ރައީސް އޮފީހުން ޓިކެޓް ގެންދިޔަ ކަމަށް ބުނާ ވާހަކަ ދޮގު ކޮށްފި

ސާފް ޗެމްޕިއަންޝިޕްގައި މާދަމާ ރާއްޖެ އާއި ސްރީ ލަންކާ ކުޅޭ މެޗުގެ ޓިކެޓުތަކުގެ ތެރެއިން ގިނަ އަދަދެއްގެ ޓިކެޓު ރައީސް އޮފީހުގެ ބޭނުމަށް ގެންގޮސްފައިވާ ކަމަށް ބުނާ ވާހަކަ އެ އޮފީހުން މިއަދު ދޮގުކޮށްފި އެވެ.

މެޗަށް 5،000 ޓިކެޓު ވިއްކަން ހަމަޖެހިފައިވާއިރު، އޭގެ ތެރެއިން އާންމުންނަށް ހާއްސަ ކުރި ޓިކެޓުތައް ކުޑަ ވަގުތުކޮޅެއްގެ ތެރޭގައި ހުސްވުުމުން ގިނަ ބަޔަކު ވަނީ އެކަމާ ސުވާލު އުފައްދައި މުޒަހަރާކޮށްފަ އެވެ. އެ ޓިކެޓްތަކުގެ ތެރެއިން 1،600 ޓިކެޓު ރައީސް އޮފީހުން ގެންގޮސްފައިވާ ކަމަށް މީޑިއާގައި ރިޕޯޓްކޮށްފައިވެ އެވެ.

އެކަމާ ގުޅިގެން "މިހާރު"ން ސުވާލު ކުރުމުން ރައީސް އޮފީހުގެ ތަރުޖަމާނު މުހައްމަދު މަބްރޫކު އަޒީޒް ވަނީ އެ ވާހަކަތައް ދޮގުކޮށްފަ އެވެ. އޭނާ ވިދާޅުވީ އެއީ އެއްވެސް ހަގީގަތެއް ނެތް ވާހަކަތަކެއް ކަމަށާއި ރައީސް އޮފީހުން ޓިކެޓް ނުގެންދާ ކަމަށެވެ.

"އެކަހަލަ އެއްވެސް ކަމެއް ނުހިނގާ. އެއީ ހަމަ އުފައްދައިގެން ދައްކާ ވާހަކައެއް،" މަބްރޫކު ވިދާޅުވި އެވެ.

މާދަމާގެ މެޗުގެ ޓިކެޓް ހޯދަން ގިނަ ބަޔަކު ވަރަށް ހެނދުނާ ގަލޮޅު ދަނޑު ކައިރީ ކިއު ހެދި ނަމަވެސް، އެތަނުން ޓިކެޓު ލިބުނީ ވަރަށް މަދު ބަޔަކަށެވެ. އެތަނުން ވިއްކީ 500 އެއްހާ ޓިކެޓު ކަމަށް އެތަނަށް ޓިކެޓު ގަންނަން ގޮސް ތިބި ބައެއް މީހުން ބުންޏެވެ.

ޓިކެޓު ހުސްވުމުން ނުރުހުން ފާޅުކޮށް، ކައުންޓަރު ހުންނަ ތަނަށް ވަދެ ވިކުރާ ވެސް ބެލި އެވެ. އަދި ބައެއް މީހުން ގަދަކަމުން ދަނޑު ތެރެއަށް ވަނެވެ. ޓިކެޓަށް ވީ ގޮތް ބުނަންދެން ކަމަށް ބުނެ ދަނޑު ބޭރުގައި ގިނަ ބަޔަކު މުޒާހަރާ ވެސް ކުރި އެވެ.

މައްސަލަ ހޫނުވެފައި ވަނިކޮށް، އެފްއޭއެމުން ވަނީ ސްޕޮންސަރުންނާއި ކުޅުންތެރިންގެ އާއިލާތަކާއި ކްލަބްތަކަށް ހާއްސަކޮށްފައިވާ 2،500 ޓިކެޓްގެ ތެރެއިން 1،000 ޓިކެޓު އާންމުންނަށް ވިއްކަން ނިންމައިފަ އެވެ. މިރޭ 8:00 ގައި ސޯޝަލް ސެންޓަރުގައި އެ ޓިކެޓުތައް ވިއްކަން ފަށާނެކަން އިއުލާނުކުރުމާ އެކު ގިނަ ބަޔަކު އެތަނުގައި މިހާރު ވެސް ވަނީ ކިއު ހަދައިފަ އެވެ.