ކްލަބްހައުސް ބްލޮކެއް ނުކުރަން، ދިމާވެގެން އުޅެނީ ޓެކްނިކަލް މައްސަލައެއް: ކޭމް

ކުއްލިއަކަށް ބޮޑު މަގުބޫލުކަމެއް ހޯދާފައިވާ އޯޑިއޯ ޗެޓް އެޕްލިކޭޝަން "ކްލަބްހައުސް" އިން ރާއްޖެ ބްލޮކް ނުކުރާ ކަމަށާއި އެ އެޕްއަށް ނުވަދެވެނީ ޓެކްނިކަލް މައްސަލަތަކެއްގެ ސަބަބުން ކަމަށް ކޮމިއުނިކޭޝަން އޮތޯރިޓީ އޮތް މޯލްޑިވްސް (ކޭމް) އިން މިއަދު ބުނެފި އެވެ.

އެކި މައުލޫތަކުގައި ސައްލާކުރާ ޕްލެޓްފޯމަކަށް ވެފައިވާ ކްލަބްހައުސް އަށް މިއަދު ނުވަދެވި ބައެއް މީހުން ތުހުމަތުކޮށްފައިވާ ގޮތުގައި ރާއްޖޭން ވަނީ އެ އެޕްލިކޭޝަން ބްލޮކް ކޮށްފަ އެވެ. މިއީ ހިޔާލު ފާޅުކުރުމުގެ މިނިވަންކަމަށް ހުރަސް އެޅުން ކަމަށް ވެސް އެ މީހުން ބުނެފައިވެ އެވެ.

ކްލަބްހައުސް އަށް މިހާރު ވަދެވެނީ ވީޕީއެން މެދުވެރިކޮށް އެކަންޏެވެ.

ނަމަވެސް ކޭމްގެ ސީއީއޯ އިލްޔާސް އަހުމަދު ވިދާޅުވީ ކްލަބްހައުސް ބްލޮކް ނުކުރާ ކަމަށާއި އެ އެޕަށް ދިމާވެގެން އުޅެނީ ޓެކްނިކަލް މައްސަލަތަކެއް ކަމަށެވެ.

ކްލަބް ހައުސް އަށް ނުވަދެވޭ ގޮތް ވީ ޣައިރު ދީން ފެތުރުމަށް ދިވެހިންނަށް އަމާޒުކޮށް އިންޓަނެޓްގައި އާންމުކުރާ ކޮންޓެންޓް ބްލޮކް ކުރުމަށް ކޯޓު އަމުރެއް ނެރެފައި ވަނިކޮށެވެ. ނަމަވެސް އިލްޔާސް ވިދާޅުވީ މ އަމުރާ ގުޅިގެން ވެސް ކްލަބް ހައުސް ބްލޮކް ނުކުރާ ކަމަށެވެ.

މުވާސަލާތީ ހިދުމަތްދެމުން އަންނަ އުރީދޫން ވެސް ވަނީ ކްލަބްހައުސް އެޕުގައި މައްސަލަތަކެއް އުޅޭތީ އެކަން ކަސްޓަމަރުންގެ ސަމާލުކަމަށް ގެނެސްފަ އެވެ.