ދަތިކުރުމުގެ ފިޔަވަޅުތަކާ އެކު ރަޝިއާގައި ބީއެމްއެލް ކާޑު ބޭނުން ނުކުރެވޭނެ

ދުނިޔޭގެ އެކި ގައުމުތަކުގެ ބޭންކުތަކާއި ސްވިފްޓްގެ އިތުރުން ކާޑު ނެޓްވޯކުތަކުން ރަޝިއާ މެދު އަޅާ ދަތިކުރުމުގެ ފިޔަވަޅުތަކާ ގުޅިގެން ބީއެމްއެލްގެ ކާޑުތައް ވެސް އެ ގައުމުގައި ބޭނުން ނުކުރެވޭނެ ކަމަށް އެ ބޭންކުން މިއަދު ބުނެފި އެވެ.

ރަޝިއާއިން ޔުކްރޭނަށް ދެމުން އަންނަ ހަމަލާތައް ހުއްޓާލުމަށް އަންގައި ގިނަ ގައުމުތަކުން އަންނަނީ އިގްތިސާދީގޮތުން އެ ގައުމާ މެދު ފިޔަވަޅުތައް އަޅަމުންނެވެ. ރަޝިއާ އިން ދެމުން އަންނަ ހަމަލާތަކާ ގުޅިގެން ދުނިޔޭގެ ޕޭމަންޓް ސިސްޓަމަށް ވެސް ވަނީ އޭގެ އަސަރުކޮށްފަ އެވެ.

ބީއެމްއެލްގެ ކަސްޓަމަރުން ގެންގުޅެނީ އެމެރިކާގެ ކާޑު ނެޓްވޯކުތައް ކަމަށްވާ އެމެރިކަން އެކްސްޕްރެސް އާއި ވިސާ އާއި މާސްޓަ ކާޑެވެ. ރަޝިއާގައި އެ ކުންފުނިތަކުގެ ކާޑުތައް ބޭނުން ނުކުރެވޭ ގޮތް ހަދަން އިއްޔެ ވަނީ ނިންމައިފަ އެވެ.

ރަޝިއާގެ އިތުރުން ފިޔަވަޅު އަޅާފައިވާ އެހެން ސަރަހައްދުތަކުގައި ވެސް ކާޑުތައް ބޭނުން ނުކުރެވޭނެ ކަމަށް ބީއެމްއެލުން ބުންޏެވެ. އަދި އެ ސަރަހައްދުތަކަށް ނިސްބަތްވާ ފަރާތްތަކުން ކާޑު މެދުވެރިކޮށް ކުރާ މުއާމަލާތްތަކުންް މާޗަންޓުންނަށް ފައިސާ ނުލިބޭނެ ކަމަށް ވެސް ބީއެމްއެލް އިން ބުންޏެވެ. މިއާއެކު ރާއްޖޭގައި ތިބި ރަޝިއާގެ ޓޫރިސްޓުންނަށް ވެސް އެ ކާޑުތައް ބޭނުންކޮށްގެން ފައިސާ ނުދެއްކޭނެ އެވެ.

ދުނިޔޭގެ ޕޭމަންޓް ސިސްޓަމަށް އައި ބަދަލާ އެކު ރާއްޖޭން ބޭރަށް ފައިސާ ފޮނުވުމާއި ބޭރުން ފައިސާ ގެނައުމުގެ ހިދުމަތަށް ވެސް މިވަނީ އަސަރުކޮށްފަ އެވެ. ދަތިކުރުމުގެ ފިޔަވަޅު އަޅާފައިވާ ސަރަހައްދުގެ ބޭންކުތަކަށް ޓީޓީ ފޮނުވުމުގައި ވެސް އިތުރު ވަގުތު ހޭދަވުމާއި ޓީޓީ ނުފޮނުވޭނެ ހާލަތެއް މެދުވެރިވެދާނެ ކަމަށް ބޭންކުން ބުންޏެވެ.