ސެލްޓާ އިން ބާސާ ހިފަހައްޓައިފި، ރެއާލް އެއްވަނަ އަށް

ވީގޯ (ނޮވެމްބަރު 7) - ސްޕެނިޝް ލަލީގާގައި ރޭ ސެލްޓާ ވީގޯ އިން ފަހަތުނަ އަރައި ދެވަނަ ހާފުގައި ޖެހި ލަނޑުތަކުން ބާސެލޯނާއާ އެއްވަރުކުރިއިރު، ހަނި ގޮތަކަށް ރަޔޯ ވަޔެކާނޯ ބަލިކޮށް، ރެއާލް މެޑްރިޑް އަލުން އެއްވަނަ އަށް ޖެހިލައިފި އެވެ.

ސެލްޓާ ވީގޯ އިން ބާސެލޯނާ ހުއްޓުވީ، ފުރަތަމަ ހާފުގައި ބާސެލޯނާ ތިން ގޯލު ޖަހައިފައި ވަނިކޮށް، ދެވަނަ ހާފުގައި ތިން ގޯލު ޖަހައި 3-3 އިން އެއްވަރު ކޮށްގެންނެވެ.

ބާސާއިން ވަނީ އެ ޓީމުގެ ހުސްވެފައިވާ ކޯޗުގެ މަގާމަށް ކުރީގެ ކެޕްޓަން ޒަވީ ހަމަޖެއްސި ކަން ޔަގީން ކޮށްދީފަ އެވެ. އޭނާ ރަސްމީކޮށް ޓީމާ ހަވާލުވާނީ މާދަމާ ކަމަށް މީޑިއާ ރިޕޯޓްތައް ބުނެ އެވެ.

ފުރަތަމަ ހާފުގައި ބާސާ އަށް ލީޑު ނަގައިދިނީ ފަސްވަނަ މިނިޓުގައި އަންސޫ ފާޓީ އެވެ. ދެވަނަ ލަނޑު 18 ވަނަ މިނިޓުގައި ސާޖިއޯ ބުސްކެޓްސް ޖެހިއިރު، ތިންވަނަ ލަނޑު 34 ވަނަ މިނިޓުގައި ޖެހީ މެމްފިސް ޑިޕާއި އެވެ.

މި ހާފުގައި ތިން ގޯލުގެ ލީޑެއް ނެގި ނަމަވެސް ފަހު ހާފުގައި ސެލްޓާ އިން ވަނީ ކުޅުން ރަނގަޅުކޮށް ތިން ގޯލު ޖަހައި، އެ ޓީމުގެ ދަނޑުގައި ބާސެލޯނާ މޮޅުވިޔަ ނުދީ ހިފަހައްޓައިފަ އެވެ. ސެލްޓާގެ ލަނޑުތައް ޖަހައިދިނީ އިއާގޯ އަސްޕަސް އާއި ކުރިން ބާސެލޯނާއަށާއި އިނގިރޭސި ކްލަބް މެންޗެސްޓާ ސިޓީ އަށް ވެސް ކުޅުނު ވިންގާ ނޮލީޓޯ އެވެ. އަސްޕަސް ދެ ލަނޑު ޖެހިއިރު، އެއްވަރު ކުރި ލަނޑު ޖެހީ ފުރިހަމަ ވަގުތު ހަމަވެގެން ދެއްކި އިތުރު ވަގުތުގެ ހަވަނަ މިނިޓުގަ އެވެ.

މި ނަތީޖާއާއެކު، ލީގު ތާވަލުގައި ބާސާގެ މަގާމަށް ބަދަލެއް ނައިސް، ނުވަވަނައިގައި އޮތްއިރު، ރެއާލް މެޑްރިޑް އެއްވަނަ އަށް ޖެހިލީ ރެއާލް ވަޔެކާނޯ 2-1 އިން ބަލި ކޮށްގެންނެވެ.

ރެއާލް މެޑްރިޑްގެ ދެ ލަނޑު ވެސް ޖެހީ ފުރަތަމަ ހާފުގަ އެވެ. މެޗުގެ 14 ވަނަ މިނިޓުގައި ޓޯނީ ކްރޫސް ލީޑު ނަގައިދިން އިރު، ދެވަނަ ލަނޑު 38 ވަނަ މިނިޓުގައި ޖެހީ ކެޕްޓަން ކަރީމް ބެންޒެމާ އެވެ. މިއީ ލީގުގައި މި ސީޒަނުގައި ބެންޒެމާ ޖެހި 10 ވަނަ ލަނޑެވެ.

ވަޔެކާނޯ އަށް އެއްވަރު ކޮށްދިނީ މެޗު ނިމެން 13 މިނިޓަށް ވެފައި ވަނިކޮށް، ބަދަލު ކުޅުންތެރިޔެއް ގޮތުގައި ކުޅެން އެރި ރަޑަމެލް ފަލްކާއޯ އެވެ. ބާކީ ވަގުތުގައި އެއްވަރު ނުކުރެވުމުން ވަޔެކާނޯ އޮތީ ތާވަލުގެ ހަވަނައިގަ އެވެ.

ރެއާލް އިން މި މޮޅާ އެކު ދެ ވަނައިގައި އޮތް ރެއާލް ސޮސިއެޑާޑްގެ ކުރީގައި ދެ ޕޮއިންޓްގެ ލީޑެއް ނެގިއިރު، ތިންވަނައިގައި އޮތް ސެވިއްޔާ މިރޭ، ފަސްވަނައިގައި އޮރް ތެއާލް ބެޓިސް އާ ވާދަކޮށް މޮޅު ވެއްޖެ ނަމަ ޕޮއިންޓުގެ ގޮތުން ރެއާލް އާ އެއްވަރު ވާނެ އެވެ.