ނަފުސާނީ ފަރުވާ ހޯދި މީހުން އިތުރުވެ 13،000 އިން މައްޗަށް

މީގެ ދެ އަހަރުކުރިން އައިޖީއެމްއެޗުގައި ހުޅުވި ސެންޓާ ފޯ މެންޓަލް ހެލްތުން ފަރުވާ ހޯދަމުން އަންނަ މީހުންގެ އަދަދު މި އަހަރު ވަރަށް ބޮޑަށް އިތުރުވެ މިހާތަނަށް ފަރުވާ ހޯދި އަދަދު 13،000 އިން މަތިވެފައިވާ ކަަމަށް ތަފާސްހިސާބުތަކުން ދައްކައިފި އެވެ.

ނަފުސާނީ ބަލިތަކުގެ ދުވަހާ ގުޅުވައި އައިޖީއެމްއެޗުން މިއަދު އާއްމުކުރި ހިސާބުތަކުގައިވާ ގޮތުގައި 2019 ވަނަ އަހަރު އެ ބައްޔަށް ފަރުވާ ހޯދީ 7،246 މީހެކެވެ. އަދި މިދިޔަ އަހަރުގެ ތެރޭގައި އެކަނިވެސް 17،708 މީހަކު ނަފުސާނީ ބައްޔަށް ފަރުވާ ހޯދާފައިވާއިރު، މި އަހަރުގެ މިހާތަނަށް އެ ބައްޔަށް 13,131 މީހަކު ފަރުވާ ހޯދާފައިވެ އެވެ.

އެއް މަހެއްގެ ތެރޭގައި މިހާތަނަށް އެންމެ ގިނަ ބަޔަކު ނަފްސާނީ ބައްޔަށް ފަރުވާ ހޯދީ މިދިޔަ އަހަރުގެ އޭޕްރީލް-ޖޫން މަހަށެވެ. އެއީ ކޮވިޑާ ގުޅިގެން މާލޭ ސަރަހައްދު ލޮކްޑައުންގައި އޮތް މުއްދަތެވެ.

އޭޕްރީލް މަހުން ފެށިގެން ނަފްސާނީ ބައްޔަށް ފަރުވާ ހޯދާ މީހުން ކުއްލިއަކަށް މައްޗަށް އަރައިގެންދިޔައިރު ޖޫން މަހާ ހިސާބަށް ދިޔައިރު ފަރުވާ ހޯދި މީހުންގެ އަދަދު 2،165 އަށް އަރާފައިވެ އެވެ. ޖޫން މަހުގެ ފަހުން އެ އަދަދު ދަށް ވަމުން ގޮސް އެވްރެޖްކޮށް ކޮންމެ މަހަކު ފަރުވާ ހޯދާ މީހުންގެ އަދަދު އުޅުނީ 1،500 ގަ އެވެ.

އެ ތަފާސްހިސާބުތަކުގައިވާ ގޮތުން މިއަހަރު ނަފްސާނީ ބައްޔަށް ފަރުވާ ހޯދާ މީހުންގެ އަދަދު އަހަރު ފެށުނީއްސުރެ ވެސް އިތުރެވެ. މީގެ ކުރިން ދެ އަހަރުގައި ވެސް އަހަރު ފެށޭކޮޅު 800 އަށް ވުރެ މަދުން މީހުން ފަރުވާ ހޯދި ނަމަވެސް މިއަހަރު ފެށުނުއިރު ވެސް 1،400 އެއްހާ މީހުން ބައްޔަށް ފަރުވާ ހޯދި އެވެ. އަދި މެއި މަހާ ހިސާބަށް ވެސް ހުރީ އެވަރަށެވެ. މެއި މަހު އެ އަދަދު އަނެއްކާ ވެސް ކުޑަކޮށް މައްޗަށް ޖެހިލުމަށް ފަހު ތިރިވި ނަމަވެސް އަނެއްކާ ވެސް ފަރުވާ ހޯދާ މީހުންގެ އަދަދު ހުރީ މައްޗަށްދާ ގޮތަށެވެ.

ނަފްސާނީ އެހީތެރިކަން ހޯދުމަށް އައިޖީއެމްއެޗުގައި ބޮޑު ކިއުއެއް އަބަދުވެސް އޮވެ އެވެ. މިވަގުތު ވެސް ފަރުވާ ހޯދުމަށް ކިއުގައި 2،600 މީހަކު އެބަ ތިއްބެވެ.

ކިއު ދިގުވެގެންދަނީ އެތަނުގައި ވަސީލަތް މަދުވެފައި ނަފްސާނީ ފަރުވާ ދިނުމަށް މަދު ބަޔަކު ތިބޭތީ އެވެ.

މިވަގުތު މެންޓަލް ހެލްތު ސެންޓަރުގައި ތިބީ ހަތަރު ސައިކޭޓްރިސްޓުންނާއި ތިން ސައިކޮލޮޖިސްޓުން އަދި ދެ ސައިކޯތެރަޕިސްޓުންނެވެ. އަދި ދެ ސޯޝަލް ވޯކަރުންނާއި ދެ ކައުންސެލަރުންގެ އިތުރުން އޮކިއުޕޭޝަނަލް ތެރަޕިސްޓެއް ވެސް އެ ސެންޓަރުގައި ފަރުވާދެމުން އެބަދެ އެވެ.