އެޗްޕީއޭ ތެރެއިން ފޭކް ކޮވިޑް ވެކްސިން ކާޑު ވިއްކި މައްސަލައެއް ފުލުހުން ބަލަނީ

ކޮވިޑް ވެކްސިން ނުޖަހާ މީހުން ވެކްސިން ޖެހި ކަމަށް ދައްކަން ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ތެރެއިން ފޭކް ވެކްސިން ކާޑު ވިއްކި މައްސަލައެއް ފުލުހުން ބަލަން ފަށައިފި އެވެ.

ފޭކް ވެކްސިން ކާޑު ވިއްކި މައްސަލައެއް ރިޕޯޓްކޮށްފައިވާތީ އެ މައްސަލަ ބަލަމުން އަންނަ ކަމަށް ފުލުހުން ބުންޏަސް އިތުރު މައުލޫމާތެއް ނުދެ އެވެ. އެހެންވެ، ފުލުހުން ބަލަމުން އަންނަނީ ވެކްސިން ކާޑެއް ވިއްކި މައްސަލައެއް ކަމެއް ނުވަތަ ކާޑުތަކެއް ވިއްކި މައްސަލައެއް ކަމެއް ނޭނގެ އެވެ.

ކުރިން ވެސް އެޗްޕީއޭގެ ތެރެއިން ފޭކް ވެކްސިން ކާޑު ވިއްކާ ކަމުގެ އަޑުތައް ގަދަވި އެވެ. މިގޮތަށް ފޭކް ކާޑު ވިއްކަނީ މި މަސައްކަތުގައި އިސްކޮށް އުޅޭ ބަޔަކު ކަމަށް ވެސް މީހުން ތުހުމަތުކުރެ އެވެ.

ކޮވިޑް ވެކްސިން ޖެހުމުން، އެކަން އެނގޭ ގޮތަށް ކާޑު ދިނަސް އެ މައުލޫމާތު އެޗްޕީއޭގެ ކޮވިޑް ސޭފް ޕޯޓަލް މެދުވެރިކޮށް ވެސް ފެނެ އެވެ.

އެޗްޕީއޭގެ ތަފާސްހިސާބުތަކުން ދައްކާ ގޮތުން މިހާތަނަށް 370،973 މީހަކު ވެކްސިންގެ ދެވަނަ ޑޯޒް ޖަހާފައިވެ އެވެ. އަދި ތިން ވަނަ ޑޯޒް ވެސް މިހާރު ޖަހައިދެމުން އަންނައިރު މިހާތަނަށް ތިން ޑޯޒް ޖަހާފައި ވަނީ 126،456 މީހެކެވެ.