ގިނަ ބައެއްގެ އިންތިޒާރު ނިމުމަކަށް، ހޮންޑާ އައުޓްބޯޑު އިންޖީނު މާދަމާ އިން ފެށިގެން ޕްރިއޯޑަރަށް

ގިނަ ބައެއްގެ އިތުބާރު ހޯދާފައިވާ ހޮންޑާ އައުޓްބޯޑް އިންޖީނު ރާއްޖެ އަށް ތައާރަފު ކުރުމަކީ ގިނަ އަހަރުތަކެއް ވަންދެން ރާއްޖޭގެ މެރިން ދާއިރާގެ ގިނަ ބަޔަކު ބޭނުންވެފައި އޮތް ކަމެކެވެ. މިހާރު މި އިންތިޒާރު މިވަނީ ނިމުމަކަށް އައިސްފަ އެވެ. ޑީ ބްލޫ ޕްރައިވެޓް ލިމިޓެޑްގެ މެރިން ވައިބްގެ ދަށުން ހޮންޑާ އައުޓްބޯޑު އިންޖީނު މާދަމާ ރާއްޖެ އަށް ތައާރަފު ކުރަން ވަނީ ނިންމައިފަ އެވެ.

މާދަމާ ރޭ ހުޅުވާ ހޮންޑާ މެރިން ސެންޓަރާއެކު، ހޮންޑާ އައުޓްބޯޑް އިންޖީނަށް ޕްރީއޯޑާ ކުރުމުގެ ފުރުސަތު ވެސް މެރިން ވައިބުން ހުޅުވައިލާނެ އެވެ. މި ފިހާރަ ހުޅުވާނީ ސާވިސް ސެންޓަރާ ވެސް އެކުގަ އެވެ.

މިއީ ރާއްޖެ އަށް ހޮންޑާގެ އައުޓްބޯޑު އިންޖީނު ތައާރަފު ކުރާ ފުރަތަމަ ފަހަރެވެ. މި އިންޖީނު ތައާރަފު ކުރުމަށް ގިނަ ދިރާސާތަކެއް ހޮންޑާ ކުންފުންޏާއި ޑީ ބްލޫ މެރިން އިން ވެސް ވަނީ ކޮށްފަ އެވެ. އެގޮތުން، ދުބާއީން ހޮންޑާ އައުޓްބޯޑް އިންޖީނެއް ގެނެސް ރާއްޖޭގައި ޓެސްޓު ކޮށްފައިވާއިރު، ހޮންޑާގެ އިސް ބޭފުޅުންތަކެއް ރާއްޖެ ވަޑައިގެން މާކެޓުގެ ރިސާޗެއް ވަނީ ހަދައިފަ އެވެ.

ހޮންޑާގެ އިންޖީނުތަކުގައި ބޭނުން ކުރަނީ އަމިއްލަ ޓެކްނޮލޮޖީ އެވެ. އެއީ ފޯ ސްޓްރޯކް އައުޓްބޯޑް އިންޖީނު އުފެއްދި ދުނިޔޭގެ ފުރަތަމަ ކުންފުންޏަށް ވާއިރު، އެ ކުންފުނީގެ އިންޖީނުތަކަކީ މުޅި ދުނިޔެ ގަބޫލު ކުރާ އިންޖީނުތަކެކެވެ. މި އިންޖީނުތަކުގައި ތެލުގެ ހަރަދު ކުޑަވެފައި ގިޔަރު ވަރުގަދަ ވެފައި ސްޕީޑު ވެސް އަވަސް ވާނެ އެވެ.

މީގެ އިތުރުން އާއްމުކޮށް އިންޖީނުތަކަށް ދިމާވާ މައްސަލައެއް ކަމަށްވާ ގިޔަރު ހަލާކުވުމުގެ މައްސަލަ ވެސް މި އިންޖީނުތަކުގައި މަދުވާނެ އެވެ. މިއީ ވާދަވެރި ގިނަ ކުންފުނިތަކުގެ ތައުރީފު ވެސް ލިބިފައިވާ އިންޖީނެކެވެ.

ރާއްޖޭގެ ކަނޑު އުޅަނދުފަހަރު ދުއްވާ ގިނަ ބައެއްގެ މެދުގައި ހޮންޑާ އައުޓްބޯޑް އިންޖީނަށް މިހާރު ވެސް ޑިމާންޑު އެބައޮތެވެ. އެހެންވެ، މިއީ ރާއްޖޭގައި މަގުބޫލު އިންޖީނަކަށް ވާނެ ކަމުގެ ޔަގީންކަން މެރިން ވައިބް އިން ދެ އެވެ.

ހޮންޑާ މެރިންއާއެކު ހޮންޑާ އައުޓްބޯޑު އިންޖީނުގެ ފުލް ސޮލިއުޝަން ލިބޭނެ އެވެ. އެގޮތުން، އާފްޓަ ސޭލްސް ސާވިސް އާއި އިންޖީނަށް ބޭނުންވާ ސްޕެއާ ޕާޓްތައް ވެސް ހޮންޑާ މެރިން ސެންޓަ އަދި ހޮންޑާ މެރިން ސާވިސް ސެންޓަރު މެދުވެރިކޮށް ލިބޭނެ އެވެ. މި ސާވިސް ސެންޓަރުގައި މަސައްކަތް ކުރާނީ ހޮންޑާ އިންޖީނު ހެދުމުގެ ތަމްރީން ލިބިފައިވާ މުވައްޒަފުންނެވެ.

ހޮންޑާ މެރިން ސާވިސް ސެންޓަރުގައި އިންޖީނުތައް ސާވިސް ކޮށްދޭއިރު، ތިމާވެއްޓާ ރައްޓެހި ގޮތްތައް ހިޔާރު ކުރާނެ އެވެ. އަދި ވޯކްޝޮޕުން ހުކުރު ދުވަސް ފިޔަވައި އެހެން ހުރިހާ ދުވަހަކު ހިދުމަތް ދޭނެ އެވެ. އިމަޖެންސީ ހާލަތްތަކަށް ތައްޔާރުވުމުގެ ގޮތުން އެފަދަ ހާލަތެއްގައި 24 ގަޑިއިރު ވެސް އެ ވޯކްޝޮޕުން ހިދުމަތް ދޭނެ އެވެ.

ހޮންޑާ މެރިން އިން ރާއްޖެ އަށް ތައާރަފު ކުރަނީ 15-250 ހޯސްޕަވަރުން އިންޖީނެވެ. މި އިންޖީނުތަކާއެކު ހަ މަހުގެ ވޮރެންޓީ ލިބޭއިރު، މިއީ ފަސޭހައިން ސާވިސް ކުރެވޭ އިންޖީނެކެވެ. އެހެންވެ، ލޯންޗުގައި މަސައްކަތް ކުރާ ކޮންމެ ކްރޫއަކަށް ގަޑިންގަޑި އަށް ކުރަންޖެހޭ މެއިންޓެނެސް ފަސޭހަކަމާއެކު ކުރެވޭނެ އެވެ.

މި އިންޖީނު ގަންނަން ބޭނުންވާ ކަސްޓަމަރުންނަށް ބީއެމްއެލް އިސްލާމިކް ނުވަތަ އެމްއައިބީ ނުވަތަ އެމްއެފްއެލްސީގެ ކްރެޑިޓް ސްކީމްތައް މެދުވެރިކޮށް އޯޑަރު ކުރެވޭނެ އެވެ.

މެރިން ވައިބްގެ ހޮންޑާ މެރިން ސެންޓަ ހުންނާނީ އެ ކުންފުނީގެ ޑީ ބްލޫ މެރިން ފިހާރަ ކައިރިން، މ. ނިމްސާ ވިއުގެ ތިރީ ބައިގަ އެވެ. މި ފިހާރަ އަންނަ އަންގާރަ ދުވަހުން ފެށިގެން ކޮންމެ ދުވަހެއްގެ ހެނދުނު 9:00 އިން ހަވީރު 6:00 އަށް ހުޅުވާފައި ހުންނާނެ އެވެ.