ޒުވާން ޑިޕްލޮމެޓުން އުފައްދާ ޕްރޮގުރާމް އަންނަ މަހު ފަށަނީ

ކުދި ޖަޒީރާ ގައުމުތަކާއި އެންމެ ކުޑަކޮށް ތަރައްގީވެފައިވާ ގައުމުތައް އަދި ތަރައްގީ ވަމުން އަންނަ ގައުމުތަކުގައި ޑިޕްލޮމެޓުންގެ އާ ޖީލެއް އުފައްދަން އދ. ގެ އާއްމު މަޖިލީހުގެ ރައީސްގެ ހައިސިއްޔަތުން ފޮރިން މިނިސްޓަރު އަބްދުﷲ ޝާހިދު ފައްޓަވާ ހާއްސަ ޕްރޮގްރާމެއް އަންނަ މަހު ފައްޓަވާނެ ކަމަށް އެމަނިކުފާން މިއަދު ވިދާޅުވެއްޖެ އެވެ.

އދ. ގެ އާންމު މަޖިލީހުގެ ރައީސްކަމާ ހަވާލުވެވަޑައިގެންނެވި ފަހުން ކުރައްވާ ފުރަތަމަ ރަސްމީ ދަތުރުގައި ޝާހިދު ވަނީ މިއަދު ހެނދުނު ރާއްޖެ ވަޑައިގެންފަ އެވެ.

މެންދުރު ފަހު އިސްކަންދަރު ސްކޫލުގައި ރާއްޖޭގެ ސްކޫލްތަކުގެ ދަރިވަރުންނާ ބައްދަލުކުރައްވައި ޝާހިދު ވިދާޅުވީ އޭނާގެ ރިޔާސަތުގައި ޒުވާނުން ފުރުސަތު ފަހިކޮށްދިނުމަށް ހާއްސަ އިސްކަމެއް ދެއްވާނެ ކަމަށާއި އެ މަސައްކަތުގެ ދަށުން ޕްރެޒިޑެންޓް އޮފް ޖެނެރަލް އެސެމްބުލީ ޔޫތު ފެލޯޝިޕް ޕްރޮގުރާމެއް އެކުލަވައިލުމުގެ މަސައްކަތް ފަށާފައިވާ ކަމަށެވެ.

"މީގެ ބޭނުމަކީ ދުނިޔޭގެ ކަންކޮޅުތަކުގައި ތިބި ޒުވާނުންގެ ތެރެއިން ގައުމުތަކުގެ ޒުވާން ޑިޕްލޮމެޓުންނަށް ފުރުސަތު ހޯދައިދިނުން. އދ. ގެ މަޖިލީހުގެ މަސައްކަތްތައް ހިނގާ ގޮތް ދަސްކުރުމަށް އެއް އަހަރު ދުވަހު އަޅުގަނޑާ އެކު އެ ކުދިން މަސައްކަތް ކުރާނެ،" ޝާހިދު ވިދާޅުވި އެވެ.

އދ. ގެ ނިޒާމުގެ ތެރެއަށް އެ ޒުވާނުން ހޭލުންތެރި ކުރުވައި މަލްޓިލެޓަރަޒިމަށް ވަރުގަދަ އަށް ވަކާލާތު ކުރާ ބަޔަކަށް ހެދުމަށް މަސައްކަތް ކުރާނެ އެވެ.

މި ޕްރޮގުރާމުގެ ދަށުން އަންނަ މަސް ނިމުމުގެ ކުރިން، ފުރަތަމަ ފެލޯސް ނިއު ޔޯކަށް ގެންދެވޭނެ ކަމަށް އޭނާ ވިދާޅުވި އެވެ.

އދ. ގެ އާންމު މަޖިލީހުގެ ރައީސްގެ ހައިސިއްޔަތުން ޝާހިދު ރާއްޖެ ކުރައްވާ ފަސް ދުވަހުގެ ދަތުރުގައި މިއަދު ވަނީ ރައީސް އިބްރާހިމް މުހައްމަދު ސޯލިހާ ވެސް ބައްދަލުކުރައްވައިފަ އެވެ. އިސްކަންދަރު ސްކޫލުގައި މިއަދު ދަރިވަރުންނާ ބައްދަލުކުރެއްވިއިރު، މާލެ އާއި އެކި ރަށްތަށުގެ ސްކޫލްތަކުގެ ދަރިވަރުންނަަށް ވަނީ އޭނާއާ ސުވާލުކުރުމުގެ ފުރުސަތު ވެސް ދެއްވައިފަ އެވެ.