ބޮމުގެ ހަމަލާގެ ތަހުގީގަށް ނަޝީދު ބަޔާން ދެއްވައިފި

ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާގެ ތަހުގީގަށް އެމަނިކުފާނު ބަޔާން ދެއްވައިފި އެވެ.

ނަޝީދު ދިރިއުޅުއްވި ގ. ކެނެރީގެ ކައިރީގައި ޕާކު ކޮށްފައި ހުރި ސައިކަލެއްގައި އެއްޗެއް ގޮއްވާލައިގެން ދިން ޓެރަރިސްޓް ހަމަލާއާ ގުޅިގެން އެމަނިކުފާނަށް އަނިޔާތަކެއް ލިބިވަޑައިގެންފައިވެ އެވެ. އެ މައްސަލާގެ ތަހުގީގަށް ނަޝީދުގެ ބަޔާނެއް ހޯދަން ފުލުހުން ކުރިން ވެސް އޮތީ އެދިފަ އެވެ. އެހެން ނަމަވެސް ހަމަލާއަށްފަހު އެމަނިކުފާނުގެ ފަރުވާއަށް ގިނަ ދުވަސްތަކެއް ވަންދެން ރާއްޖެއިން ބޭރުގައި ހުންނެވުމުން ބަޔާނެއް މިހާތަނަށް އޮތީ ނުދެއްވި އެވެ.

ނަޝީދުގެ ފަރާތްޕުޅުން ފުލުހުންގެ ތަހުގީގަށް ބަޔާން ދިނީ މިއަދު އެވެ.

ނަޝީދު ރާއްޖެއިން ބޭރުގައި ހުންނަވަނިކޮށް އެމަނިކުފާނުގެ ބަޔާނެއް އީމެއިލް ނުވަތަ ސިޓީ މެދުވެރިކޮށް ވެސް ހޯދަން ފުލުހުން ކުރިން މަސައްކަތްކުރި އެވެ.

ނަޝީދަށް ދިން ހަމަލާއާ ގުޅިގެން ނުވަ މީހަކަށް ދައުލަތުން ވަނީ ދައުވާކޮށްފަ އެވެ. އޭގެ ތެރެއިން ބޮން ގޮއްވުމުގައި އަމަލީ ގޮތުން ބައިވެރިވި ކަމަށް ތުހުމަތު ކުރެވޭ ވ. ތިނަދޫ ހިޔާ، އަހުމަދު އަދުހަމް ރަޝީދާއި ބޮން ހެދުމުގައި ހަރަކާތްތެރިވި މީހުންނާއި ބޮން ހަރުކުރި ސައިކަލު ގެނެސް ބެހެއްޓުމުގައި ބައިވެރިވި މީހުންނާއި އެ މީހުން ފިލުވުމުގައި އެހީތެރިވި މީހުން ވެސް ހިމެނެ އެވެ. އެ މައްސަލަތަކުގެ ޝަރީއަތް ކްރިމިނަލް ކޯޓުގައި ދަނީ ކުރިއަށެވެ.