ކޮޕް26ގައި ބައިވެރިވެވަޑައިގަތުމަށް ނަޝީދު ސްކޮޓްލެންޑަށް

އދ. ގެ ތިމާވެއްޓާ ބެހޭ ކޮންފަރެންސް "ކޮޕް26" ގައި ބައިވެރިވެވަޑައިގަތުމަށް ރައްޔިތުން މަޖިލީހުގެ ރައީސް މުހައްމަދު ނަޝީދު މިއަދު ހެނދުނު ސްކޮޓްލެންޑަށް ފުރާވަޑައިގެންފި އެވެ.

ގިނަ ގައުމުތަކުގެ ބައިވެރިވުން ހިމެނޭ ކޮންފަރެންސް ބާއްވަން ނިންމާފައި ވަނީ މާދަމާ އިން ފެށިގެން އަންނަ މަހުގެ 12 ނިޔަލަށް ސްކޮޓްލެންޑުގެ ގްލާސްގޯގަ އެވެ.

މިދިޔަ މެއި މަހު 6 ގައި ނަޝީދު އަވަހާރަކޮށްލަން ދިން ޓެރަރިސްޓް ހަމަލާ އަށް ފަހު، ބޭސްފަރުވާ އަށް ރާއްޖެއިން ބޭރުގައި ހުންނެވުމަށް ފަހު އެނބުރި ވަޑައިގަތީ ފަސް މަސް ފަހުން މި މަހު 11 ގަ އެވެ. ރާއްޖެ ވަޑައިގަތުމުގެ ކުރިން އެމަނިކުފާނު ދިރިއުޅުއްވީ އިނގިރޭސިވިލާތުގަ އެވެ.

ރާއްޖެ ވަޑައިގެން ސަލާމަތީ ސަބަބުތަކަށްޓަކައި ނަޝީދު ދިރިއުޅުއްވަނީ ދައުލަތުގެ ހަރަދުގައި ހޮޓެލް ޖެންގަ އެވެ.

ރާއްޖެ އަށް ހުރި ގޮންޖެހުންތަކާއި މޫސުމީ ބަދަލުތަކުން ކުރާ ނޭދެވޭ އަސަރު ކިޔައިދިނުމުގައި 1992 ވަނަ އަހަރުން ފެށިގެން އިސް ދައުރެއް އަދާކުރަމުން އައި ނަމަވެސް ރާއްޖޭގެ ރައީސަކު ކޮޕަށް ވަޑައިނުގަންނަވާތާ މިހާރު 12 އަހަރު ވެއްޖެ އެވެ.

އެކަމަކު މިފަހަރުގެ ކޮންފަރެންސްގައި ނަޝީދުގެ އިތުރުން ރައީސް އިބްރާހިމް މުހައްމަދު ސޯލިހާއި އދ. ގެ އާއްމު މަޖިލީހުގެ ރައީސް އަދި ރާއްޖޭގެ ފޮރިން މިނިސްޓަރު އަބްދުﷲ ޝާހިދު ވެސް ބައިވެރިވެވަޑައިގަންނަވާނެ އެވެ.

ދުބާއީ އަށް ކުރައްވާ ރަސްމީ ދަތުރުފުޅު ނިންމާލެއްވުމަށް ފަހު ރައީސް އިބްރާހިމް މުހައްމަދު ސޯލިހް ވެސް މިއަދުގެ ވަގުތެއްގައި ސްކޮޓްލޭންޑަށް ފުރާވަޑައިގަންނަވާނެ އެވެ.