ދަ ރެޑްސީ ޑިވެލޮޕްމަންޓް ކޮމްޕެނީގެ އެޑްވައިޒަރީ ބޯޑަށް ކުރީގެ ރައީސް ވަހީދު

ސައުދި އަރަބިއާގައި ޓޫރިޒަމް ދާއިރާ ތަރައްގީކުރަން އުފެއްދި "ދަ ރެޑް ސީ ޑެވެލޮޕްމަންޓް ކޮމްޕެނީ"ގެ އެޑްވައިޒަރީ ބޯޑަށް ރާއްޖޭގެ ކުރީގެ ރައީސް ޑރ. މުހައްމަދު ވަހީދު އައްޔަން ކުރައްވައިފި އެވެ.

އެ ކުންފުނީގެ އެޑްވައިޒަރީ ބޯޑަށް ވަހީދު އައްޔަންކުރީ މިދިޔަ އަންގާރަ ދުވަހު އެވެ. އެމަނިކުފާނާ އެކު ރިޒް ކާލްޓަންގެ ކޯ ފައުންޑާ އަދި ކަޕެލާ ހޮޓެލްސްގެ ޗެއާމަން އަދި ސީއީއޯ ހޯސްޓް ޗަލްޒް ވެސް ވަނީ އެ ބޯޑަށް އައްޔަން ކޮށްފަ އެވެ. ސައުދީގެ "ރެޑްސީ" ޕްރޮޖެކްޓު ނިންމައި އަންނަ އަހަރު ފަހުކޮޅު ޓޫރިސްޓުން ގެނައުމުގައި އެ ދެ ބޭފުޅުންގެ އެހީތެރިކަން ހޯދާނެ ކަމަށް ރެޑްސީ ކުންފުނިން ބުނެ އެވެ.

ރެޑް ސީ ޑެވެލޮޕްމަންޓް ކޮމްޕެނީއަކީ ރަތް ކަނޑުގައި ޓޫރިސްޓް ރިސޯޓުތައް ތަރައްގީކޮށް ދެމެހެއްޓެނިވި ގޮތެއްގައި ޓޫރިޒަމް ފެށުމަށް ސައުދީގެ ޕަބްލިކް އިންވެސްޓްމަންޓް ފަންޑު (ޕީއައިއެފް) އިން 2018ވަނަ އަހަރު އުފެއްދި ކުންފުންޏެކެވެ. "ރެޑްސީ" ޕްރޮޖެކްޓަކީ 2017ވަނަ އަހަރު ސައުދީގެ ކްރައުން ޕްރިންސް މުހައްމަދު ބިން ސަލްމާން އިއުލާން ކުރެއްވި ގިނަ ޕްރޮޖެކްޓުތަކުގެ ތެރެއިން ޕްރޮޖެކްޓެކެވެ.

ރެޑްސީ ޕްރޮޖެކްޓަކީ ލަގްޒަރީ ޓޫރިޒަމަށް ހާއްސަ ޕްރޮޖެކްޓެކެވެ. އަދި ތިމާވެށި ރައްކާތެރިކުރުމާއި ކަނޑުގެ ދިރުން ރައްކާތެރި ކުރުމަކީ ވެސް މި ޕްރޮޖެކްޓުގެ މުހިންމު އެއްބައެވެ. މި ޕްރޮޖެކްޓުގެ ސަބަބުން ދުނިޔޭގެ ޓޫރިޒަމް މެޕުގައި ސައުދީ ފާހަގަ ކުރެވޭނެ ކަމަށް ރެޑްސީ ކުންފުނިން ބުނެ އެވެ.

މި ޕްރޮޖެކްޓު ހިންގާ ސަރަހައްދުގައި 90 އަށްވުރެ ގިނަ ގުދުރަތީ ރަށް ހިމެނެ އެވެ. މީގެ ތެރެއިން 75 ޕަސެންޓު ރަށްތައް އެ ރަސްތަކުގެ ގުދުރަތީ ރީތިކަން ދެމެހެއްޓުމަށް އެއްވެސް ވަރަކަށް ތަރައްގީ ނުކުރާނެ އެވެ. އަދި މީގެ ތެރެއިން ނުވަ ރަށެއް ވަނީ ހިމާޔަތް ކޮށްފަ އެވެ.

ރެޑްސީ ޕްރޮޖެކްޓުގެ ދަށުން މިހާރު ވަނީ "ޑެޒާޓް ރޮކް" ގެ ނަމުގައި ރިސޯޓެއް ވެސް ތަރައްގީ ކޮށްފަ އެވެ. މި ރިސޯޓު ޓޫރިސްޓުންނަށް ހުޅުވާލާނީ އަންނަ އަހަރު ނިމޭ ހިސާބުގަ އެވެ.