ރާދިފްގެ ވެލެންޓިއާގޯ: ހިޓުވެ، ސެޓުވެ ހުސްވި އައިނެއްގެ ވާހަކަ

ރާދިފް ރަޝީދުގެ ހަޔާތުގައި އައިނު ނާޅާ ހަނދާނެއް އޭނާގެ ނެތެވެ. އެކަމަކު އެންމެ ބޭނުންވި ކަހަލަ އައިނެއް ނޫނެވެ. ޝޯޓް ސައިޓެޑްނެސް ހުންނާތީ ވަރަށް ކުޑައިރުން ފެށިގެން ވެސް އޭނާގެ އެންމެ ގާތް އެއް 'އެކުވެރިޔަކީ' ނަމްބަރު އައިނެވެ. ސްޓައިލިޝް އަވިއައިނު ކިތަންމެ އަޅާހިތްވިޔަސް އެ އުފަލުގެ މަންޒަރު އޭނާގެ ކުރިމަތީގައި އޮތީ އަބަދުވެސް ފުސްކޮށް، ކުޑަކޮށް ނުސާފުކޮށެވެ. އޭނާގެ އެ ނަމްބަރު އައިނު 'ސްޓައިލިޝް' ފަރުމާއަކަށް ކޮށައި މަށައިލުމުގެ ދަތުރު ފެށުނު ގޮތަކީ މިއެވެ. އޭގެ ބަރާބަރު 12 އަހަރު ފަހުން 28 އަހަރުގެ މި ޒުވާނާ މިއަދު އަޅަނީ އެންމެނަށް ވެސް ސަޅި އައިނެކެވެ. ވަކިން ހާއްސަކޮށް އޭނާ އެންމެ ބޭނުންވި ކަހަލަ އައިނެކެވެ. ނުވަތަ އެހެން ނަމަކުން، ވަރަށް ކުރުކޮށް މި ހާލަތު ސިފަކޮށްދޭ ނަމަ، 'ވެލެންޓިއާގޯ' އެކެވެ. – އަމިއްލަ އަށް އަޅާނެ 'ސަޅި' އައިނެއް ފަރުމާކުރުމުގެ ދިގު ދަތުރުގައި މީގެ އަހަރެއްހާ ދުވަސް ކުރިން އޭނާ ބާޒާރަށް ނެރެ، ވަގުތުން ހިޓަކަށް ބަދަލުވެފައިވާ އޭނާގެ އަމިއްލަ އަވިއައިނު ބްރޭންޑެވެ.

އަލި--ފާނެވެ!

ކޮންމެ ދުވަހަކު މިކަހަލަ ވާހަކައެއް ކިޔާލަން ނުލިބިދާނެ އެވެ. މިހައި ޕެޝަނޭޓު ދިވެއްސަކާ ބައްދަލު ނުވެދާނެ އެވެ. އަދި މި ކަހަލަ ދިވެހި އުފެއްދުމެއް އަމުދަކުން 'އަޅާލަން' ނުވެސް ލިބިދާނެ އެވެ.

އެކަމަކު ހޭދަކުރާނެ އަވިއައިނެއް، ލޯކަލް ބްރޭންޑެއް ނޭނގިގެން ސޯޝަލް މީޑިއާގައި 'ގަންނަ ކަހަލަ' ޕޭޖުތަކަށް ބޯކޮށްޕަމުން ހާވަމުން އަނެއް ފުށަށް ޖަހަމުން ގެންދަނީ ނަމަ، މިއޮތީ މިއަދުގެ، މިހާރުގެ ހޮވުމެކެވެ. – ރާދިފްގެ ސަޅި، ނަލަ ނަލަ، ވެލެންޓިއާގޯ އެވެ.

'ހެރިޓޭޖު ކަލެކްޝަން'ގެ ނަމުގައި އޭނާގެ މި ބްރޭންޑުން ވަނީ މިހާތަނަށް ހަތަރު ޑިޒައިނެއްގެ އައިނު ބާޒާރަށް ނެރެފައެވެ. އެއީ އެންޒޯ އާއި ފެރޯނާ އަދި ނިކްސް އާއި ޒާގެ ނަން ދީފައިވާ އަވިއައިނެވެ. ރީތިވެފައި ތަފާތީ ނަމަކުން އެކަންޏެއް ނޫނެވެ.

އެކަމަކު އެންމެ ތަފާތީ، ވިކި ހުސްވަމުންދާ މި ހިތްގައިމު އުފެއްދުމުގެ ފަހަތުގައި ހުރި މި ޒުވާން ރާދިފެވެ.

ހިތާއި ބޮލާއި ލޮލަށް، އެންމެ ފަހުގެ "ފެޝަނާއި ޝޭޑުތައް" އެޅިފައިވިޔަސް ރާދިފަކީ އޭނާގެ ރަސްމީ ވަޒީފާގައި އަދި މުޅިން އެހެން ކެރެކްޓާއެކެވެ. އޭނާ އަކީ އެއާކްރާފްޓް އިންޖިނިއަރެކެވެ. ގާތްގަނޑަކަށް ދުވާލުގެ 12 ގަޑިއިރު އޭނާ މަސައްކަތްކުރަނީ އައިލެންޑް އެވިއޭޝަން ސާވިސްގައި އެއާކްރާފްޓް އިންޖިނިއަރަކަށެވެ.

"އެއާކްރާފްޓް އިންޖިނިއަރިން އަކީ އަޅުގަނޑުގެ ސީރިއަސް، އަދި ކުރިއަށް ދާން ބޭނުންވާ ދާއިރާ. މިއީ ލިބޭ އޮފް ޓައިމްތަކުގައި ކޮށްލާ ކަމެއް. އެގޮތަށް ލިބޭ ހުރިހާ ހުސްވަގުތަކު ކުރާ ކަމަކީ މިއީ. ހޮބީއަކަށް ކޮށްލާ ކަމެއް މިއީ،" ރާދިފު ކިޔައިދިނެވެ.

"އެކަމަކު ވަރަށް ކުރާހިތުން މިކަން މި ކުރަނީ މިހާރު."

އެހެން ނުވާންވީ ސަބަބެއް ވެސް ނެތެވެ. އޭނާގެ މި އުފެއްދުން ނޫކަށިފުރައިގެ ދިވެހިންގެ ފެވަރިޓަކަށް ބަދަލުވެފައިވާއިރު 'އެންޒޯ' ގެ ސްޓޮކް ހުސްވެއްޖެއެވެ. 'ޒާ' ވެސް ހުސްކޮށްލައިފިއެވެ. 'ފެރޯނާ' ވެސް މީހުން އައިސް ކޮންމެ ދުވަހަކު އެތިބަ ގެންދަނީއެވެ. އައިނެއް، 2،500ރ އާއި 2،300ރ. ގެ ރޭޓުގައި ވިކި ހުސްވަނީއެވެ. – އަނެއްކޮޅުން، މުޅިން އާ ކަލެކްޝަނަކަށް ރާދިފް އެހެރީ ފޫގަޅައިގެންނެވެ.

އެކަމަކު އޭގެ ކުރިން އޭނާ ކިޔައި ދިނީ 'ވެލެންޓިއާގޯ' ވެލެންޓިއާގޯއަކަށްވީ ގޮތެވެ.

"ވެލެންޓިއާގޯ މި ނަމަކީ ހަމަ އެއްދުވަހަކު އެހެން ހުރެފައި ބޮލަށް އައި ނަމެއް. އެކި ނަންތައް ހިތަށް އަރުވަމުން ދަނިކޮށް މާ ބޮޑަށް ރީތިވި ނަމެއް މިއީ. ހަމަ އަމިއްލަ އަށް ދެން ހަދާލި ނަމެއް މިއީ،" ރާދިފް ބުންޏެވެ.

"މި ނަމަކީ ހޯދައި ދިރާސާކޮށްގެން ދިން ނަމެއް ވެސް ނޫން. މިއީ ހަމަ ސްކްރެޗުން އަމިއްލަ އަށް ހަދައިގެން ކިޔާލި ނަމެއް."

"ރައްޓެހިންނާ އެކު ކޮފީތަކަށް ގޮސް އެކި އެއްޗެހި ކިޔަމުން، އެކި ނަންތައް ކިޔަމުން ގޮސް ވެލެންޓިއާގޯއޭ ކީމަ ވަރަށް ރީތިވެއްޖެ އެ ނަން ކޮންމެއަކަސް އަޅުގަނޑަށް. ކިޔާލަން ވެސް ތަންކޮޅެއް ފަސޭހަ ނަމެއްވީމަ އެހިސާބުން މި ނަމަށް ސެޓުކޮށްލީ."

'ވެލެންޓިއާގޯ' ގެ އައިނުތަކަށް ވެސް ވީ ހަމަ މިކަހަލަ ގޮތެކެވެ. އަނެއްކާވެސް ރާދިފް ކިޔައިދިނެވެ.

"ވާގޮތަކީ މާލެއިން ސަޅި އައިނެއް ހޯދަން ބެލިޔަސް، ވަރަށް އަގުބޮޑު. އަނެއްކޮޅުން ނަމްބަރު އައިނު އަޅާތީ ކޮންމެ ކޮންމެ ކަހަލަ އައިނެއް އަޅުގަނޑަކަށް ނޭޅޭ. އަދި ސަޅި އައިނަކަށް ނަމްބަރު ލައްވާ ނަމަ ވަކިން އަގުބޮޑު މާލޭގައި އެކަން ކުރެވެން ހުރި ގޮތް،" ވަރަށް އިތުބާރާއެކު ރާދިފު ކިޔައިދެމުންދިޔައެވެ.

"ދެން މަޑުމަޑުން އަމިއްލަ އަށް އައިނު އުފެއްދުމުގެ މަސައްކަތް ދިރާސާކުރަމުން ގޮސް ހިތަށް އެރީ އަމިއްލަ އަށް އައިނެއް ޑިޒައިންކޮށްގެން އަމިއްލަ އަށް މިކަން ކޮށްލާނީއޭ."

"ދެން ހަމަ އަމިއްލަ އަށް ޑިޒައިންކޮށްލައިގެން ނަމްބަރު ލައްވައިގެން އަމިއްލަ އަށް އެ އައިނު އަޅައިގެން ރައްޓެހިންގެ ތެރޭގައި އުޅެން ފެށީމަ އެމީހުންނާއި އެހެން މީހުންނަށް ވެސް ވަރަށް ކަމުގޮސްފި މި އައިނެއް." އަމިއްލަ މީހާގެ ހިތްހަމަޖެހުމާއި އުފަލަކަށް ކުރަހައި ފަރުމާކުރި 'އައިނު' ބްރޭންޑެއްގެ ގޮތުގައި އެންމެފަހުން ދިރިގެން އައީއެވެ.

މިހައި ހިސާބުން ވަރަށް ގިނަ މީހުން ހިތަށް އަރާނީ މިއީ ދެން 'ވެލެންޓިއާގޯ" ޕްރޮމޯޓްކުރަން ލިޔާ ލިޔުމެކޯލައެވެ. އެއްގޮތަކަށް ވެސް އެހެނެއް ނޫނެވެ. ހަމަ ސަޅީއެވެ. މަށަކަށް އެކަންޏެއް ވެސް ނޫނެވެ. އެންމެނަށް ވެސް ސަޅީއެވެ.

އަނެއް ބަޔަކު ހިތަށް އަރާނީ، މި 'ވެލެންޓިއާގޯ' އެއް ވާނީ ހަމަ 'ފޭކު-ސޭކު' އައިނުގަނޑަކަށެވެ. އެހެން ހިތަށް ނާރަންވީ ސަބަބެއް ވެސް ނެތެވެ. ދިވެހިންނަކަށް ދިވެހިން އުފައްދާ އެއްޗެއް ދުވަހަކުވެސް ކަމަކުނުދާނެއެވެ. 'ވެލެންޓިއާގޯ' އައިނު އުފައްދަން ބޭނުންކުރާ މެޓީރިއަލްސްތައް ރާދިފް ސީދާ އިޓަލީ އިން ގެންނަނީ މިހެންވެ ކަމަށް ވެސް ވެދާނެއެވެ.

އަދި އޭނާ ދޭ ޔަގީން ކަމަކީ މިއެވެ.

"މިއީ ޗީޕް ޕްލާސްޓިކެއް ނޫން. މި އައިނުތަކުގައި ބޭނުންކުރަނީ ސެލިއުލޯސް ޓްރައިއެސެޓޭޓް. މި މެޓީރިއަލްސް އަކީ ހަމަ ވަރަށް ހައި ކޮލިޓީ މެޓީރިއަލްސްތަކެއް. އިންޓަނޭޝަނަލް ބްރޭންޑްތަކާ އަޅުގަނޑުމެންގެ މި އައިނުތައް އަޅާކީދާނެ،" ރާދިފު ކިޔައިދެމުން ދިޔައެވެ.

'ވެލެންޓިއާގޯ' އައިނެއްގެ ތެރެއިން ފެންނަހާ ސާފުކޮށެވެ.

"މި އައިނުތަކުގައި އަޅުގަނޑުމެން ބޭނުންކުރަނީ ކެޓަގަރީ ތިނެއްގެ ލެންސް. އެއީ ރާއްޖޭގެ މާހައުލަށް ހަމަ އެންމެ އެކަށީގެންވާ ލެންސް ކެޓަރީ،" ރާދިފް ބުންޏެވެ.

އިތުބާރާއެކު އޭނާ ބުނަނީ ފެންވަރު ރަނގަޅު ސަޅި އައިނެއް އަޅާލަން ބޭނުންވެ އެ ހިތްހަމަޖެހުން ނުލިބޭ މީހާ އަށް 'ވެލެންޓިއާގޯ' އަކީ އެ އުފަލަށް ވާސިލުވެވިދާނެ ފާލަމެއް ކަމަށެވެ.

"ގިނަ މީހުން ބޭނުންވަނީ ތަފާތު އައިފްރޭމްސްތަކެއް. އެގޮތުން އަޅުގަނޑުމެން މި ޕްރޮމޯޓްކުރަނީ ވެސް މޮޑާން އައިވެއާ ކޮންސެޕްޓެއް. އާންމުކޮށް ރާއްޖެއިން ލިބެން ނެތް ޑިޒައިންތަކާއި ފްރޭމްތައް އެކަމަކު އެންމެން ވެސް ބޭނުންވާ ކަހަލަ ފްރޭމްތައް،" އޭނާ ކިޔައިދިނެވެ.

"އައިނެއް ގަންނަން ބޭނުންވިޔަސް ބޭނުންވާ ކަހަލަ އައިނެއް ވަރަށް ނުލިބޭ ގަނެލާކަށް ސީދާ ރާއްޖެއިން. އެހެންވީމަ އެ އައިނު ހޯދަން ކުރަން ޖެހޭ ދަތުރު ކުރުކޮށްދޭ ބްރޭންޑަކަށް ވެލެންޓިއާގޯ ހަދަން އަޅުގަނޑު ބޭނުންވަނީ"

"މާ ގޮތްބޮޑު ނުކޮށް. މިނިމަލް ޑިޒައިންތަކެއް ގެނެސްދޭން ބޭނުންވަނީ. ހިތްދަމައިގަންނަ ކަހަލަ."

ހިތްދަމައިގަތެވެ. ދަމައިގެންފިއެވެ. އެކަމުގައި ޝައްކެއް ނެތެވެ.

އެކަމަކު ދެން ވެސް ދިވެހިން ވާނީ ހަމަ ދިވެހިންނަށެވެ. ނަމަވެސް ރާދިފްގެ މި އަވިއައިނާއި ބްރޭންޑް އެހެން އެތައް ސަތޭކަ ދިވެހި އުފެއްދުމަކަށް ވުރެން ތަފާތުވާ ވަރަށް މުހިންމު އެހެން ސަބަބެއް ވެސް އޭނާ ކިޔައިދިނެވެ.

"ބައެއް މީހުން ބޭނުންވާނީ އެމީހުން އަމިއްލަ އެއްޗެއް އުފެއްދިޔަސް، އެ އެއްޗެހިތައް ވިއްކާފައި އެހެން ބްރޭންޑްތަކުގެ އެއްޗެހި ބޭނުންކުރަން. އެކަމަކު އަޅުގަނޑު ބޭނުންވަނީ އަޅުގަނޑު ވެސް އަޅާ ހިތްވާ ކަހަލަ އަދި އެހެން މީހުން ވެސް އަޅާ ހިތްވާ ކަހަލަ އައިނުތަކެއް އުފައްދަން،" ރާދިފު ބުނެލިއެވެ.

"އެހެންވީމަ މިހާރު އަޅުގަނޑު ވެސް އަޅަނީ ވެލެންޓިއާގޯ."

އެއީ ތެދެކެވެ. މިއީ "އެންމެނަށް" އުފެއްދި އައިނެއް ނޫނެވެ. ރާދިފުގެ ފުސްމަންޒަރަށް އޭނާ ގެނައި ސްޓައިލިޝް ލުކަކާއި މޮޑާން ކަޓެކެވެ. އެކަމަކު އެންމެނަށް އެންމެފަހުން މި އައިނު ސަޅިވީއެވެ. ހިޓުވީއެވެ.

ވެލެންޓިއާގޯވީއެވެ. އެއްވެސް 'މާނައެއް ނެތް އައިނެއް' ހަމަ ފައްކާ ބްރޭންޑަކަށްވީއެވެ.

ހިޓުވެ، ސެޓުވެ، ހުސްވީއެވެ!

އަލި-ފާނޯއެވެ!!