އާބާދީގެ ދެބައިކުޅަ އެއްބައި ކޮވިޑް ވެކްސިންގެ އެއް ޑޯޒް ޖަހައިފި

ކޮވިޑް-19 އިން ދިފާއުވުމަށް އުފެއްދި ކޮވިޑް ވެކްސިންތައް އަޖުމަބެލުމުގެ މަރުހަލާ އަށް ފަހު، ބޭނުންކުރަން ފެށިތާ 11 މަސް ފުރިހަމަވާން ދާއިރު، ދުނިޔޭގެ އާބާދީގެ ގާތްގަނޑަކަށް ދެ ބައިކުޅަ އެއްބައި މީހުން ކޮވިޑް ވެކްސިންގެ، މަދުވެގެން އެއް ޑޯޒް ޖަހާފައިވާ ކަމަށް ދިރާސާއަކުން ދައްކައިފި އެވެ.

ދިރާސާގައި ބުނެފައިވާ ގޮތުން، ކޮވިޑް ވެކްސިންގެ އެއް ޑޯޒް ޖެހި މީހުންގެ އަދަދު، ދުނިޔޭގެ ދެބައިކުޅަ އެއްބައި މީހުންގެ އަދަދާ ހަމަވެފައިވަނީ މިދިޔަ ހުކުރު ނުވަތަ ބުރާސްފަތި ދުވަހު އެވެ. މި ދިރާސާކުރީ އިނގިރޭސި ވިލާތުގެ އޮކްސްފޯޑް ޔުނިވާސިޓީއާ ގުޅިގެން، ދުނިޔޭގެ ބޮޑެތި ކަންކަމާ ގުޅޭ މައުލޫމާތު އެއްކުރާ ގުރޫޕެއް ކަމަށްވާ، އަވާ ވޯލްޑް އިން ޑާޓާ ޕްރޮޖެކްޓުންނެވެ.

މި ދިރާސާގައި ބުނެފައިވާ ގޮތުން، މި މަހުގެ 7 ވަނަ ދުވަހުގެ ނިޔަލަށް، ދުނިޔޭގެ އެކި ގައުމުތަކުގައި 7.28 ބިލިއަން ޑޯޒް ކޮވިޑް ވެކްސިން ޖަހައިފި އެވެ. އެ އަދަދަށް ބަލާއިރު، 4.02 ބިލިއަން މީހުން މިހާރު ތިބޭނީ ކޮވިޑް ވެކްސިންގެ އެއް ޑޯޒް ޖަހާފައި ކަމަށް އެ ދިރާސާގައި ބުނެފައިވެ އެވެ. އެއީ ދުނިޔޭގެ އާބާދީގެ ދެ ބައިކުޅަ އެއް ބައެވެ.

ކޮވިޑް ވެކްސިންގެ ދެ ޑޯޒް ފުރިހަމަ ކުރި މީހުންގެ އަދަދަކީ، މިމަހު 7 ގެ ނިޔަލަށް، 3.31 ބިލިއަން މީހުންނެވެ. އެއީ ދުނިޔޭގެ އާބާދީގެ 39.7 ޕަސެންޓް މީހުންނެވެ.

ދުނިޔޭގެ އާބާދީގެ ދެ ބައިކުޅަ އެއްބައި މީހުން ކޮވިޑް ވެކްސިން ޖަހާފައި ވިޔަސް، ބައެއް ގައުމުތަކުގައި ކޮވިޑް ވެކްސިން ޖެހި މީހުންގެ އާބާދީ ވަރަށް މަދެވެ. މުއްސަނދި ގައުމުތަކުގެ އާބާދީގެ ބޮޑު ޕަސެންޓެއް ކޮވިޑް ވެކްސިންގެ ދެ ޑޯޒް ފުރިހަމަ ކޮށްފައިވާ އިރު، ފަގީރު ގައުމުތަކުގެ ގިނަ މީހުން އަދިވެސް ތިބީ ކޮވިޑް ވެކްސިންގެ އެންމެ ޑޯޒެއް ވެސް ޖެހޭނެ ގޮތް ނުވެފަ އެވެ.

މި ދިރާސާގައި ބުނެފައިވާ ގޮތުގައި ކޮވިޑް ވެކްސިން އެކި ގައުމުތަކަށް ބެހިގެން ގޮސްފައިވަނީ އެއްވެސް ހަމަހަމަކަމެއް ނެތި އެވެ. މުއްސަނދި ގައުމުތަކުގެ ގިނަ ބަޔަކު ވެކްސިންގެ ދެ ޑޯޒް ފުރިހަމަ ކޮށްފައިވާ އިރު، އެންމެ ފަގީރު ގައުމުތަކުން ވެކްސިންގެ އެއް ޑޯޒް ޖަހާފައިވަނީ އާބާދީގެ އެންމެ 4.1 ޕަސެންޓް މީހުންނަށެވެ.

އެމެރިކާގެ އާބާދީގެ 67.4 ޕަސެންޓް މީހުން ވެކްސިންގެ އެއް ޑޯޒް ޖަހާފައިވާ އިރު، ދެ ޑޯޒް ފުރިހަމަކުރި މީހުންގެ ނިސްބަތް މިހާރު ހުރީ 58.4 ޕަސެންޓުގަ އެވެ. އެމެރިކާގައި މި ނިސްބަތް މައްޗަށް ނުދަނީ އެ ގައުމުގައި ވެކްސިން ނެތިގެންނެއް ނޫނެވެ. އެމެރިކާގެ މުޅި އާބާދީއަށް ވާވަރަށް ވުރެ އިތުރަށް ވެސް އެ ގައުމުގައި ވެކްސިން އެބަހުރި ކަމަށް ތަފާސްހިސާބުތައް ދައްކަ އެވެ.

އެމެރިކާގައި އެންމެ ގިނަ ބަޔަކު ވެކްސިން ޖަހާފައި ވަނީ މެސެޗޫސެޓްސް އިންނެވެ. އެ ސްޓޭޓްގެ 77 ޕަސެންޓް މީހުން ވެކްސިންގެ އެއް ޑޯޒް ޖަހާފައިވާ އިރު ދެ ޑޯޒް ހަމަކުރީ 68.9 ޕަސެންޓް މީހުންނެވެ.