ނޫސްވެރިންކަމުގެ އިނާމުގެ މައްސަލަ ބޮޑުވެފައި ވަނިކޮށް ރައީސް ބައިވެރިވެވަޑައިގަންނަވާތީ ނުރުހުން

މި އަހަރުގެ ނޫސްވެރިކަމުގެ އިނާމު ދިނުމުގެ އުސޫލާ މެދު ގިނަ ނޫސްވެރިންތަކެއް ހިތްހަމަނުޖެހިފައި ތިބި ދަނޑިވަޅެއްގައި ރައީސް އިބްރާހިމް މުހައްމަދު ސޯލިހު، އެ ހަފުލާގައި ބައިވެރިވަޑައިގަތުމަކީ ނޫސްވެރިން ކަންބޮޑުވާ ކަމެއް ކަމަށް ބުނެ އެ މަނިކުފާނަށް މިއަދު ސިޓީއެއް ފޮނުވައިފި އެވެ.

ރާއްޖޭގެ 75 ނޫސްވެރިއަކު ސޮއިކޮށް ރައީސަށް ފޮނުވި މި ސިޓީގައި ބުނީ، މި ފަހަރުގެ ނޫސްވެރިކަމުގެ އިނާމު އަންނަ ހޯމަ ދުވަހުގެ ރޭ ދެނީ ފެބްރުއަރީ 22، 2021 ގައި އާންމުކޮށްފައިވާ ނޫސްވެރިކަމުގެ އިނާމު ދިނުމުގެ އުސޫލާ ހިލާފަށް ކަމަށެވެ.

ނޫސްވެރިންގެ ކަންބޮޑުވުމަކީ އޮންލައިން މީޑިއާތަކުގެ ނޫސްވެރިންނަށް ވަކި ޕެނަލަކުން މާކްސް ދީފައި، ބްރޯޑްކާސްޓިން މީޑިއާތަކުގެ ނޫސްވެރިންނަށް ވެސް ވަކި ޕެނަލްއަކުން މާކްސް ދިނުމަށް ފަހު، ދެ ބާވަތުގެ މީޑިއާ އެއްކޮށްލައިގެން އިނާމު ދިނުމަށް ނިންމާފައި ވުމެވެ. ނަމަވެސް ވަކި ފަނޑިޔާރުންގެ ދެ ޕެނަލެއް ނަގަން ނޫސްވެރިކަމުގެ އިނާމު ދިނުމުގެ އުސޫލު ޖާގައެއް ނުދޭ ކަމަށް ސިޓީގައި ވެ އެވެ.

މި އިނާމަށް މި އަހަރު ކުރިމަތިލި 10 މީޑިއާގެ ތެރެއިން ހަތް މީޑިއާއަކުން ކަންބޮޑުވުން ފާޅުކޮށް، އެގޮތަށް އިނާމު ދިނުން ކުރިއަށް ނުގެންދިއުމަށް މޯލްޑިވްސް މީޑިއާ ކައުންސިލް (އެމްއެމްސީ) އަށް ވަނީ ޕެޓިޝަނެއް ވެސް ހުށަހަޅައިފަ އެވެ. އެ ޕެޓިޝަންގައި ސޮއިކޮށްފައި ވަނީ "މިހާރު"، "އަވަސް"، ވަން އޮންލައިން"، "ވޮއިސް"، "މޯލްޑިވްސް ބިޒްނަސް ސްޓޭންޑާޑް"، "ފަހު މިނެޓް" އަދި "ވަގުތު" އެވެ.

މި ޕެޓިޝަން ލިބުނު ނަމަވެސް، މީޑިއާތަކުގެ އިސްވެރިންނާ މަޝްވަރާކުރުމެއް ނެތި ކުރިން ވެސް އިނާމު ދޭން ނިންމާފައި އޮތް އުސޫލުގެ ދަށުން އެކަން ކުރިއަށް ގެންދަން އެމްއެމްސީން ނިންމާފައި ވަތީ ރައްޔިތުންގެ މަޖިލީހާއި އެމްއެމްސީގެ އިނާމުދޭ ކޮމިޓީގެ މުގައްރިރަށް ވެސް ސީޓިއެއް ފޮނުވާފައިވެ އެވެ.

ރައީސަށް ފޮނުވި ސިޓީގައި ބުނީ، މި މައްސަލަ ނޫސްވެރިންގެ ފަރާތުން ޝުނާނާ އެންޑް ކޯ އެލްއެލްޕީ ލޯ ފާމުން ސިވިލް ކޯޓަށް މިއަދު ވައްދަން މަސައްކަތް ކުރަމުން އަންނަ ކަމަށެވެ.

ގިނަ އަދަދެއްގެ ނޫސްވެރިންގެ ކަންބޮޑުވުންތައް ހުރެ، އެ އަށް ހައްލެއް ހޯދުމަށް އެއްވެސް މަސައްކަތެއް ނުކޮށް ބާއްވާ އިނާމު ދިނުމުގެ ހަފުލާއެއްގައި ރައީސް ބައިވެރިވެވަޑައިގަތުމަކީ ނޫސްވެރިން ވަރަށް ކަންބޮޑުވާކަމެއް ކަމަށް މި ސިޓީގައި ވެ އެވެ.