ރަޝިޔާގެ ބޯޓުތަކަށް ވިލާތުގެ ވައިގެ ސަރަހައްދު ބަންދު

ވިލާތުގެ އިއްތިހާދުގެ ގައުމުތަކުގެ ވައިގެ ސަރަހައްދަށް ރަޝިޔާގެ މަތިންދާބޯޓުތައް ވަނުން ރެއިން ފެށިގެން މަނާކޮށްފި އެވެ.

ވިލާތުގެ އިއްތިހާދުގެ ވެރިޔާ އުރްސުލާ ވިދާޅުވި ގޮތުގައި އެ އިއްތިހާދުގެ ވައިގެ ސަރަހައްދު ރަޝިޔާގެ މަތިންދާބޯޓުތަކަށް ބަންދުކުރީ، ރަޝިޔާ އިން ޔޫކްރޭނާ ދެކޮޅަށް ދެމުންދާ އުދުވާނީ ހަމަލާތަކާ ގުޅިގެންނެވެ. އެ ގޮތުން ރަޝިޔާ ސަރުކާރުގެ މަތިންދާބޯޓުތަކާއި ރަޝިޔާގައި ރަޖިސްޓްރީކޮށްފައިވާ މަތިންދާބޯޓުތަކުގެ އިތުރުން، ރަޝިޔާ އިން ކޮންޓްރޯލްކުރާ މަތިންދާބޯޓުތަކަށް ވެސް، ވިލާތުގެ އިއްތިހާދުގެ ވައިގެ ސަރަހައްދު ބަންދުވާނެ އެވެ.

ވިލާތުގެ އިއްތިހާދުގެ މި ނިންމުމާ ގުޅިގެން، ރަޝިޔާގެ މަހުޖަނުންގެ އަމިއްލަ މަތިންދާބޯޓުތައް ވެސް ހިމެނޭ ގޮތުން ރަޝިޔާގެ އެއްވެސް މަތިންދާބޯޓެއް، އެ އިއްތިހާދުގެ އެއްވެސް ގައުމަކަށް ނުޖެއްސޭނެ އެވެ. އަދި އެއިން ގައުމެއްގައި އޮތް ރަޝިޔާގެ މަތިންދާބޯޓަކަށް ނުވެސް ފުރޭނެ އެވެ. އަދި ވިލާތުގެ އިއްތިހާދުގައި ހިމެނޭ އެއްވެސް ގައުމެއްގެ ވައިގެ ސަރަހައްދުގެ ތެރެއިން ލާފައި އެހެން ގައުމަކަށް ވެސް ދަތުރެއް ނުކުރެވޭނެ އެވެ.

ވިލާތުގެ އިއްތިހާދުން މި ފިޔަވަޅު އެޅުމުގެ ކުރިން ވެސް، އެ އިއްތިހާދުގައި ހިމެނޭ ބައެއް ގައުމުތަކުން ވަނީ އެ ގައުމުތަކުގެ ވައިގެ ސަރަހައްދަށް ރަޝިޔާގެ މަތިންދާބޯޓުތައް ވަނުން މަނާކޮށްފަ އެވެ. އެގޮތުން ޖަރުމަން ވިލާތުން ވަނީ، ކުރިއަށް އޮތް ތިން މަސްދުވަސް ވަންދެން، ރަޝިޔާގެ އެއްވެސް މަތިންދާބޯޓެއް ޖަރުމަނުގެ ވައިގެ ސަރަހައްދަށް ނުވެއްދުމަށް ނިންމައިފަ އެވެ. އިނގިރޭސި ވިލާތުން ވެސް ވަނީ އެ ގައުމުގެ ވައިގެ ސަރަހައްދަށް ރަޝިޔާގެ މަތިންދާބޯޓުތައް ވަނުން މަނާކޮށްފަ އެވެ.

ރަޝިޔާގެ އެންމެ ބޮޑު އެއާލައިން އައެރޯފްލޮޓް އިން ބުނި ގޮތުގައި ވިލާތުގެ އިއްތިހާދުގެ އެ ނިންމުމާ ގުޅިގެން، ކުރިން ވިލާތުގެ ގައުމުތަކަށް ކުރުމަށް ތާވަލުކޮށްފައި ހުރި ހުރިހާ ދަތުރުތަކެއް މިހާރު ވަނީ ކެންސަލްކޮށްފަ އެވެ. މައްސަލަ ވަކި ގޮތަކަށް ނިމުމުން ނޫނީ ވިލާތުގެ ގައުމުތަކަށް ދަތުރުތައް ފެށުމާ މެދު އެއްޗެއް ބުނަން ނޭނގޭ ކަމަށް ވެސް އެ ކުންފުނިން ބުނެ އެވެ.

ރަޝިޔާގެ ވެރިރަށް މޮސްކޯގެ ދެ ވައިގެ ބަނދަރު ކަމަށްވާ ޑޮމޮޑެޑޯވޯ އާއި ޝެރެމެޓްޔެވޯ އިން، ވިލާތުގެ ގައުމުތަކަށް ކުރުމަށް ތާވަލުކޮށްފައި ހުރި ހުރިހާ ދަތުރުތަކެއް ވެސް މިހާރު ވަނީ ކެންސަލްކޮށްފަ އެވެ. ރަޝިޔާގެ އެސް7 އެއާލައިނުން ބުނި ގޮތުގައި އެ އެއާލައިންގެ މަތިންދާބޯޓުތައް ވިލާތުގެ ގައުމުތަކަށް ކުރަން ހަމަޖެހިފައިވާ ހުރިހާ ދަތުރުތަކެއް، މާޗް 13 ވަނަ ދުވަހުގެ ނިޔަލަށް މިހާރު ވަނީ މެދުކަނޑާލައިފަ އެވެ.

ވިލާތުގެ އިއްތިހާދުގެ ވައިގެ ސަރަހައްދު، ރަޝިޔާގެ މަތިންދާބޯޓުތަކަށް ބަންދުކުރުމާ ގުޅިގެން، އެ ގައުމުގެ މަތިންދާބޯޓުތައް ޔޫރަޕް ހުރަސްކޮށް އެހެން ސަރަހައްދުތަކަށް ކުރާ ދަތުރުތައް ދެން ކުރަންޖެހޭނީ ވަރަށް ދިގު މަގަކުންނެވެ.

ވިލާތުގެ އިއްތިހާދުގެ ވައިގެ ސަރަހައްދު ރަޝިޔާގެ ބޯޓުތަކަށް ބަންދުކުރި އިރު، އެމެރިކާގެ ޑެލްޓާ އެއާލައިނުން ވަނީ، ފްލައިޓް ބުކިން ހެދުމަށް ރަޝިޔާ ސަރުކާރުގެ އެއާލައިން އައެރޯފްލޮޓްއާ އެކުގައި ހަދާފައިވާ އެއްބަސްވުން އުވާލައިފަ އެވެ.