ރައީސް އާއި ނައިބު ރައީސް ފުވައްމުލަކަށް ވަޑައިގެންފި

ރައީސް އިބްރާހިމް މުހައްމަދު ސޯލިހް އާއި ނައިބު ރައީސް ފައިސަލް ނަސީމް ވެސް މިއަދު ފުވައްމުލަކަށް ވަޑައިގެންފި އެވެ.

ރައީސް ފުވައްމުލަކަށް މި ވަޑައިގަތީ އައްޑޫގެ ހުރިހާ އަވަށެއް ހިމެނޭ ގޮތުން ކުރައްވާ ހަތަރު ދުވަހުގެ ދަތުރުފުޅުގެ ތެރެއިންނެވެ. އެމަނިކުފާނާ އެކު އަނބިކަނބަލުން ފަޒްނާ އަހްމަދު ވެސް ބައިވެރިވެވަޑައިގަތެވެ.

ރައީސް އޮފީހުން ބުނީ ފުވައްމުލަކާއި އައްޑު އަށް ކުރައްވާ ހަތަރު ދުވަހުގެ ދަތުރުފުޅުގައި އެ ސިޓީގެ ހުރިހާ އަވަށްތަކަކަށް ރައީސް ވަޑައިގަންނަވާނެ ކަމަށެވެ. އުފަން ރަށް، ފުވައްމުލަކަށް ނައިބު ރައީސް ވަޑައިގަތީ ރައީސް ވަޑައިގަންނަވާތީ ދެ ދުވަހަށެވެ. އެމަނިކުފާނު މާދަމާ އެނބުރި މާލެ ވަޑައިގަންނަވާނެ އެވެ.

ރައީސްގެ ދަތުރުފުޅުގައި، ފާޑުކިޔުން ބޮޑުވެފައިވާ އައްޑޫގެ ބިން ހިއްކުމުގެ މަޝްރޫއުގެ އެއްބަސްވުމުގައި ސޮއިކުރައްވާ ގޮތަށް ވެސް ހަމަޖެހިފައިވެ އެވެ. ރައީސްގެ އައްޑޫ ދަތުރަކީ 2019ގެ މަޖިލިސް އިންތިހާބުގެ ކެމްޕޭނަށް ފަހު ވަޑައިގަންނަވާ ފުރަތަމަ ފަހަރެވެ.

އައްޑޫގެ ބިން ހިއްކުމުގެ މަޝްރޫއުގެ އިތުރުން ބައެއް ތަންތަން ރަސްމީކޮށް ހުޅުވަން ވެސް ނިންމާފައިވެ އެވެ. އެއީ؛

- އައްޑޫގެ މަގު ހެދުމުގެ އަމަލީ މަސައްކަތް ފައްޓަވައިދެއްވުން.

- ޕޮލިސް އެކަޑަމީ ހުޅުވައިދެއްވުން.

- މަރަދު އާއި މީދޫ ބަނދަރު ހުޅުވައިދެއްވުން.

- ހިތަދޫ މަސްޖިދުލް އިބްރާހިމް ހުޅުވައިދެއްވުން.

- ޑްރަގް ޑިޓޮކްސިފިކޭޝަން އެންޑް ކޮމިއުނިޓީ ސެންޓަރު ހުޅުވައިދެއްވުން.

އައްޑޫ ބިން ހިއްކުމުގެ މަޝްރޫއުގެ އެއްބަސްވުމުގައި ސޮއިކުރަން ނިންމެވިއިރު، އެއީ ތިމާވެއްޓަށް ވަރަށް ބޮޑު ގެއްލުމެއް ލިބޭނެ މަޝްރޫއުއަކަށް ވާތީ ގިނަ ބައެއްގެ ފާޑުކިޔުން ސަރުކާރަށް އަމާޒުވެފައިވެ އެވެ. އެއީ އައްޑޫގެ ތިމާވެއްޓަށް ވަރަށް ބޮޑު ގެއްލުމެއް ލިބޭނެ މަޝްރޫއުއަކަށް ވާތީ، އެކަން ހުއްޓާލަން ޓްރާންސްޕޭރެންސީ ހިމެނޭ ގޮތަށް ތިމާވެށީގެ ހައްގުގައި މަސައްކަތްކުރާ ވަރަށް ގިނަ ޖަމިއްޔާތަކުން ގޮވާލައިފައިވެ އެވެ.

އައްޑޫން 236.5 ހެކްޓަރުގެ ބިން ހިއްކަނީ ތިމާވެއްޓަށް ގެއްލުންވާ ގޮތަށް ކަމަށް ބުނެ، ޕްލޭނިން މިނިސްޓްރީއާ ދެކޮޅަށް އަމިއްލަ ފަރާތަކުން އެ މައްސަަލަ ސ. މީދޫ މެޖިސްޓްރޭޓް ކޯޓަށް ވެސް ހުށަހަޅާފައިވެ އެވެ. އެކަމަކު، ތިމާވެށީގެ މިނިސްޓަރު އައިމިނަތު ޝައުނާ މި މަހު ވިދާޅުވެފައި ވަނީ ސަރުކާރުން އެ މަޝްރޫއު ނުހުއްޓުވާނެ ކަމަށެވެ.