ޔުނައިޓެޑް ކެޓުމުން ރަންގްނިކަށް ގޯސްވީ ރެފްރީ

މެންޗެސްޓާ (މާޗް 16) - އެތުލެޓިކޯ މެޑްރިޑް އަތުން 2-1 ގެ އެގްރިގޭޓް ނަތީޖާއިން ބަލިވެ، ޔޫއެފާ ޗެމްޕިއަންސް ލީގުގެ ދެވަނަ ބުރުން މެންޗެސްޓާ ޔުނައިޓެޑް ކެޓުމުން އެޓީމުގެ ކޯޗު ރާފް ރަންގްނިކް ރެފްރީ ގޯސްކޮށްފި އެވެ.

މި ދެ ޓީމު މެޑްރިޑްގައި ކުޅުނު މެޗު ނިމުނީ 1-1 އެއްވަރުވެގެންނެވެ. މެންޗެސްޓާގައި ރޭ ކުޅުނު މެޗުގައި އެތުލެޓިކޯ 1-0 އިން މޮޅުވެ 2-1 ގެ އެގްރިގޭޓް ނަތީޖާއިން ކުއާޓާ ފައިނަލަށް ދަތުރުކުރި ލަނޑު 41 ވަނަ މިނެޓްގައި ޖެހީ ރެނާން ލޮޑީ އެވެ.

ރަންގްނިކް ގަބޫލުކުރާ ގޮތުގައި ލަނޑެއް ކަމަށް އެ ގޯލު ރެފްރީ ބަލައިގަނެގެން ނުވާނެ އެވެ. އޭނާ ބުނި ގޮތުގައި އެ ލަނޑު ޖަހަން އެތުލެޓިކޯއިން އުފެއްދި ބިލްޑްއަޕްގައި އެ ޓީމުގެ ޑިފެންޑަރު ރެއިނަލޯޯ މެންޑާވާ ވަނީ ޔުނައިޓެޑްގެ އެންތޮނީ އެލަންގާ އަށް ފައުލުކޮށްފަ އެވެ.

"ރެފްރީގެ ނިންމުންތައް ހުރީ އަޅައިގަންނަ ކަހަލަ ގޮތަކަށް. އަހަރެން ނުބުނާނަން ހަމަޖެހޭ ނިންމުންތަކެކޭ،" ރެފްރީގެ ނިންމުންތަކާ މެދު ހިތްހަމަނުޖެހިގެން ރަންގްނިކް ވާހަކަ ދެއްކި އެވެ.

"އެ މީހުން ގޯލްޖެހުމުން އެއީ ލަނޑެއް ކަމަށް ނިންމި ނިންމުމުން އެވެދާނެ އޭގެތެރެއިން ނިންމުމަކަށް. އަހަރެން ގަބޫލު ކުރަނީ އެންތޮނީ އެލަންގާ އަށް އެކުރީ ފައުލެއް ކަމަށް. އެކަމަކު ރެފްރީންނާއި ލައިސްމަން ބެލީ އެގޮތަކަށް ނޫން. އޭނާ (ރެފްރީ) ވަނީ އެތުލެޓިކޯ އަށް ފަސޭހަވާނެ ގޮތަށް ކަންތައްކޮށްފައި. އަހަރެމެންނަށް އުނދަގޫވީ. އަހަންނަނަކަށް ނޭނގެ ދެވަނަ ހާފުގައި ދެ މިނެޓެއްހާއިރު ވެސް މެދުނުކެނޑި ކުޅެވުނުހެން. ކޮންމެވެސް މީހަކު ދަނޑު މައްޗަށް ވެއްޓިގެން ކުޅުން އޮންނަނީ މެދުކަނޑާލަން ޖެހިފައި."

މެޗަށް ފަހު އެތުލެޓިކޯ މެޑްރިޑްގެ އެކައުންޓްތަކުން ސޯޝަލް މީޑިއާގައި ވަނީ ޔުނައިޓެޑަށް މަލާމާތް ރައްދުވާ ގޮތަށް ޕޯސްޓްކޮށްފަ އެވެ. އެތުލެޓިކޯގެ ޕޯސްޓްގައި ބުނެފައި ވަނީ އޯލްޑް ޓްރެފޯޑަކީ ހުވަފެންތައް ހަގީގަތަކަށްވާ ސްޓޭޑިއަމެއް ކަމަށެވެ.

އެމްސްޓަޑަމްގައި އަޔެކްސްއާ ދެކޮޅަށް ރޭ ކުޅުނު މެޗު 1-0 އިން ކާމިޔާބުކޮށް، ބެންފީކާ ވެސް ވަނީ ޗެމްޕިއަންސް ލީގުގެ ކުއާޓާ އަށް ދަތުރުކޮށްފަ އެވެ. މި ދެ ޓީމު ލިޒްބަންގައި ކުޅުނު މެޗު ނިމުނީ 2-2 އިން އެއްވަރުވެގެންނެވެ. ބެންފީކާގެ ލަނޑު ރޭ ޖެހީ ޑާވިން ނުނިއެޒް އެވެ.