އެއްދުވަސް ނުވަނީސް ލަންކާގެ އާ ފިނޭންސް މިނިސްޓަރު އިސްތިއުފާ ދީފި

ކޮލަމްބޯ (އެޕްރީލް 5) - ސްރީ ލަންކާގެ އާ ފިނޭންސް މިނިސްޓަރުގެ މަގާމަށް ހަމަޖެއްސި އަލީ ސަބްރީ އެއްދުވަސްތެރޭ އިސްތިއުފާ ދެއްވައިފި އެވެ.

"އަޅުގަނޑު އަބަދުވެސް މަސައްކަތް ކުރަނީ ގައުމަށް އެންމެ މަސްލަހަތު ހުރި ގޮތަށް. މިދިމާވި ކަންތަކާ ގުޅިގެން އެރި އޮޅުންތަކަށް ވަރަށް ބޮޑަށް މައާފަށް އެދެން،" ސަބްރީ ނެރުއްވި ބަޔާނުގައި ބުނެފައިވެ އެވެ.

ސަބްރީ ވިދާޅުވީ ގައުމަށް ދިމާވެފައިވާ މައްސަލަތައް ހައްލުކުރުމުގައި އާ ވިސްނުންތަކެއް ބޭނުންވާ ކަމަށެވެ.

ސްރީ ލަންކާ އަށް ދިމާވެފައިވާ ސިޔާސީ ހަލަބޮލިކަމުގެ ތެރޭގައި މުޅި ކެބިނެޓް އާދިއްތަ ދުވަހު އިސްތިއުފާ ދެއްވި އިރު ސަބްރީ އަކީ ޖަސްޓިސް މިނިސްޓަރެވެ. ސަރުކާރާއި ޕާލަމެންޓް ހިންގުމުގެ ގޮތުން ރައީސް ގޯޓާބޭ ރާޖަޕަކްސާ އިއްޔެ ކެބިނެޓަށް އައްޔަންކުރި ހަތަރު މިނިސްޓަރުންގެ ތެރޭގައި ސަބްރީ އަށް ދެއްވީ ފިނޭންސް މިނިސްޓަރުގެ މަގާމެވެ. ފިނޭންސް މިނިސްޓަރުގެ މަގާމުގައި ކުރިން ހުންނެވީ ރައީސްގެ ކޮއްކޯފުޅު ބާސިލް ރާޖަޕަކްސާ އެވެ.

ލަންކާ އަށް މިހާރު ދިމާވެފައިވާ އިގްތިސާދީ މައްސަލަތައް ހައްލުކުރުމުގައި އެންމެ މުހިންމު ދައުރެއް އަދާކުރަން ޖެހޭ އެއް ފަރާތަކީ ފިނޭންސް މިނިސްޓަރެވެ.