ރޯދަމަހާ ދިމާކޮށް އައްޑު އަށް 2،400 ޓަނުގެ މުދާ

މި ހަފުތާ ބަންދުގައި ފަށާ މި އަހަރުގެ ރޯދަމަހާ ދިމާކޮށް، ގިނަ އަދަދެއްގެ މުދާ އައްޑޫ ހިތަދޫ ޕޯޓަށް ގެންގޮސްފި އެވެ.

އެސްޓީއޯގެ ދަށުން ހިންގާ ޝިޕިން ކުންފުނި އެމްއެސްއެސްގެ އެމްވީ ބޮންތި 2 ވަނީ އިއްޔެ މުދާ ހިފައިގެން ހިތަދޫ ޕޯޓަށް ބަނދަރުކޮށްފަ އެވެ.

މި ޝިޕްމަންޓްގައި 8،593 ބިސް ކޭސް، 7،940 ފިޔާ ބަސްތާ، 2،525 އަލުވި ބަސްތާ ގެންދިޔަ އެވެ. އަދި 340 ބަސްތާ ކެބެޖު، 348 ބަސްތާ ޓޮމާޓޯ، 170 ދޮންކެޔޮގަނޑު، 24 ބަސްތާ ބަރަބޯ، 980 ބަސްތާ ކަރާ، 110 ބަސްތާ އަލަނާސި ވެސް އޭގެ ތެރޭގައި ހިމެނެ އެވެ.

ހިތަދޫ ޕޯޓްގެ ޗީފް މެނޭޖަރު އިބްރާހިމް ރަޝީދު ވިދާޅުވީ، ހަލާކުވާ ޒާތުގެ ކާބޯތަކެތި އެއްކޮށް ކްލިއާކޮށް ދޫކޮށްފައިވާ ކަމަށެވެ. އައްޑޫ ޕޯޓަށް އެންމެ ގިނައިން ގެންގޮސްފައި ވަނީ އެސްޓީއޯގެ މުދަލެވެ. އޭގެ އިތުރުން އާންމު ވިޔަފާރިވެރިން ރޯދައަށް ހާއްސަކޮށް ގެނައި މުދާތައް ވެސް ހިމެނެ އެވެ.

އިއްޔެގެ ޝިޕްމެންޓުގައި ހިމެނެނީ އައްޑު އަށް އާންމުކޮށް ކޮންމެ މަހަކު ގެންދާ މުދަލަށް ވުރެ ބޮޑު އަދަދެކެވެ. މި ފަހަރުގެ ޝިިޕްމަންޓްގައި 71 ޓަނުގެ ހަލާކުވާ ޒާތުގެ ކާބޯތަކެއްޗާއި 1،000 ބަސްތާ ސިމެންތި ގެންދިޔަ އެވެ.

އެ ބޯޓުން އައްޑު އަށް ގެންދިޔަ މުދާތައް ކުރިއަށް އޮތް ދެ ދުވަހު ކްލިއާކޮށް ނިމޭނެ އެވެ.