އިޒްރޭލުން އީރާނަށް ހަމަލާއެއް ދިނުމަކީ ނަރަކައިގެ ދޮރު ހުޅުވައިލުން

އިޒްރޭލުން އީރާނަށް އުދުވާނީ ހަމަލާއެއް ދިނުމަކީ، އިޒްރޭލުން އަމިއްލައަށް ނަރަކައިގެ ދޮރު ހުޅުވައިލުން ކަމަށް އީރާނުން އިންޒާރުކޮށްފި އެވެ.

އީރާންގެ ނިއުކްލިއާ ކާރުހާނާތަކަށް ހަމަލާއެއް ދިނުމުގެ ތަމްރީންތަކެއް ބޭއްވުމާ ބެހޭ ގޮތުން އިޒްރޭލާއި އެމެރިކާގެ ދިފާއީ ވަޒީރުން މިދިޔަ ހަފުތާގައި ވަނީ މަޝްވަރާ ކުރައްވައިފަ އެވެ. އެމެރިކާގެ ވޮޝިންޓަންގައި ބޭއްވި އެ މަޝްވަރާތަކަށް އިޝާރާތް ކުރައްވައި، އީރާންގެ ދާހިލީ ވަޒީރު އަހްމަދު ވަހީދީ ވިދާޅުވި ގޮތުގައި އިޒްރޭލުން އީރާނަށް ދޭ އިންޒާރުތަކަކީ އާ އިންޒާރުތަކެއް ނޫނެވެ.

ކިތަންމެ ވަރަކަށް އިންޒާރު ދިން ނަމަވެސް، އީރާނާ ދެކޮޅަށް އެފަދަ ފިޔަވަޅެއް އަޅަން އިޒްރޭލަށް ނުކުރޭނެ ކަމަށް ވެސް އޭނާ ވިދާޅުވި އެވެ. ސަބަބެއް ކަމަށް އޭނާ ވިދާޅުވީ، އީރާނާ ދެކޮޅަށް އިޒްރޭލުން އަޅާ ފުރަތަމަ ފިޔަވަޅަކީ، އެންމެ ފަހު ފިޔަވަޅަށް ވާނެކަން އިޒްރޭލަށް ރަނގަޅަށް އެނގޭނެތީ އެވެ.

ދާހިލީ ވަޒީރު ވިދާޅުވި ގޮތުގައި އީރާނާއި އީރާންގެ ބައިވެރިން މިހާރު އިންތިޒާރު ކުރަމުން ދަނީ، އިޒްރޭލުން އަމިއްލަ އަށް ގޯހެއް ހަދައި، އަމިއްލަ އަށް ނަރަކައިގެ ދޮރު ހުޅުވާނެ ވަގުތަކަށެވެ. ނިއުކްލިއާ މަޝްރޫއާ ގުޅޭ މަޝްވަރާތައް މެދުކެނޑިފައި އޮތް ދަނޑިވަޅު ބަލައި، އެމެރިކާ އާއި އިޒްރޭލުން މިހާރު ވަނީ އީރާނަށް އިތުރަށް ފިއްތުންތައް ކުރިމަތިކުރަން ފަށާފައި ކަމަށް ވެސް އޭނާ ވިދާޅުވި އެވެ.

އީރާނުން ބުނާ ގޮތުގައި އެ ގައުމުގެ ނިއުކްލިއާ ކާރުހާނާތަކަށް އިޒްރޭލުން ހަމަލާއެއް ދިނުމަކީ އިޒްރޭލުގެ ނެތިދިއުމަށް ވާނެ އެވެ. އަދި އީރާން އޮތީ އިޒްރޭލު ސުންނާފަތިކޮށްލުމަށް ފުރިހަމައަށް ތައްޔާރުވެގެން ކަމަށް ވެސް އީރާނުން ބުނެ އެވެ.

އީރާންގެ އިންގިލާބީ ލަޝްކަރުގެ ކޮމާންޑަރުގެ ނާއިބު އަލީ ފަދުވީ ވިދާޅުވި ގޮތުގައި އިޒްރޭލުން އީރާނަށް ދޭ އިންޒާރުތައް ތަންފީޒު ކުރުމަކީ އިޒްރޭލު ކުރަން ބޭނުންވާ ކަމެއް ނޫނެވެ. އަދި އީރާނަށް އެއްވެސް އުދުވާނީ ހަމަލާއެއް ދީފި ނަމަ، އިޒްރޭލު ބިމާ ހަމަކޮށްލުމަށް އީރާން އޮތީ ތައްޔާރަށް ކަމަށް ވެސް އޭނާ ވިދާޅުވި އެވެ.

"މުޑުދާރު އިޒްރޭލުން އެ އިންޒާރުތައް ދެމުން އަންނަތާ މިހާރު 43 އަހަރުވެއްޖެ. އެކަމަކު ވެސް އެ އިންޒާރުތައް ތަންފީޒު ކުރާކަށް އިޒްރޭލަކަށް ނުކެރޭނެ. އެފަދަ އުދުވާނެއް ދޭން ވިސްނާއިރު ވެސް އިޒްރޭލަށް އެނގޭނެ، އިޒްރޭލު ނެތި ފަނާވެގެން ދާނެކަން،" އަލީ ފަދުވީ ވިދާޅުވި އެވެ.

"އަމިއްލަ ނަފުސުގެ ހިމާޔަތަށް ބޮޑުފާރު ނާރައިގެން ތިބި ބަޔަކު ކިހިނެއް އީރާނަށް ހަމަލާއެއް ދޭނީ. މާތް ﷲގެ އިރާދަފުޅުން، އިޒްރޭލު ނެތިދިއުން އަވަސްވުމަށްޓަކައި، އެފަދަ ހަމަލާއެއް ދިނުމަށް އިޒްރޭލަށް މަޖުބޫރުވެދާނެ. އޭގެ ނަތީޖާއަކަށް ވާނީ، މި ވުޖޫން އިޒްރޭލު ފުހެވިގެން ދިއުން."