ބޮމުގެ މައްސަލާގައި ފާތިހު ހައްޔަރު ކުރިއިރު އޭނާއަކީ ފުލުހެއް ނޫން: ޕޮލިސް

ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ދިން ބޮމުގެ ހަމަލާގެ ތުހުމަތުގައި ހައްޔަރުކުރި އަހުމަދު ފާތިހު އޭރު ހުރީ ފުލުހުންގެ ވަޒީފާގައި ކަމަށް ދެކެވޭ ވާހަކަތައް ފުލުހުން އަނެއްކާވެސް ދޮގުކޮށްފި އެވެ.

މިދިޔަ އަހަރުގެ މެއި މަހު ނަޝީދު އަވަހާރަކޮށްލަން ބޮމެއް ގޮއްވާލި މައްސަލާގައި ހައްޔަރުކުރި ލ. ގަން، ދުންފިނިއުފާ، ފާތިހު ހައްޔަރު ކުރިޔަސް، އޭނާގެ މައްޗަށް ދައުވާ ކުރެވޭނެ ހެއްކެއް ނެތުމުން ފަހުން ވަނީ ދޫކޮށްލައިފަ އެވެ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ނުރަސްމީ ޓްވިޓާ އެކައުންޓެއް ކަމަށް ބުނާ އެކައުންޓަކުން ދެއްކި ވާހަކަތަކާ ގުޅިގެން ފުލުހުން މިރޭ ނެރުނު ބަޔާނުގައި ބުނީ ނޮވެމްބަރު، 2018 ގައި ފުލުހުންގެ ވަޒީފާއާ ފާތިހު ގުޅުނަސް، ފެބްރުއަރީ، 2021 ގައި އޭނާ ފުލުހުންގެ ވަޒީފާއިން ވަކިވެފައިވާ ކަމަށެވެ. އަދި އެކަން ކުރިން ވެސް މީޑިއާގައި ބުނެފައިވާކަން ފުލުހުން ފާހަގަކުރި އެވެ.

ފާތިހަކީ ހަމަލާ ދިން މީހުންނަށް އެހީވި އަދި އޭރު ވެސް ފުލުހެއް ކަމަށް ބުނެ ސޯޝަލް މީޑިއާގައި ވާހަކަ ދެއްކީ ހަމަލާގެ ހަގީގަތް ފޮރުވަން މަސައްކަތްކުރާ ކަމަށް ތުހުމަތުކޮށް، ހަމަލާއަށް އަހަރު ވުމާ ދިމާކޮށެވެ.

އެ ބަޔާނުގައިވާ ގޮތުން ފާތިހުގެ މައްޗަށް ދައުވާކުރަން ޕްރޮސެކިއުޓާ ޖެނެރަލްގެ އޮފީހަށް ފޮނުވިޔަސް، އޭނާގެ މައްޗަށް ދައުވާ ކުރެވޭނެ ހެއްކެއް ނެތް ކަމަށް އެ އޮފީހުން އޮތީ ނިންމައިފަ އެވެ. އެހެންވެ، މައުލޫމާތު ފެތުރުމުގެ ކުރިން ސައްހަ މައުލޫމާތު ހޯދަން އެ ބަޔާނުގައި އިލްތިމާސް ކޮށްފައިވެ އެވެ.

ނަޝީދަށް ދިން ހަމަލާއާ ގުޅިގެން 10 މީހެއްގެ މައްޗަށް ދައުލަތުން ދައުވާކުރެ އެވެ. އޭގެ ތެރެއިން ބޮން ގޮއްވުމުގައި އަމަލީ ގޮތުން ބައިވެރިވި އަދުހަމް މުހައްމަދުގެ މައްޗަށް ކުށް ސާބިތުވެ، 23 އަހަރުގެ ޖަލު ހުކުމެއް އިއްވާފައިވާއިރު ދެން ތިބި މީހުންގެ ޝަރީއަތް ދަނީ ކުރިއަށެވެ.