާތުގެ ރޮކެޓުންނެވެ. އަދި އިޒްރޭލުން ގާޒާ އަށް ހަމަލާ ދޭން ފެށީ، އަގްސާ މިސްކިތުގައި އިޒްރޭލު ސިފައިންނާއި ފުލުހުން ހިންގާ އުދުވާންތަކާ ދެކޮޅަށް ފަލަސްތީނުގެ އާންމުން ހިންގާ ހަރަކާތްތައް ހުއްޓުވުމުގައި އިޒްރޭލު ފުލުހުން ގޮތް ހުސްވުމުން އެކަމުގެ ނުތަނަވަސްކަން ފިލުވައިލުމުގެ ގޮތުން ކަމަށް ވެސް ހަމާސް އިން ބުނެ އެވެ.

މި ހަމަލާތަކަށް ފަހު އިޒްރޭލުގެ އަސްކަރިއްޔާ އިން ބުނި ގޮތުގައި، އިޒްރޭލުގެ މަތިންދާބޯޓުތަކުން ހަމަލާ ދީ ހަލާކުކޮށްލީ، ގާޒާގައި ހަމާސް ޖަމާއަތުން ހަނގުރާމަވެރި އާލާތްތައް އުފައްދަން ބޭނުންކުރާ ވޯކްޝޮޕްތަކެކެވެ. އިޒްރޭލުގެ އަސްކަރިއްޔާ އިން ބުނި ގޮތުގައި ގާޒާގެ ތެރެއިން އިޒްރޭލުގެ ތެރެއަށް ފޮނުވައިލި ރޮކެޓްތަކެއް، އިޒްރޭލުގެ ވައިގެ ދިފާއީ ނިޒާމުން ހަމަލާދީ ވައިގެ ތެރޭގައި ވަނީ ގޮއްވާލައިފަ އެވެ.

އަލް ޖަޒީރާ އިން ބުނި ގޮތުގައި މިދިޔަ ހުކުރު ދުވަހުން ފެށިގެން އިޒްރޭލު ސިފައިންނާއި ފުލުހުން އަގްސާ މިސްކިތަށް ވަދެ، އަޅުކަމުގައި ތިބި ފަލަސްތީނު މީހުންނަށް ހަމަލާދީ އެތައް ބަޔަކު ޒަހަމްކޮށްލުމަށް ފަހު، އިއްޔެ މެންދުރު ފަހު އިޒްރޭލު ސިފައިންނާއި ފުލުހުން ވަނީ އަގްސާ މިސްކިތުން ނުކުމެފަ އެވެ. އޭގެ ކުރިން އިއްޔެ ހެނދުނު ވެސް، އިޒްރޭލު ސިފައިންނާއި ފުލުހުންގެ ހިމާޔަތުގައި ތިބެގެން ޔަހޫދީ ވަޒަންވެރިންގެ ބަޔަކު އަގްސާ މިސްކިތަށް ވަދެ މިސްކިތުގެ ހުރުމަތް ކަނޑައި، ފަލަސްތީނު މީހުންނާ ދެކޮޅަށް އަޑުގަދަކޮށް ހަމަނުޖެހުން ހިންގި އެވެ.

އިޒްރޭލު ފުލުހުން ބުނި ގޮތުގައި އެ މީހުން އަގްސާ މިސްކިތަށް ވަނީ، އެ ސަރަހައްދަށް ޒިޔާރަތްކުރާ ޔަހޫދީންނަށް މަގު އަމާންކޮށްދިނުމުގެ ގޮތުންނެވެ. ޔަހޫދީން އަގްސާ މިސްކިތަށް މިފަހަރު ވަނީ، ޔަހޫދީންގެ އީދުލް ފުސްހު ފާހަގަކުރުމުގެ ގޮތުންނެވެ. ޔަހޫދީންގެ އީދުލް ފުސްހަކީ، ފިރްއައުނުގެ އަނިޔާވެރިކަމުން ސަލާމަތްވުމަށް، ބަނީ އިސްރާއީލު ވަންހައިގެ މީހުން މިސްރުން ފައިބައިގެން ދިޔުން ފާހަގަކުރާ މުނާސަބަތެވެ. އީދުލް ފުސްހު ފާހަގަކުރުން އޮންނަނީ ކޮންމެ އެޕްރީލް މަހެއްގެ 15 ވަނަ ދުވަހުން ފެށިގެން ހަފުތާއެއްގެ މުއްދަތަށެވެ.

އިޒްރޭލާއި ޖޯޑްންއާ ދެމެދު 1994 ވަނަ އަހަރު ސޮއިކޮށްފައިވާ ސުލްހައިގެ މުއާހަދާގެ ދަށުން، އަގްސާ މިސްކިތުގެ އެންމެހައި ކަންތައް ރާވައި ހިންގާނީ، ޖޯޑްން އިން ހިންގާ ވަގުފް ފަންޑެއްގެ ބެލުމުގެ ދަށުން އަދި އިޒްރޭލުގެ ސަލާމަތީ އިންތިޒާމުތަކާ އެކުގަ އެވެ. މި އެއްބަސްވުމުގެ ދަށުން އަގްސާގެ ކަންތައް ހިންގުމަށް ހަމަޖައްސާފައިވާ އިންތިޒާމުތަކުގެ ތެރޭގައި، އަގްސާ މިސްކިތުގެ ގޯތިތެރޭގަ އާއި މިސްކިތުގެ ތެރޭގައި އަޅުކަން ކުރުމަށް ޔަހޫދީން ވަނުމަކީ މަނާކަމެކެވެ.

އޭގެ ބަދަލުގައި ޔަހޫދީންނަށް އަޅުކަމުގެ ކަންތައް ކުރިއަށް ގެންދެވޭނީ، އަގްސާ މިސްކިތް ހިމެނޭ ސަރަހައްދުގައި ހުންނަ ހުޅަނގު ފާރު ނުވަތަ ބުރާގު ފާރު ކައިރީގަ އެވެ.