ޕްރެޒިޑެންޓްސް ކަޕްގައި ޓީސީން އީގަލްސް ބަލިކޮށްފި

ޕްރެޒިޑެންޓްސް ކަޕްގައި މިރޭ، ކްލަބް އީގަލްސްގެ މައްޗަށް 1-0 ގެ ނަތީޖާއަކުން، ޓީސީ ސްޕޯޓްސް ކްލަބުން، ކާމިޔާބު ހޯދައިފި އެވެ.

މެޗުގައި ތަފާތަކަށް ފެނުނީ ޓީސީ އަށް ލިބުނު ޕެނަލްޓީ އެވެ. މެޗުގެ 80 ވަނަ މިނެޓްގައި ޓީސީ އަށް ޕެނަލްޓީ ލިބުނީ އެ ޓީމު އަބްދުލް ވާހިދު އިބްރާހިމް (ވާޑް) އަށް އީގަލްސްގެ ޕެނަލްޓީ އޭރިއާގެ ތެރެއިން އަބްދުﷲ ސަމީހް މޫސާ ފައުލް ކުރުމުންނެވެ.

ޕެނަލްޓީ ވައްދާލައި ޓީސީ އަށް ލަނޑު ޖަހަިދިނީ ހުސައިން އީނާޒް އެވެ. އޭނާ ޕެނަލްޓީ ފޮނުވާލީ އީގަލްސްގެ ލުބުނާންގެ ކީޕަރު މުހައްމަދު ތޯހާ އަށް މިސްރާބު އޮލޫވާލުމަށް ފަހު އެވެ.

މެޗުގައި އީގަލްސްގެ ހަސަން ރާއިފް އަހްމަދު އަށް ވެސް ލަނޑު ޖަހާނެ ފުރުސަތުތައް ލިބުނެވެ. މެޗުގައި ފެނުނު އަނެއް މައްސަލަ އަކީ ގިނަ ކުޅުންތެރިންނަށް ކުދިކުދި އަނިޔާގެ މައްސަލަތައް ކުރިމަތި ވުމެވެ.

އާ ސީޒަނަށް އީގަލްސް ވެސް އަދި ޓީސީ ވެސް ނުކުތީ އެންމެ އެކަށީގެންވާ ޕްރެކްޓިސްތަކެއް ކުރުމަށް ފަހު އެއް ނޫނެވެ. ދެ ޓީމުން ކުރެ އެއްްވެސް ޓީމަކަށް ޕްރީ ސީޒަނަނެއް ހަދާކަށް ވަގުތެއް ނުހޯދުނެވެ.

ޕްރެޒިޑެންޓް ކަޕް މެޗެއް ދެން އޮންނާނީ އަންނަ ހުކުރު ދުވަހު އެވެ. ހުކުރު ދުވަހު ހަވީރު ކުޅޭ މެޗުގައި ވާދަ ކުރާނީ، ސުޕަ ޔުނައިޓެޑް ސްޕޯޓްސް އާއި ޓީސީއެވެ. އެ ރޭ ކުޅޭ މެޗުގައި ވާދަ ކުރާނީ މާޒިޔާ އާއި އީގަލްސް އެވެ.