އާރިޔާ ސްޓާކްގެ ރޯލު ކުޅެން ވަރަށް ފޫހިވި: މެއިސީ

މިހާތަނަށް ނެރުނު އެންމެ ވަރުގަދަ ޓީވީ ޝޯ "ގޭމް އޮފް ތުރޯންސް"ގައި "އާރިޔާ ސްޓާކް"ގެ ރޯލުން މަގުބޫލުކަން ހޯދި އިނގިރޭސިވިލާތުގެ އެކްޓްރެސް މެއިސީ ވިލިއަމްސް، އެ ރޯލު ކުޅެން ވަރަށް ފޫހިވި ކަމަށް ބުނެފި އެވެ.

އުމުރުން 24 އަހަރުގެ މެއިސީ، ގޭމް އޮފް ތުރޯންސްގައި އެންމެ ފުރަތަމަ ފެނުނު އިރު އޭނާގެ އުމުރަކީ އެންމެ 14 އަހަރެވެ. ޝޯގެ ހުރިހާ ސީޒަނެއްގައި މެއިސީ މަސައްކަތް ކުރި އިރު، އޭނާގެ ފުރާވަރު އުމުރު އެއްކޮށް ހޭދަވީ އެ ޝޯގެ ތެރޭގަ އެވެ.

ބޮޑުވަމުން އައި އިރު އަމިއްލަ "އައިޑެންޓިޓީ"އެއް ނުލިބި އޮއްވާ އެހާ ބޮޑު ޝޯއެއްގައި އުޅެން ޖެހުމުން، އެ ޝޯގައި އާރިޔާގެ ރޯލު ކުޅެން ވަރަށް ފޫހިވި ކަމަށް މެއިސީ ބުންޏެވެ.

"އަމިއްލަ އައިޑެންޓިޓީ ހޯދަން އުޅުނު އިރު އެހާ ބޮޑު ކެރެކްޓާއެއް ކުޅެން ޖެހުނީ އަސްލު. އެއީ މުޅި މީހާގެ ދިރިއުޅުމުގެ ބޮޑު ބަޔަކަށް ވީމަ އެ ރޯލު މަތިން ވަރަށް ފޫހިވޭ،" ޖީކިއު މެގަޒިން އަށް ދިން އިންޓަވިއުއެއްގައި މެއިސީ ބުންޏެވެ.

މެއިސީ ބުނީ ގޭމް އޮފް ތުރޯންސްގައި މަސައްކަތް ކުރި ދުވަސްތައް މަތިން ހަނދާންކުރަން މިހާރު ބޭނުންނުވާ ކަމަށެވެ. އަދި އެއިން އެއްވެސް ކަމެއްގެ މަތިން "މިސް" ނުވާ ކަމަށް ވެސް ބުންޏެވެ.