ފިލްމުތަކުގައި ދެން އަސްލު ބަޑި ނުގެންގުޅޭނަން: ރޮކް

ކުޅޭ ފިލްމުތަކާއި އަމިއްލަ ފިލްމު ކުންފުނި ސެވަން ބަކްސް ފިލްމްސްގެ އެއްވެސް ޕްރޮޑަކްޝަނެއްގައި ކުރިއަށް އޮތް ތަނުގައި އަސްލު ބަޑި ބޭނުން ނުކުރާނެ ކަމަށާއި އޭގެ ސަބަބުން ނުކުމެދާނެ ހިތި ނަތީޖާ މިދިޔަ މަހުގެ ތެރޭގައި ފެނިގެން ގޮސްފައިވާ ކަމަށް ހޮލީވުޑްގެ މަޝްހޫރު އެކްޓަރު ޑްވޭން ޖޯންސަން (ރޮކް) ބުނެފި އެވެ.

މިދިޔަ މަހުގެ ތެރޭގައި އެކްޓަރު އެލެކް ބޯލްޑްވިންގެ ފިލްމު "ރަސްޓް" ގެ ސެޓްގައި އޭނާ ބޭނުންކުރި އަސްލު ބަޑިއަކާ ކުޅުމުގެ ތެރޭގައި "ނޭނގި ދެވުނު ހަމަލާއެއްގައި" ފިލްމުގެ އަންހެން ސިނަމަޓޯގްފާރަފު ހަލީނާ ހަޗިން ސްވެސް ވަނީ މަރުވެފައިވެ އެވެ. މިކަމާ ގުޅިގެން ފިލްމީ ސެޓްތަކުގެ ރައްކާތެރިން ކަށަވަރުކޮށް ދޭން އެ އިންޑަސްޓްރީގައި މަސައްކަތްކުރާ އެތައް ބަޔަކު މިހާރު އަންނަނީ ގޮވާލަމުންނެވެ.

އެ ހިތާމަވެރި ހާދިސާ އަށް އިޝާރާތްކޮށް ވެރައިޓީ އަށް ދިން އިންޓަވިއުއެއްފައި ރޮކް ބުނީ ފިލްމީ މަސައްކަތަކީ އެތައް ބަޔަކު ބައިވެރިވެގެން ކުރާ ކަމަކަށްވާތީ ހުރިހާ ޑިޕާޓްމަންޓެއްގައި ވެސް މަސައްކަތްކުރާ މީހުންނަށް ރައްކާތެރި ކަށަވަރުވެފައި އޮންނަން ޖެހޭނެ ކަމަށެވެ. އަދި ފައިސާ އަށް ވުރެ ބޮޑަށް އިސްކަންދޭން ޖެހެނީ އިންސާނުންގެ ފުރާނަ އަށް ކަމަށް ބުންޏެވެ.

"އެހެންވެ ދެން އަހަރެން ކުޅޭ ފިލްމުތަކާއި އަހަރެންގެ ކުންފުނިން ހަދާ އެއްޗެހީގެ މަސައްކަތުގައި އަސްލު ބަޑި ބޭނުމެއް ނުކުރާނަން. ސެޓްތަކުގައި ރައްކާތެރިކަން ކަށަވަރުކޮށް ދޭން ހޭދަކުރަން ޖެހޭ ފައިސާއާ ދޭތެރޭ ވިސްނުމުގެ ބަދަލުގައި އެބަޖެހޭ އިންސާނުންގެ ފުރާނައިގެ އަގު ވަޒަން ކުރަން." މިހާރު ހޮލީވުޑްގައި އެންމެ ބޮޑު އާމްދަނީއެއް ލިބޭ އެއް އެކްޓަރު ބުންޏެވެ.

ހުކުރު ދުވަހު ރިލީޒްކުރި ފިލްމު "ރެޑް ނޯޓިސް" ގެ ބަތަލު ބުނި ގޮތުގައި ފިލްމީ ސެޓްތަކުގައި މަސައްކަތްކުރާ މީހުންގެ ސަލާމަތާއި ރައްކާތެރިކަމަށް ބޮޑު ހޭދައެއް ކުރަން ޖެހުމަކީ އެއްވެސް ބަޔަކު ކަންބޮޑުވުން ފާޅުކުރަން ޖެހޭ ކަމެއް ނޫނެވެ.

"އަހަރެން ވަރަށް ހިތާމަ ކުރަން ހެލީނާގެ ފުރާނަ ގެއްލިގެން ދިޔަ ހާދިސާއާ ދޭތެރޭ، އެ ވާހަކަ އަޑު އިވުނިމަ ހިތް ހަލާކުވި. ވިސްނައިލާ އޭނާގެ އާއިލާ އަށް މިކަމުގެ ސަބަބުން ލިބޭނެ ހިތްދަތިކަން." ރޮކް ބުންޏެވެ. "އެހެންވީމަ ރައްކާތެރި ކަމަށް ހޭދަކުރުން ބޮޑު ކަމަކަށް ނަހަދައި އެބަޖެހޭ ކޮންމެ މީހެއްގެ ފުރާނަ އަކީ ވެސް އަގުހުރި އެއްޗެއްކަން ހަނދާނުގައި ބަހައްޓަން."

"ރަސްޓް" ގެ ސެޓްގައި މި މަހުގެ 21 ވަނަ ދުވަހު ހިނގި ހާދިސާގައި ފިލްމުގެ ސިނަމަޓޯގްރާފަރު މަރުވުމުގެ އިތުރަށް ފިލްމުގެ ޑައިރެކްޓަރު ޖޮއެލް ސޫޒާ ވެސް ޒަހަމްވެފައިވެ އެވެ. މި ހާދިސާ މިހާރު އަންނަނީ އިތުރަށް ތަހުގީގު ކުރަމުންނެވެ. އަދި އެލެކް ވަނީ ތަކުރާރުކޮށް އޭނާގެ ފަރާތުން ހިނގައިދިޔަ ހާދިސާއާ ގުޅިގެން މައާފަށް އެދިފަ އެވެ.