އޭސީސީން އިސްތިއުފާ ދެއްވި އަޝްރަފް ޓެންޑާ ބޯޑުގެ ޗެއާޕާސަނަކަށް ހަމަޖައްސައިފި

އެންޓި ކޮރަޕްޝަން ކޮމިޝަން (އޭސީސީ) ގެ މެމްބަރު ކަމުން ދާދިފަހުން އިސްތިއުފާ ދެއްވި އަލީ އަޝްރަފް ޓެންޑާ ބޯޑުގެ ޗެއާޕާސަން ކަމަށް ހަމަޖައްސައިފި އެވެ.

ފިނޭންސް މިނިސްޓްރީގެ އޮފިޝަލަކު "މިހާރު" އަށް ވިދާޅުވީ އެ މިނިސްޓްރީގެ ދަށުން ހިންގަމުން އަންނަ ޓެންޑާ ބޯޑުގެ އެންމެ އިސްވެރިޔާގެ މަގާމަށް އަޝްރަފް އައްޔަންކުރެއްވީ މި މަހު 11 ގަ އެވެ.

ދައުލަތުގެ ޕްރޮކިއުމަންޓްގެ ކަންކަން ހިންގާ ބަލަހައްޓާ މައި އިދާރާ ކަމަށް ޓެންޑާ ބޯޑުގައި އަޝްރަފާ އެކު، ހަތް މެމްބަރަކު ތިއްބަވަ އެވެ.

މިދިޔަ މަހުގެ ދޭއްގައި އޭސީސީގެ މެމްބަރުން ކަމުން އަޝްރަފް އިސްތިއުފާދެއްވީ، އެ ކޮމިޝަންގެ މެމްބަރުންގެ ޕާފޯމަންސް އޮޑިޓެއް ހަދައި، މަގާމުން ވަކިކުރަން ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން ނިންމި ދަނޑިވަޅުގަ އެވެ.

އިސްތިއުފާ ދެއްވާ ރައީސަށް ފޮނުވި ސިޓީގައި އަޝްރަފް ވިދާޅުވެފައި ވަނީ، އޭނާ އެތަނުން ވަކިވީ އެއްވެސް މައްސަލައެއް އޮވެގެން ނޫން ކަމަށެވެ. އެ ނިންމުން ނިންމީ އަމިއްލަ ސަބަބުތަކަކަށްޓަކައި ކަމަށާއި އަދި އޭނާގެ އިސްތިއުފާއާ މަޖިލީސް ކޮމިޓީގައި އޭރު ހިނގަމުން ދިޔަ މައްސަލައާ އެއްވެސް ގުޅުމެއް ނެތް ކަމަށެވެ.

އޭސީސީ މެމްބަރުންގެ މައްސަލަ މިނިވަން މުއައްސަސާތަކާ ބެހޭ ކޮމިޓީން ބަލަމުންދަނިކޮށް، އެ ކޮމިޓީގެ ހުރިހާ މެމްބަރުން ވަނީ އަމިއްލަ އަށް އިސްތިއުފާދީފަ އެވެ. އޭގެ ފަހުން، އެ ކޮމިޝަން މެމްބަރުން އައްޔަންކޮށްފައި ނުވާއިރު، ގާނޫނީ ހުސްކަމެއްގެ ތެރޭގައި އެ އިދާރާގެ މަސައްކަތްތައް ވެސް ވަނީ ހުއްޓިފަ އެވެ.