މަހްމޫދުގެ ހުރިހާ ވާރިސުން އެދުނީ ސާލިމް މަރަން

އދ. ދަނގެތީގައި މަރާލި އެރަށު ވިޔަފާރިއެއް ކަމަށްވާ މަހްމޫދު އަބޫބަކުރުގެ ގާތިލު ޝާހް އާލަމް މިއާ (ސާލިމް) ގެ ކިބައިން މަރަށް މަރު ހިފަން މަހްމޫދުގެ ހުރިހާ ވާރިސުން އެދިއްޖެ އެވެ.

މިދިޔަ އަހަރުގެ އޮކްޓޫބަރު މަހު މަހްމޫދު މަރާލުމަށްފަހު ފަޅު ގޯއްޗެއްގައި ހުރި ވަޅަކަށް ވައްޓާލާފައި އޮއްވައި ފެނުނު މައްސަލާގައި އޭނާގެ ގާތިލް ސާލިމް ވަނީ ކޯޓުގައި ކުރިން ކުށަށް އިއުތިރާފްވެ، އެކަމަށް މާފަށް އެދިފަ އެވެ. ތަހުގީގާއި ޝަރީއަތުގައި ވެސް ސާލިމް ވަނީ މި އިއުތިރާފް ދަމަހައްޓައިފަ އެވެ.

ވާރިސުންގެ ބަސް ހޯދުމަށް ފަހު މިހާރު ދަނީ އަދަބު ކަނޑައެޅުމުގެ އަޑުއެހުމެވެ. އިސްލާމީ ޝަރީއަތުގައި އޮންނަ ގޮތުން ނަމަ، ވާރިސުން މަރަށް މަރު ހިފަން އެދިއްޖެ ނަމަ އިއްވަން ޖެހޭނީ އެ ހުކުމެވެ.

ސާލިމްގެ ދިފާއީ ވަކީލް މަޖީދު އަލީ މީގެ ކުރިން ޝަރީއަތުގައި ވިދާޅުވި ގޮތުގައި ސާލިމް ވަނީ މިއީ ޝައިތޯނާ ބޮލަށް އެރިގެން ކުރެވުނު އަމަލެއް ކަމަށް ބުނެފަ އެވެ.

ސާލިމަށް ކުރި ދައުވާގައި ބުނެފައި ވަނީ އޭނާ މަހްމޫދު މަރާލީ ވަޅިންނާއި ކޮޅު ތޫނުކޮށްފައިވާ ދެ ދަގަނޑުބުރިން މަހްމޫދުގެ މެޔާއި ކަރަށް ހަމަލާދީގެން ކަމަށެވެ. އަދި އޭގެ ފަހުން މަހްމޫދުގެ ހަށިގަނޑުގެ ބޮލާއި ފަޔަށް ގޯންޏެއް ލައްވައިގެން ގެންގޮސް ފެންވަޅަކަށް ބޯކޮޅުވަތަށް ވައްޓާލި ކަމަށެވެ.

ފުލުހުން ބުނެފައިވަނީ، ދަނގެތީގައި އުމުރުން ދުވަސްވީ މީހަކު ބަލަން ގެނެސް ހުރި ސާލިމް، މަހްމޫދަށް ހަމަލާދީ މަރާލީ އޭނާ އަތުން ފައިސާ ހޯދަން އުޅުމުގެ ތެރޭގައި ކަމަށެވެ. މަރާލުމަށް ފަހު ހަށިގަނޑު އެއްލާލާފައި އޮތީ ފަޅު ގެއެއްގައި ހުންނަ ވަޅެއްގެ ތެރޭގަ އެވެ. މަހްމޫދު މަރާލީ ސާލިމް އުޅޭ ގެޔަށް ރޭނގަނޑުގެ ވަގުތެއްގައި ގެންގޮސް، ވަޅިން ހަމަލާ ދީގެންނެވެ. އޭނާގެ ހަށިގަނޑު ވަޅަށް ވައްޓާލާފައި އޮތީ ގޯންޏަކަށް ލުމަށް ފަހުގަ އެވެ. މި ހުރިހާ ކަމެއް ވެސް ސާލިމް ކުރީ އެކަނި ކަމަށާއި މި ކަމުގައި އިތުރު މީހެއްގެ ބައިވެރިވުން އޮތްކަން އެނގެން ނެތް ކަމަށް ވެސް ފުލުހުން ވަނީ ބުނެފަ އެވެ.