އެންބީއޭގެ ޝިކާގޯގެ އޯނަރުން ޗެލްސީ ގަންނަން ހުށަހަޅަނީ

ޝިކާގޯ (މާޗް 8) - އެމެރިކާގެ ފްރެެންޗައިސް ބާސްކެޓްބޯޅަ ލީގު، އެންބީއޭގެ ޝިކާގޯ ކަބްސްގެ އޯނަރުން، އިނގިރޭސި ކްލަބް ޗެލްސީ ގަންނަން ހުށަހަޅަން ތައްޔާރު ވެއްޖެ އެވެ.

ޝިކާގޯ ކަބްސްގެ އޯނަރުންނަކީ އެމެރިކާގެ ބިލިއަނަރެއް ކަމަށްވާ ޖޯ ރިކެޓްސްގެ އާއިލީ ކުންފުނި ރިކެޓްސް ފެމެލީ އެވެ. އެ ކުންފުނިން ވަނީ 2018 ގައި އޭސީ މިލާން ގަންނަން ވެސް ހުށަހަޅައިފަ އެވެ.

ޔޫކްރޭނާ ދެކޮޅަށް ރަޝިއާ އިން ކުރަމުންދާ ހަނގުރާމައާ ގުޅިގެން ޗެލްސީގެ ވެރިޔާ ރަޝިއާގެ ރޯމަން އަބްރޮމޮވިޗަށް އިންގްލެންޑުގައި ވަނީ ބޮޑު ޕްރެޝަރެއް ކުރިމަތިވެފަ އެވެ. އެކަމާ ގުޅިގެން އޭނާ ވަނީ ޗެލްސީ ވިއްކާލަން ނިންމައިފައިވާކަން އިއުލާންކޮށްފަ އެވެ.

ޗެލްސީ ގަންނަން އިނގިރޭސި ވިލާތުގެ ބައެއް މަހުޖަނުން ވެސް ވަނީ ޝައުގުވެރިވާ ކަމަށް ބުނެފަ އެވެ. ނަމަވެސް ރިކެޓްސް ފެމެލީން ޝައުގުވެރިކަން ފާޅުކުުރުމުން އެންމެ ހައި ޕްރޮފައިލް ނަމަކަށް އޮތީ އެ ކުންފުންޏެވެ.

އިނގިރޭސި މިޑިއާ ރިޕޯޓްތައް ބުނާ ގޮތުން އަބްރޮމޮވިޗް ޗެލްސީ ވިއްކާލާނީ މަދުވެގެން 3.5 ބިލިއަން ޑޮލަރަށެވެ. އޭނާ، 2003 ގައި ޗެލްސީ ގަތީ 65 މިލިއަން ޑޮލަރަށެވެ. މިދިޔަ 19 އަހަރު ތެރޭ އޭނާ ވަނީ ދެ ބިލިއަން ޑޮލަރާ ގާތް ކުރާ ވަރުގެ ހޭދައެއް ޗެލްސީ އަށް ކޮށްފަ އެވެ.