އަލިފާނުގެ ހާދިސާތަކާ ގުޅިގެން ހިޔާގެ އިސްވެރިންގެ ޖިނާއީ ތަހުގީގެއް ފުލުހުން ފަށައިފި

ވިލިމާލޭގައި ހުންނަ ކުޑަކުދިންގެ ހިޔާގައި ހިނގި އަލިފާނުގެ ހާދިސާތަކާ ގުޅިގެން އެތަނުގެ އިސްވެރިންގެ މައްޗަށް ޖިނާއީ ތަހުގީގެއް ފަށައިފި އެވެ.

ފުލުހުން މި ތަހުގީގު ފެށީ އެތަނުގައި ތަކުރާރުކޮށް ހިނގި އަލިފާނުގެ ހާދިސާތަކުގައި އެތަނުގެ އިސްވެރިންގެ އިހުމާލު އޮތް ކަމަށް ބެލެވޭތީ ޖަވާބުދާރީ ކުރުވޭ ގޮތަށް ތަހުގީގު ހިންގައިދޭން ޗިލްޑްރަންސް އޮމްބަޑްސްޕާސަންގެ އޮފީހުން އެދުމުންނެވެ.

މި ތަހުގީގު މި ހަފުތާގައި ފަށާފައިވާ ކަމަށް ފުލުހުންގެ މީޑިއާ އިން ބުންޏަސް، އިތުރު ތަފުސީލެއް ނުދެ އެވެ.

ކުޑަކުދިންގެ އޮމްބަޑްސްޕާސަންސްގެ އޮފީހުން މިދިޔަ ހަފުތާގައި ނެރުނު ބަޔާނެއްގައި ބުނެފައި ވަނީ، ދައުލަތުގެ ބެލުމުގެ ދަށަށް ގެންދާ ކުޑަކުދިން ބައިތިއްބާ މަރުކަޒުތަކުގައި ތިބޭ ކުދިންނާއި މުވައްޒަފުންނާއި އަދި އެ އިމާރާތް އަލިފާނުގެ ހާދިސާތަކުން ސަލާމަތް ކުރުމަށް ބޭނުންވާ އާލަތްތައް ހުރުން ގާނޫނުތަކާއި ގަވާއިދުތަކުން ލާޒިމުކޮށްފައި ވިޔަސް ހިޔާގައި އެފަދަ އެއްވެސް ވަސީލަތެއް ނެތް ކަމަށެވެ.

އޮމްބަޑްސްޕާސަންގެ އޮފީހުން ބުނި ގޮތުގައި ހިޔާއަކީ ކުޑަކުދިން ބޭތިއްބުމަށް އެކަށީގެންވާ ތަނެއް ނޫން ކަމަށް އެ އޮފީހުން ޖެންޑާ މިނިސްޓްރީ އަށް އަންގާފައި ވިޔަސް، އެކަމަށް އެއްވެސް ސަމާލުކަމެއް ނުދީ ކުދިން ބައިތިއްބާފައިވެ އެވެ.

ދައުލަތުގެ ބެލުމުގެ ދަށުގައި ތިބޭ އުމުރުން 13-18 އަހަރާ ދެމެދުގެ ކުދިން ބެލެހެއްޓުމަށް އެންމެ ފުރަތަމަ ހާއްސަކުރި، ވިލިމާލެ ހިޔާގައި މިދިޔަ އަހަރު އަލިފާނުގެ ހަތަރު ހާދިސާއެއް ހިނގައި، އެ މަރުކަޒަށް ގެއްލުންތަކެއް ލިބިފައިވެ އެވެ. އެކަމަކު، އެއިން އެއްވެސް ހާދިސާއެއްގައި ކުއްޖަކަށް އަނިޔާއެއް ނުވެ އެވެ.

އެ މަރުކަޒު މިހާރު ހަމަޖައްސާފައި ވަނީ އުމުރުން ދުވަސްވީ މީހުންނާއި ގެވެށި އަނިޔާގެ ޝިކާރައަށް ވާ މީހުންނަށް ރައްކާތެރިކަން ފޯރުކޮށްދޭ މާހައުލެއްގެ ގޮތުގަ އެވެ. އެހެންވެ، އެންމެ ފަހުން އަލިފާން ރޯވިއިރު އެ ތަނުގައި ތިބީ ތިން ކުދިންނާއި ދެ މީހެކެވެ. ދެން ތިބި ކުޑަކުދިން ވަނީ އާއިލާތައް އަދި ރަށްރަށުގައި ގާއިމު ކޮށްފައިވާ "އަމާން ހިޔާ" ތަކަށް ބަދަލުކޮށްފަ އެވެ.

މި އަލިފާނުގެ ހާދިސާތަކާ އެކު ހިޔާގައި ބޮޑެތި މައްސަލަތަކެއް ހުރިކަން ވަނީ ހާމަވެފަ އެވެ.