އިންޑިއާގެ އިޑްލީ މިއޮތީ ޒަމާނީވެފައި!

އިންޑިއާގެ ކެއުންތަކަށް ލޯބިކުރާ މީހުންނަށް އިޑްލީ އަކީ އާ އެއްޗަކަށް ނުވާނެ އެވެ. މިއީ ހަނޑޫ ސްޓީމްކޮށް، ފެން އާންމު ގޮތެއްގައި ވަށްކޮށް ތައްޔާރުކޮށްފައި ހުންނަ ކެއުމެކެވެ. އިޑްލީ ބޮޑަށް ވައްތަރީ ފުށްޖަހާ މަލަކާ އެވެ.

މި ކާނާ އާންމުކޮށް ސާވްކުރާނީ އެކި ވައްތަރުގެ ރިހަ އާއި ޗަޓްނީއާ އެކު ކެޔޮފަތެއްގެ މަތީގަ އެވެ. އެއީ އެންމެ އިހުގައި ވެސް އަދި މިހާރު ވެސް އިންޑިއާގެ ގިނަ ހިސާބުތަކުގައި އިޑްލީ ސާވްކުރާ ގޮތެކެވެ. އެކަމަކު ޒަމާނުގެ ކުލަވަރު މިހާރު ވަނީ އިޑްލީ އަށް ވެސް އައިސްފަ އެވެ.

ޓްވިޓާގައި ދައުރުވަމުން އަންނަ ފޮޓޯއެއްގައި އިޑްލީ މިހާރު ފެންނަނީ މެގްނަމެއްގެ ބައްޓަމުގަ އެވެ. މެގްނަމް ގޮތަށް އިޑްލީ ތައްޔާރުކޮށްފައި ވަނީ ދަނޑިކޮޅަކާ އެކު އެވެ. އެހެންވެ ރިހަ ތައްޓަށް ނުވަތަ ޗަޓްނީގެ ތެރެއަށް އިޑްލީ ކޮއްޕާލައިގެން ކާލަންވީ އެވެ. ފަސޭހަ ގޮތަކަށް ވާނެ އެވެ. އެއް ބަޔަކު ބުނެފައިވާ ގޮތުގައި މިއީ ދެން އިޑްލީގައި އަތް ނުލައި އެ ކާނެ މާ ފަސޭހަ ގޮތެކެވެ. އުލެއް، އަދި ސަމުސަލެއް ވެސް ބޭނުމެއް ނުވާނެ އެވެ.

އިޑްލީ އަށް ގެނައި ޒަމާނީ ބަދަލު ފެންނަ ފޮޓޯގެ ވާހަކަ އިންޑިއާގެ މަޝްހޫރު ކުންފުނި މަހިންދުރަ ގްރޫޕްގެ ޗެއާމަން އާނަންދު މަހިންދުރަ ޓްވިޓާގައި ހިއްސާކުރެއްވުމާ އެކި ވަރަށް ގިނަ ބަޔަކު އެކި ކަހަލަ ޝުއޫރުތައް ފާޅުކޮށްފައިވެ އެވެ.

އާނަންދަކީ އަބަދު ވެސް އިންޑިއާގެ މީސްމީހުން ކުރާ މިކަހަލަ އާދަޔާހިލާފު ނުވަތަ "އިނޮވޭޓިވް" ކަންކަމުގެ ވާހަކަ ވަރަށް ގިނައިން ޓްވިޓާގައި ޕޯސްޓްކުރައްވައި، ޖޯކް ވެސް ޖައްސަވާ ބޭފުޅެވެ. ޒަމާނީ އިޑްލީއާ ބެހޭ ގޮތުން އޭނާ ވިދާޅުވީ މިއީ އާ އީޖާދުތައް ގެނެސްދޭން އިންޑިއާގައި މަޝްހޫރު ބެންގަލޫރުގެ އުފެއްދުމެއް ކަމަށެވެ.

ކޮންމެއަކަސް ޒަމާނީ އިޑްލީއާ ގުޅޭ ގޮތުން އާންމުންގެ ތެރޭގައި ހުރީ މަސްހުނި ހިޔާލުތަތެކެވެ. އާ ގޮތް އެއް ބަޔަކަށް ކަމަކު ނުދެ އެވެ.

ނަމަވެސް ބައެއް މީހުން ބުނެފައި ވަނީ އާ ގޮތްގޮތަށް ކަންކަން ކުރުމަކީ އުފެއްދުންތެރިކަން ވެސް ދައްކުވައިދޭ ކަމެއް ކަމަށެވެ. އެހެންވެ އިޑްލީ މިހާރު މެގްނަމެއްގެ ބައްޓަމަށް އޮތުމަކީ އެއްވެސް މައްސަލައެއް ނޫން ކަމަށް ބުނެފައިވެ އެވެ.