ވެލެންސިއާ މޮޅުވިޔަސް މިފަހަރު އެއްވަނައަކަށް ނޭރުނު

ޓީސީ ސްޕޯޓްސް ކްލަބުގެ މައްޗަށް 2-1 ގެ ނަތީޖާއަކުން، ކްލަބް ވެލެންސިއާ މޮޅުވި ނަމަވެސް ޕްރެޒިޑެންޓްސް ކަޕުގެ ގުރޫޕް ސްޓޭޖުގައި މާޒިޔާގެ ފަހަތުގައި ވެލެންސިއާ މަޑުކުރަން ޖެހިއްޖެ އެވެ.

މިދިޔަ ތިން ހަފުތާގެ މެޗުތަކުން ވެސް، ލީގު އުސޫލުން ގުރޫޕް ސްޓޭޖް ކުރިއަށްދާ މުބާރާތުގެ، ކުރި ހޯދީ ވެލެންސިއާ އެވެ. މާޒިޔާ އާއި ވެލެންސިއާ ޕޮއިންޓުގެ ގޮތުން އެއްވާނެއްގައި ހިފަހައްޓަމުންދާއިރު އޭރު ވެލެންސިއާ އަށް ކުރި ލިބުނީ ފައިދާ ގޯލުންނެވެ. މިދެ ޓީމު ކުޅުނު ހަތަރު މެޗުން ވެސް މޮޅުވެ ޖުމުލަ 12 ޕއޮިންޓް ވަނީ ހޯދައިފަ އެވެ.

އެކަމަކު ރޭ ދަ ގްރާންޑޭއްގެ މައްޗަށް 6-1 ގެ ތަފާތު ބޮޑު ނަތީޖާ އަކުން މާޒިޔާ މޮޅުވުމުން ފައިދާ ގޯލްގައި މާޒިޔާ އިން ރަނގަޅު ހިސާބަކަށް ޖެހިލި އެވެ. ވެލެންސިއާ އިން މިއަދު ޖެހި ދެ ގޯލާ އެކު ދެ ޓީމަށް ލިބިފައިވާ ފައިދާ ގޯލް ވަނީ އެއްވަރުވެފަ އެވެ. އެކަމަކު މި ހަފުތާގައި މާޒިޔާ އަށް އެއްވަނަ ލިބެނީ ވެލެންސިއާ އަށް ވުރެ ގިނައިން ލަނޑު ޖަހައިފައިވުމުންނެވެ.

މިއަދު މެޗުގައި ފުރަތަމަ ލީޑު ނެގީ ޓީސީންނެވެ. އެޓީމުގެ ލަނޑު 39 ވަނަ މިނެޓްގައި ޖެހީ ޒަޔާން ނަސީރު އެވެ. އެކަމަކު ފުރަތަމަ ހާފުގައި ލިޑުގައި ނިންމާލުމުގެ ފުރުސަތެއް ޓީސީ އަކަށް ނުލިބުނެވެ. ފުރަތަމަ ހާފުގެ އިތުރު ވަގުތުގެ ފުރަތަމަ މިނިޓްގައި ހުސައިން ހަނާން ވެލެންސިއާ އަށް ނަތީޖާ ހަމަހަމަ ކޮށްދިނެވެ.

ވެލެންސިއާ މޮޅުކޮށްދިން ލަނޑު ދެވަނަ ހާފުގައި ޖެހީ ބޮރްހޯސް މާޓިން އެވެ. އޭނާ ލަނޑު ޖެހީ 70 ވަނަ މިނިޓްގަ އެވެ. ވެލެންސިއާ އަށް މި ހަފުތާގައި އެއްވަނަ ނުލިބުނަސް، މިދިޔަ ތިން މެޗެކޭ އެއްގޮތަށް ބަދަލު ނުވެ އޮތް ކަމަކީ އެޓީމުގެ ކެޕްޓަން، އަލީ ފާސިރު (ސެންޓޭ) ޓީމުގައި އަދާކުރި ދައުރެވެ. ވެލެންސިއާގެ މިދިޔަ ތިން މެޗުގައި ވެސް މެޗުގެ މޮޅު ކުޅުންތެރިޔާގެ މަގާމު ހޯދި ސެންޓޭ، މިއަދުގެ މެޗުގައި ވެސް އެ މަގާމު ހޯދި އެވެ.