ލަވަކިޔުންތެރިޔާ ފަތޯގެ އަތް ބިންދާލުމުން އޮޕަރޭޝަން ނުކުރެވި ހޮސްޕިޓަލުގައި

އާއިލީ ހަމަނުޖެހުމެއްގެ ތެރޭ، ލަވަކިޔުންތެރިޔާ ފަތުހުﷲ އަބްދުލް ފައްތާހު (ފަތޯ)ގެ އަތް ބިންދާލުމުން ފަރުވާ ހޯދަން އައިޖީއެމްއެޗަށް ދިޔަ ނަމަވެސް އަތުގެ އޮޕަރޭޝަން ލަސްވެ އަތަށް އިތުރު ގެއްލުންވާ ކަމަށް ބުނެ އޭނާ ކަންބޮޑުވުން ފާޅުކޮށްފި އެވެ.

ފަތޯ "މިހާރު" އަށް ބުނީ، މި މަހުގެ ތިން ވަނަ ދުވަހު އޭނާގެ އަތް ބިންދާލީ ހިނގި ހަމަނުޖެހުމެއްގައި އޭނާގެ ބޭބެ ކަމަށެވެ. ގަސްތުގައި އަތުގައި ހިފައި އަތް ބިންދާލި މައްސަލަ ފުލުހަށް ހުށަހަޅާފައި ވިޔަސް އެ މައްސަލަ އެކަށީގެންވާ ގޮތެއްގައި ނުބަލާ ކަމުގެ ހިތްހަމަނުޖެހުން ވެސް އޭނާގެ އެބަ އޮތެވެ. ފަތޯ ބުނި ގޮތުގައި ބޭބެގެ ފަރާތުން ގެވެށި އަނިޔާ ލިބެމުންދާތާ މިހާރު ވަރަށް ގިނަ ދުވަސްވެއްޖެ އެވެ.

އަތް ބިންދާލުމުން އެކަނިމާއެކަނި އެންމެ ފުރަތަމަ ދިޔައީ ވިލިމާލޭ ހޮސްޕިޓަލަށް ކަމަށާއި ފަހުން އައިޖީއެމްއެޗްއަށް ބަދަލު ކުރީ ކަމަށް އޭނާ ކިޔައިދިނެވެ.

"އެކަނިމާއެކަނި އަހަރެން ހޮސްޕިޓަލަށް އައީ ބިނދިފަ އޮތް އަތަކާ އެއްކޮށް،" ފަތޯ ކިޔައިދިނެވެ.

ފަތޯގެ އަތުގެ އެކްސްރޭއިން ފެންނަ ގޮތުގައި އޭނާގެ ވައަތުގެ ކޮނޑުހުޅާއި އުޅަނބޮއްޓާ ދެމެދުން ވަނީ ބިންދައިގެން ގޮސްފަ އެވެ. އެ އަތް އޮޕަރޭޝަންކޮށް ބޮލްޓު އަޅަން ޖެހިފައިވާ ކަމަށް ޑޮކްޓަރުންނާ ހަވާލާދީ އޭނާ ބުންޏެވެ.

ފަތޯ ބުނީ، އޭނާގެ ސާޖަރީ މިއަދަށް ޝެޑިއުލްކުރި ނަމަވެސް އިމަޖެންސީ އެހެން އޮޕަރޭޝަންތަކެއް ކުރަން ޖެހިގެން މިއަދު އޭނާގެ އޮޕަރޭޝަން ނުކުރެވުނީ ކަމަށެވެ. މިއަދު އޮޕަރޭޝަން ކުރަން، ޑޮކްޓަރުންގެ ލަފާ ދިން ގޮތަށް، ނުކައިނުބޮއެ ހުރި ނަމަވެސް، އޮޕަރޭޝަން ނުކުރެވުމުން އޭނާ ހުރީ ހިތްހަމަނުޖެހިފަ އެވެ.

އައިޖީއެމްއެޗްގައި އޮތޮޕެޑިކް ސާޖަރީތައް ކުރަނީ އަންގާރަ ދުވަހާއި ހޮނިހިރު ދުވަހު އެކަނި ކަމަށް ވާތީ މިހާރު ޖެހިފައި ވަނީ އެއިން ދުވަހަކަށް އިންތިޒާރުކުރަން ކަމަށް އޭނާ ބުންޏެވެ.

"ހޮސްޕިޓަލުން ބުނަނީ އޮތޯއަށް އެލޮކޭޓް ކޮށްފައި އިންނަނީ ވީކްލީ ދެ ދުވަހޯ. އެގޮތަށް ޑިޕާޓްމެންޓުތަކަށް ހުންނަނީ އެލޮކޭޓުކޮށްފައޯ ފެސިލިޓީތައް،" ފަތޯ ކިޔައިދިނެވެ.

ލަވަ ކިޔުމުގެ އިތުރުން ގިޓާ ވެސް ކުޅޭ ފަތޯ ބުނީ އަތުގެ ކަށިގަނޑު އެއްކޮށް ވަކިވެފައި ވާތީ، ނާރުގެ މައްސަލަތައް ދިމާވެ އަތުގެ ހަރަކާތް ގެއްލިދާނެ ކަމުގެ ކަންބޮޑުވުން އެބަ އޮތް ކަމަށެވެ. މިހާރު ވެސް އަތް ދުޅަވެ، އެ އަތުގެ އިނގިލިތަކުން ހަރަކާތް ކުރަން ދަތި ކަމަށް އޭނާ ބުންޏެވެ.

"މިތަނުގައި އެ މީހުން އަހަރެން ބަހައްޓާ ކޮންމެ ދުވަހަކީ އަހަންނަށް ލިބޭ ވޭނާއި ގެއްލުން އިތުރުވާ ދުވަހެއް. އެ މީހުން އަހަރެންގެ ސާޖަރީ ލަސް ކުރަމުން ގޮސް އިނގިލިތަކުގެ ހަރަކާތް ހުއްޓިއްޖެއްޔާ ދެން ހަދާނީ ކިހިނެއް؟ ކާކު އެކަމަށް ޒިންމާވާނީ،" ފަތޯ މިއަދު ކުރި ފޭސްބުކް ޕޯސްޓުގައި ބުންޏެވެ.

މި އަނިޔާ އަކީ އޭނާގެ މަސައްކަތަށް އެޅިފައިވާ ހުރަހެކެވެ. ފަތޯ ބުނި ގޮތުގައި އޭނާ ބޭނުންވަނީ އަވަހަށް ރަނގަޅުވެގެން އަނބުރާ މިއުޒިކް ކުޅުމަށެވެ. ރިޒޯޓުތަކުގައި މިއުޒިކް ކުޅުމަކީ އޭނާ އާމްދަނީ ހޯދަން ކުރާ މަސައްކަތެކެވެ.

މިހާރު ފަތޯ ހޮސްޕިޓަލުގައި ބާއްފައި އޮތީ ކަށިގަނޑުތައް އެއްވަރުކޮށް ކާސްޓެއް ލައްވައިފަ އެވެ.

ފަތޯ އަކީ ގިނަ އަދަދެއްގެ އަމިއްލަ ރާގުތައް ވެސް ހަދައި މަގުބޫލުކަން ހޯދާފައިވާ ލަވަކިޔުންތެރިއެކެވެ.