އަފްގާން ކައިރީގައި ރަޝިޔާގެ އަސްކަރީ ތަމްރީނުތަކެއް ފަށައިފި

އަފްގާނިސްތާނުގެ އިމާ ގާތުގައި ރަޝިޔާގެ އެއްގަމު ސިފައިންގެ ވަރުގަދަ އަސްކަރީ ތަމްރީންތަކެއް އިއްޔެ ފަށައިފި އެވެ.

ރަޝިޔާ އިން ބުނި ގޮތުގައި މި ތަމްރީންތައް ކުރިއަށް ދާނީ ރަޝިޔާ އާއި އަފްގާނިސްތާނާއި ތަޖިކިސްތާނު ގުޅޭ އިން ކައިރީގަ އެވެ. ރަޝިޔާ އިން އަސްކަރީ ތަމްރީންތަކެއް މި ފެށީ، އަފްގާނިސްތާނާއި ތަޖިކިސްތާނާ ދެމެދު ޑިޕްލޮމެޓިކް ޒުވާބުތަކެއް ފެށިފައިވާ ދުވަސްވަރެއްގަ އެވެ. އަދި އަފްގާނުގައި މިހާރު ވެރިކަން ކުރާ ތާލިބާން ޖަމާއަތުގެ އިސް ވެރިންނާއި، ސަރަހައްދުގެ އެހެން ގައުމުތަކުގެ ވެރިންނާ ދެމެދު ބައްދަލުވުމެއް ބާއްވަން ހަމަޖެހިފައިވާ ދުވަސްވަރެއްގަ އެވެ.

އަނެއްކޮޅުން ތަޖިކިސްތާނުން ވަނީ ތާލިބާނުންގެ ވެރިކަން ބަލައިގަތުމަށް ފާޅުގައި ދެކޮޅު ހަދައިފަ އެވެ. ދެ ގައުމު ގުޅޭ ސަރަހައްދީ ރޮނގުގެ ކައިރީގައި ތަޖިކިސްތާނުގެ ގިނަ އަދަދެއްގެ ސިފައިން ތިބި އިރު، އެ ސަރަހައްދުގެ އަފްގާނިސްތާނު ފަޅީގައި ތާލިބާނުންގެ ގިނަ އަދަދެއްގެ ހަނގުރާމަވެރިން ވެސް އެބަ ތިބި ކަމަށް ހަބަރުތައް ބުނެ އެވެ.

ރަޝިޔާ އާއި ތަޖިކިސްތާނުގެ ދިފާއީ ވުޒާރާ އިން ބުނި ގޮތުގައި ރަޝިޔާ އިން ބާއްވާ ތަމްރީނުތަކުގައި 5،000 ސިފައިން ބައިވެރިވާނެ އެވެ. އޭގެ ތެރެއިން ދެ ބައިކުޅަ އެއް ބަޔަށް ވުރެ ގިނަ ސިފައިންނަކީ ރަޝިޔާ ސިފައިންނެވެ. ދެން ބައިވެރިވަނީ ތަޖިކިސްތާނު ސިފައިންނެވެ.

ރަޝިޔާ އިން ބުނާ ގޮތުގައި މި ތަމްރީނުތައް ހަ ދުވަހުގެ މުއްދަތަށް ކުރިއަށް ދާނެ އެވެ. ރަޝިޔާ އިން އަފްގާނިސްތާނުގެ އިމާ ގާތުގައި އަސްކަރީ ތަމްރީންތަކެއް މިފެށީ، މެދުތެރޭ އޭޝިޔާގެ ބައެއް ގައުމުތައް ބައިވެރިކޮށްގެން، މިދިޔަ އޮގަސްޓް މަހާއި ސެޕްޓެމްބަރު މަހު ވެސް، އަފްގާނިސްތާނުގެ ސަރަހައްދީ ރޮނގު ކައިރީގައި އަސްކަރީ ތަމްރީންތަކެއް ބޭއްވުމަށް ފަހު އެވެ.

އަފްގާނިސްތާނުގައި ތާލިބާނުންގެ ވެރިކަމެއް ގާއިމުކުރުމާ ގުޅިގެން، ރަޝިޔާ އިން ބުނެފައި ވަނީ، ހަރުކަށި އިސްލާމީ ޖަމާއަތްތަކުގެ ނުރައްކާތެރިކަން، ކުރީގެ ސޮވިއެޓް ޔުނިއަންގެ ބައެއް ގައުމުތަކުގެ ތެރެއިން ރަޝިޔާ އަށް އަތުވެދާނެ ކަމުގެ ބިރު އެބަ އޮތް ކަމަށެވެ. ރަޝިޔާ އިން އެ އިޝާރާތްކުރީ، ތާލިބާން ޖަމާއަތުގެ ހަނގުރާމަވެރިންނާއި އައިއެސް ޖަމާއަތުގެ ހަނގުރާމަވެރިން، ރަޝިޔާގެ އިމާ ގާތުގައިވާ އެހެން ގައުމުތަކުގެ ތެރެއިން ރަޝިޔާ އަށް އެތެރެވެދާނެ ކަމަށެވެ.

އަފްގާނިސްތާނުގައި ތާލިބާނުން އުފެއްދި ސަރުކާރަށް ގާނޫނީ ހައިސިއްޔަތެއް ހޯދުމަށް އެ ޖަމާއަތުން ކުރާ މަސައްކަތުގެ ތެރެއިން، މި ހަފުތާގައި ރަޝިޔާގައި ވެސް ބައްދަލުވުމެއް ބޭއްވުމަށް ވަނީ ތާވަލުކޮށްފަ އެވެ. މޮސްކޯގައި ބާއްވާ މި ބައްދަލުވުމުގައި ރަޝިޔާގެ އިތުރުން، އީރާން، ޕާކިސްތާން، ޗައިނާ އަދި އިންޑިއާގެ މަންދޫބުން ތާލިބާނުންނާ އެކު މަޝްވަރާ ކުރައްވާނެ އެވެ.

މި ބައްދަލުވުން ބޭއްވިޔަސް، މާ އެދެވޭ ނަތީޖާއެއް ހާސިލުކުރެވޭނެ ކަމުގެ އުންމީދެއް ނެތް ކަމަށް ރަޝިޔާގެ އިސް މަސްއޫލުވެރިއަކު ވިދާޅުވި އެވެ.

ރަޝިޔާގެ ރައީސް ލަޑިމިއާ ޕުޓިންގެ ފަރާތުން ހުންނަވާ އަފްގާނިސްތާނުގެ ކަންކަމާ ގުޅޭ ޚާއްސަ މަންދޫބު ސަމީރު ކާބޮލޯފް ވިދާޅުވި ގޮތުގައި، އަފްގާނިސްތާނުގެ މިހާރުގެ ހާލަތާ ގުޅޭ ގޮތުން، އެންމެންނަށް އެއްބަސްވެވޭ ވަކި ގޮތެއް ކަނޑައެޅުމަށްޓަކައި، ރަޝިޔާ އާއި އެމެރިކާ އާއި ޗައިނާ އަދި ޕާކިސްތާނު ސަރުކާރުގެ އިސް ބޭފުޅުންތަކެއް މިއަދު މޮސްކޯގައި ބައްދަލުކުރައްވާނެ އެވެ.